އައްޑޫގެ ގުޅިފައިވާ އަވަށްތަކުން ކަރަންޓް ކެނޑޭ މައްސަލަ ރައްޔިތުންގެ މަޖިލީހަށް ހުށަހަޅައިފި އެވެ.
ކަރަންޓު ކެނޑެމުންދާ މައްސަލަ ހައްލު ނުވެ ދިގުލައިގެން ގޮސްފައި އޮތީ ފެނަކަ ކޯޕަރޭޝަންގެ އިސްވެރިންގެ ފަރުވާ ކުޑަކަމުން ކަމަށް ބުނެ އެ މައްސަލަ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީ އަށް ހުށަހެޅުއްވީ ޕީއެންސީ އަށް ނިސްބަތްވާ ހިތަދޫ މެދު ދާއިރާގެ މެންބަރު އަހުމަދު އަޒާނެވެ.
އޭނަ މިއަދު މަޖިލީހަށް ފޮނުއްވި ސިޓީގައި ވިދާޅުވެފައި ވަނީ އައްޑު އަށް ކުރިމަތިވެފައިވާ ކަރަންޓުގެ މައްސަލައަށް އެއް އަހަރު ވެގެންދި ޔައިރު، އަދިވެސް ބައެއް އިންޖީނުތަކުގެ ސްޕެއާ ވެސް ނުލިބޭ ކަމަށެވެ. އަދި ކަރަންޓުގެ މައްސަލައަށް ހައްލު ނުލިބި ދިގުލައިގެން ދިޔުމުގައި ފެނަކަ ކޯޕަރޭޝަންގެ އިސްވެރިންގެ އިހުމާލާއި ފަރުވާ ކުޑަކަން އޮތް ކަމަށް ދެކެވަޑައިގަންނަވާ ކަމަށް ވިދާޅުވެފައިވެ އެވެ.
އަޒާން ވަނީ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީއަށް ފެނަކައިގެ އިސްވެރިންތަކެއް ހާޒިރު ކުރުމަށް ވެސް ހުށަހަޅުއްވައިފަ އެވެ.
އެ ބޭފުޅުންނަކީ:
* މުހައްމަދު ނަޖާހު: މެނޭޖިން ޑިރެކްޓަރު
* އަބްދުލް ވާހިދު: ކުރީގެ ޕްރޮކިއުމެންޓް ހެޑް
* މަރިޔަމް ޝަހުލާ: ޕްރޮކިއުމެންޓް ހެޑް
* އަބްދުﷲ ވަހީދު: ޗީފް ފައިނޭންޝިއަލް އޮފިސަރު
* މުހައްމަދު މަސްއޫދު: ކުރީގެ ޗީފް ފައިނޭންޝިއަލް އޮފިސަރު
* އަބްދުﷲ ނާޝިދު: ޗީފް ޓެކްނިކަލް އޮފިސަރު
އެ ބޭފުޅުން ކޮމިޓީއަށް ހާޒިރުވާއިރު، އައްޑޫގެ ކަރަންޓު މައްސަލައަށް ހައްލު ހޯދުމަށް ފެނަކައިން އެކުލަވާލައިފައިވާ ޓައިމްލައިނެއް ނުވަތަ ޕްލޭނެއް އޮތް ނަމަ އެ މައުލޫމާތު ހިއްސާކުރެވޭ ގޮތަށް ހާޒިރުކޮށް ދޭން އަޒާންގެ ސިޓީގައި އެދިފައިވެ އެވެ.
އޭނަ ވިދާޅުވީ އައްޑޫގެ ކަރަންޓު މައްސަލައާ ގުޅިގެން އެ ސިޓީގެ ފެނަކަ އޮފީހުގައި މަސައްކަތް ކުރާ ބައެއް މުވައްޒަފުންނާ ބައްދަލުކޮށް ހޯދި މައުލޫމާތުން، އައްޑޫ ފެނަކައިން ހިންގާ އިންޖީނުގޭގައި ހުރި 17 އިންޖީނުގެ ތެރެއިން މި ވަގުތު މަސައްކަތް ކުރަނީ 13 އިންޖީނުކަން އެނގިފައިވާ ކަމަށެވެ. އަދި އަނެއް ހަތަރު އިންޖީނަކަށް ބޮޑެތި މައްސަލަ ދިމާވެފައިވާ އިރު، އޭގެ ތެރެއިން ތިން އިންޖީނަކީ މަރާމާތު ނުކުރެވޭ ހާލަތުގައި ހުރި އިންޖީނުތަކެއް ކަމަށް ވެސް ބުނެފައިވެ އެވެ.
ސިޓީގައި އަޒާން ވިދާޅުވީ އިންޖީނުތަކަށް މައްސަލަ ދިމާވާ މައިގަނޑު ސަބަބެއްގެ ގޮތުގައި މުވައްޒަފުންގެ ފަރާތުން ލިބުނު މައުލޫމާތުތަކުން އެނގޭ ގޮތުގައި ސްޕެއާ ހޯދުމަށް ރިކުއެސްޓް ކުރާތާ ގިނަ ދުވަސްތަކެއް ފާއިތުވެގެން ގޮސްފައިވާ އިރު މިހާަނަށް ވެސް އެކަން ނުވެ އޮތުން ހިމެނޭ ކަމަށެވެ. އަދި ސްޕެއާތައް ނުލިބި އިންޖީނުތަކުގެ މެއިންޓެނަންސާއި މަރާމާތުގެ މަސައްކަތް ނުކުރެވޭނެކަން ވެސް ފާހަގަކުރައްވާފައިވެ އެވެ.
View this post on Instagram
A post shared by Fenaka Corporation Limited (@fenaka.mv)
އައްޑޫގެ ކަރަންޓްގެ މައްސަލަ އަޒާން މަޖިލީހަށް ހުށަހެޅުއްވި އިރު، އައްޑޫގެ ބައެއް އެހެން ދާއިރާތަކުގެ މަޖިލިސް މެންބަރުންނާ އެކު މި މަހުގެ 14 ގައި ފެނަކަގެ މެނޭޖްމަންޓާ ވެސް ބައްދަލުކުރައްވާފައިވެ އެވެ. އެ ދުވަހު ފެނަކަ އިން ވަނީ މައްސަލަ ހައްލު ކުރުމަށް ބޭނުންވާ ސްޕެއާ ހަތް ދުވަސް ތެރޭގައި އައްޑު އަށް ފޮނުވާނެ ކަމުގެ ޔަގީންކަން ވެސް ދީފަ އެވެ.
ނަމަވެސް މިހާތަނަށް އެކަން ވެފައެއް ނުވެ އެވެ.
އައްޑޫ ކަރަންޓް މައްސަލަ މަޖިލީހަށް ހުށަހަޅައިފި
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ