"އަދަދު" ނޫހަކީ ގާނޫނީ ޝަހުސެއްކަން ކަށަވަރުނުވާ ކަމަށް ބުނެ މައުލޫމާތު ހޯދަން މި ނޫހުން ހުށަހަޅާ އާރުޓީއައި ރިކުއެސްޓުތަކަށް ޖަވާބު ދޭން ރައީސް އޮފީހުން ދެކޮޅު ހަދައިފި އެވެ.
އޮކްޓޯބަރު، 2024، ގައި ހުށަހެޅި އާރުޓީއައި އަކަށް ޖަވާބު ނުދޭތީ އިންފޮމޭޝަން ކޮމިޝަނަރުގެ އޮފީހުން މިއަދު ބޭއްވި އަޑުއެހުމެއްގައި ރައީސް އޮފީހުގެ ފަރާތުން ބައިވެރިވި، ލީގަލް އޮފިސަރު ޖުވެއިދާ ވިދާޅުވީ އަދަދު ނޫހުން ހުށަހަޅާ ރިކުއެސްޓުތަކަށް ޖަވާބުދިނުން ގާނޫނީ ގޮތުން ލާޒިމުނުވާ ކަމަށެވެ.
މައުލޫމާތަށް އެދި ހުށަހެޅޭނީ "މީހަކަށް" ކަމަށް ގާނޫނުގެ ހަތަރު ވަނަ މާއްދާގެ ހ. ގައި ބުނެފައިވާ ކަމަށް އޭނާ ފާހަގަ ކުރެއްވި އެވެ. އަދި މީހަކީ ތަބީއީ ޝަހުސެއް ނުވަތަ ގާނޫނީ ޝަހުސެއްކަން ގާނޫނުގައި މާނަކޮށްފައިވާ ކަމަށް ވެސް އޭނާ ފާހަގަކުރެއްވި އެވެ.
"އަޅުގަނޑުމެންނަށް ފާހަގަކުރެވުނީ އަދަދު އޮންލައިން މިއީ މި މާނައަށް ފެތޭ ނަމެއް ނޫންކަން. އެހެންވެގެން އިނގޭތޯ [ޖަވާބެއް ދީފަ ނުވަނީ]،" ޖުވެއިދާ ވިދާޅުވި އެވެ.
އެކަން މި ނޫހަށް އެންގިތޯ އިންފޮމޭޝަން ކޮމިޝަނަރު އާހިދު ރަޝީދު އެހުމުން، ރައީސް އޮފީހުގެ އޮފިޝަލުން ވަނީ މިހާތަނަށް އެކަން އަންގާފައިނުވާނެ ކަމަށް ބުނެފަ އެވެ.
އަޑުއެހުމުގައި މި ނޫހުން ވާނީ މީގެކުރިން ވެސް އަދި މި ހުށަހެޅުމަށްފަހު ވެސް ރައީސް އޮފީހުން މި ނޫހުގެ ނަމުގައި ހުށަހެޅި އެކި އާރުޓީއައި ތަކަށް ޖަވާބުދީފައިވާ ކަން ފާހަގަކޮށްފަ އެވެ.
އެ މައްސަލައިގައި ވާހަކަ ދައްކަވަމުން ކޮމިޝަނަރު ވިދާޅުވީ، މައުލޫމާތު ހޯދަން އެދޭ ފަރާތަކުން ގާނޫނުގައި ބުނާ މިންވަރަށް މައުލޫމާތު ފޯރުކޮށްދީފައި ނުވާނަމަ އެ ފަރާތަކަށް މައުލޫމާތު ނުދޭން ނިންމޭނީ އުނިވާ މައުލޫމާތެއް ދިނުމަށް ފުރުސަތު ދިނުމަށްފަހު ކަމަށެވެ.
"އަދަދު އޮންލައިން އިން ހުށަހެޅި ހުށަހެޅުމުގައި އެ ފަރާތާ ގުޅޭނެ ނަމްބަރަކާއި އެ ފަރާތުގެ އެޑްރެހާއި ހުރިކަމުގައި ވަންޏާ ގާނޫނުގަ ބުނާ މިންވަރަށް މިއޮތީ މައުލޫމާތު ފޯރުކޮށްދެވިފަ ކަމަށް ބެލެވޭނެ،" އާހިދު ވިދާޅުވި އެވެ.
"އެކަމުގަ އަމަލުކުރަން ޖެހޭނެ ގޮތަކީ އަދަދު އޮންލައިންއާ ގުޅޭނެ ގޮތެއް އަދި އަދަދު އޮންލައިން އަށް މައުލޫމާތު ފޯރުކޮށްދެވޭނެ ގޮތެއް އެނގެން އޮތް ކަމަށް ވަންޏާ އެ މައުލޫމާތެއް ފޯރުކޮށްދެއްވަން ވާނެ،" އޭނާ ވިދާޅުވި އެވެ.
މި ނޫހުން ވާނީ ގާނޫނުގައި ބުނާ ހުރިހާ މައުލޫމާތެއް މަހޯލި ޕޯޓަލް ގައި ފޯރުކޮށްދީފަ އެވެ. ރައީސް އޮފީހުން އެކަމާ ގުޅިގެން ސުވާލު އުފައްދާފައެއް ވެސް ނުވެ އެވެ.
މި މައްސަލާގައި ރައީސް އޮފީހުން ވަނީ އައިކޮމްގެ ރައުޔަކަށް ވެސް އެދިފަ އެވެ. މައުލޫމާތު ފޯރުކޮށްދިނުމަށް ހުރަހެއް ނެތް ކަމަށް ބުނެ އައިކޮމް އިން ރައީސް އޮފީހަށް ޖަވާބެއް ދީފައިވާނެ ކަމަށް އާހިދު މިއަދުގެ އަޑުއެހުމުގައި ވިދާޅުވި އެވެ.
އައިކޮމްގެ އަޑުއެހުން ނިންމާލީ ރަސްމީ ހަތް ދުވަހުގެ ތެރޭގައި ރައީސް އޮފީހުން މި ނޫހަށް ހުށަހެޅުމުގައި އެދިފައިވާ ޖަވާބު ދޭން އެންގުމަށްފަހު އެވެ. މި ނިންމުމާ ގުޅިގެން މިހާތަނަށް ރައީސް އޮފީހުން މި ނޫހާ އެއްވެސް ވަރަކަށް މުއާމަލާތް ކޮށްފައެއް ނުވެ އެވެ.