މާލޭ ސިޓީ ކައުންސިލުން ހަރަދު ކޮށްގެން ހުޅުމާލޭ ފޭސް ދޭއްގައި ހެދި ބުޅާ ފެސިލިޓީ ސަރުކާރަށް ނަގަން ނިންމިތާ މަހަކަށް ވުރެން ގިނަ ދުވަސް ފާއިތުވެގެން ދިޔައިރު ވެސް އަދިވެސް އެތަނާ މިނިސްޓްރީއަކުން ހަވާލެއް ނުވެއެވެ. މަގުމަތީގައި އުޅޭ ބުޅަލުގެ މައްސަލަ ވަނީ ވަރަށް ބޮޑުވެފައެވެ. އެ އެއްޗެއްސަށް ވެސް ރައްކާތެރި ކަމެއް ނުލިބި އުޅެން ޖެހިފައިވާއިރު އެ އެއްޗެހި ލާ ނަޖިހުގެ ސަބަބުން ބައެއް މަގުތައް ވަނީ ވަރަށް ބޮޑަށް ހަޑިވެފައެވެ. އަދި މިއީ ވިއްސާރަ މޫސުމެއް ކަމުން މާލޭ މަގުތަކުގައި ފެން ހެދޭއިރު މިފަދަ ނަޖިހުގެ ސަބަބުން އެކި ބަލިތައް ފެތުރުމުގެ ފުރުސަތު ވަނީ ވަރަށް ބޮޑުވެފައެވެ. މިދިޔަ ޑިސެމްބަރު މަހުގެ ތިން ވަނަ ދުވަހު ސަރުކާރުން ނިންމާފައިވަނީ, އެ ފެސިލިޓީ ހިންގުން ސިޓީ ކައުންސިލްގެ އަތުން ނަގައި, އެނިމަލް ވެލްފެއާ މިނިސްޓްރީއާ އެ ފެސިލިޓީ ހަވާލުކުރުމަށެވެ. އޭރު އެތަނަށް ބުޅާތައް ގެންދަން ސިޓީ ކައުންސިލުން ދިޔައީ ތައްޔާރުވަމުންނެވެ. ނަމަވެސް ސިޓީ ކައުންސިލުން އޭރު ބުނީ ފެސިލިޓީ މިނިސްޓްރީއާ ހަވާލު ކުރެވޭނީ އެތަން ހެދުމަށް އެ ކައުންސިލުން ކުރި ހަރަދު ދިނުމުން ކަމަށެވެ. މިހާރު އެ މަސައްކަތް ގޮސްފައިވާ ހިސާބެއް ބަލާލުމަށް އެނިމަލް ވެލްފެއާ މިނިސްޓްރީއާ ގުޅާލުމުން އެ މިނިސްޓްރީގެ އޮފިޝަލަކު މިއަދު ވިދާޅުވީ އެ ފެސިލިޓީ މިނިސްޓްރީގެ ދަށަށް ބަދަލު ކުރުމުގެ މަސައްކަތްތައް ކުރަމުން އަންނަ ކަމަށެވެ. އިތުރު ތަފުސީލެއް ނުދެއްވައެވެ. އެހެންކަމުން މިނިސްޓްރީއިން އެތަނާ ހަވާލު ވާނެ ދުވަހެއް, އަދި މަގުތަކުގައި އުޅޭ ބުޅާތައް އެތަނަށް ގެންދަން ފަށާނެ ތާރީހެއް އަދިވެސް ސާފެއް ނުވެއެވެ. ބުޅާ ފެސިލިޓީއަށް ބުޅާތައް އަދިވެސް ގެންދަން ނުފެށިވާއިރު އެތަން ރަސްމީކޮށް މިދިޔަ ނޮވެންބަރު މަހު ހުޅުވައި ދެއްވީ ރައީސް ޑރ. މުޙައްމަދު މުއިއްޒެވެ. މި މައްސަލައަށް ހައްލެއް އަދި ގެނެވިފައި ނުވާތީ މާލޭގެ އެކި ސަރައްހައްދުތަކުގައި ބުޅާތައް ވަނީ ގިނަވެފައެވެ. އޭގެ ސަބަބުން މަގުމަތީ ހިނގާބިނގާވެ އުޅޭ މީހުންނަށް ވެސް ދަތިތަކާ ކުރިމަތިވެއެވެ.