ކުރިއަށް އޮތް ރިޔާސީ އިންތިހާބުގައި ވާދަކުރާ އެއްވެސް ކެނޑިޑޭޓެއްގެ މެނިފެސްޓޯގައި، ހިލޭ އައިސްކްރީމާއި މެޓާ ބަހާ ވާހަކަ ނޫން އެއްޗެއް ނެތް ކަމަށް ވިދާޅުވެ ވާދަވެރި ކެނޑިޑޭޓުންނަށް ކުރީގެ ހޯމް މިނިސްޓަރު އުމަރު ނަސީރު ރައްދު ދެއްވައިފިއެވެ.
ރިޔާސީ އިންތިހާބުގައި ވާދަކުރުމުގެ ގޮތުން، އުމަރު ރޭ ބޭއްވި ކެމްޕެއިން ޖަލްސާގައި ވާހަކަދައްކަވަމުން އުމަރު ވިދާޅުވީ، ރިޔާސީ ކެނޑިޑޭޓުން އެއަށްވުރެ ޒިންމާވާން ޖެހޭނެ ކަމަށެވެ.
"މި ޕޮލިޓިކްސް ރާއްޖޭގައި ހިނގާތާ ވަރަށް ޒަމާންވެއްޖެ. އެއްވެސް އެއްޗެއް ދައުލަތުން ހިލޭ ދޭ ކަމަށްވާންޏާ ދަރަނި ފޮތުގައި އޭތި ނުޖެހިއެއް ނުވެއްދާނެ. މިހާރު ދަރަނި ފޮތް އެންމެ ބޮޑުކޮށް އޮތީ އިންޑިއާގެ ދަރަނި ފޮތެއް، އަޅުގަނޑުމެން އަތުގައި އޮތީ، އެ އޮތީ އެމްއެމްއޭގައި، އިންޑިއާގެ ދަރަނިފޮތެއް. އެހެންވީމާ އިންޑިއާގެ ދަރަނި ފޮތަށް ނާރާ އެކައްޗެއްވެސް ނުދާނެ، ހިލޭ ބަހައިފިއްޔަކާމު،"
އުމަރު ވިދާޅުވީ، އޭނާ މަސައްކަތް ކުރައްވަނީ އެއަށްވުރެ ޒިންމާދާރު ރައްޔިތެއް އުފައްދަން ކަމަށެވެ.
"އަޅުގަނޑުމެން މަސައްކަތް ކުރަނީ ޒިންމާދާރު، މަސައްކަތްތެރި، ހީވާގި، އަހުލާގު ރަނގަޅު މުޖުތަމައެއް ބިނާކުރަން. ސަރުކާރާ ދިމާލަށް އަބަދު އަތްދިއްކޮށްގެން، ހިލޭ އެއްޗެއް ދޭތޯ އޮންނަ ރައްޔިތެއް ނޫން އަޅުގަނޑުމެން އުފައްދަން މި އުޅެނީކީއެއް. އަޅުގަނޑުމެންގެ ވިޝަން އަކީ ޒިންމާދާރު، މަސަައްކަތްތެރި، އަހުލާގު ރަނގަޅު ތައުލީމާއި ހުނަރު ލިބިފައި ހުރި ބަޔަކު އުފެއްދުން. އެއީ އަޅުގަނޑުމެންގެ މަސައްކަތަކީ. އެފަދަ ރައްޔިތަކު ނުޖެހޭނެ ސަރުކާރުގައި އެދިގެން ހިލޭ އެއްޗެއް ދޭތޯ ހުންނާކަށް. މުއްސަނދިން ކައިރިއަށް ސިޓީ ފޮނުވައިގެން ފައިސާގެ އެހީއަށް އެދޭކަށް ނުޖެހޭނެ. އެ ކަލްޗާ އަޅުގަނޑުމެން އެބަ ޖެހޭ ދޫކޮށްލަން. އަޅުގަނޑުމެން އަމިއްލަ ފައިމައްޗަށް ތެދުވުމުގެ ވިސްނުން އަޅުގަނޑުމެން އެބަޖެހޭ ގެންގުޅެން. އެހެންވީމަ އަޅުގަނޑުމެންގެ މެނިފެސްޓޯގައި މި ދިވެހިރާއްޖެ ޓްރާންސްފޯމް ކުރުމުގެ 50 ނުކުތާގެ ތެރޭގައި އޮތީ އެކަންކަން،"
އުމަރު ވިދާޅުވީ އޭނާގެ ރިޔާސީ ވައުދުތަކުގެ ތެރޭގައި، އާމްދަނީ އިތުރުކުރަން ހަދަންވީގޮތް، މުޅި ގައުމު އެއްކޮށް ބަދަލުކުރަން ހަދަންވީ ކިހިނެއްކަން އިއުލާން ކޮށްފައިވާނެ ކަމަށެވެ. އެ ކަންތައްތަކުގެ ތެރޭގައި ރާއްޖޭގެ އުތުރުގައި ޓްރާންޝިޕްމަންޓް ބަނދަރެއް ގާއިމުކުރުމާއި، ފްރީޓްރޭޑް ޕޯޓް ޒޯން ރާއްޖޭގެ ދެކުނުން އައްޑުއަތޮޅުގައި ގާއިމުކުރުމާއި ރާއްޖެއަށް ވަންނަ ޓޫރިޒަމްގެ ރެވެނިއު ރާއްޖޭގެ ބޭންކު ސިސްޓަމްގެ ތެރެއިން ދަތުރުކުރާނެކަން ޔަގީންކުރުން ހިމެނޭ ކަމަށެވެ.
މީގެ އިތުރުން މިހާރު އޮތް 87 މެންބަރުންގެ ރައްޔިތުންގެ މަޖިލިސް ކުޑަ ކުރުމާއި، ސިޔާސީ މަގާމުތައް މަދުކޮށް ރާއްޖޭގެ ސިޔާސީ މައިދާން އަލުން ރީ ޝޭޕްކޮށް، މިހާރަށްވުރެ 30 ޕަސެންޓް ކުޑަ ސަރުކާރެއް ގާއިމުކުރައްވާނެ ކަމަށްވެސް ވިދާޅުވިއެވެ.
ރިޔާސީ ވައުދުތަކުގެ ތެރޭގައި ހިމެނޭ އެންމެ މުހިއްމު ކަމަކީ، މަސްތުވާތަކެތީގެ މައްސަލަ ހައްލުކުރުން ކަމަށާއި، އޭގެ އިތުރުން ރާއްޖޭގައި ބޭރުގެ ސިފައިން ތިބި މައްސަލަ ހައްލުކޮށް، ރާއްޖޭގެ ކުދި އަދި މެދު ފަންތީގެ ވިޔަފާރިތައް ބޭރު މީހުންގެ އަތްމައްޗަށް ދިއުން ހުއްޓުވުމާއި ޓެކްސް ކުޑަ ކުރުން ހިމެނޭ ކަމަށްވެސް ވިދާޅުވިއެވެ.