ރައީސުލްޖުމްހޫރިއްޔާ ޑރ.މުހައްމަދު މުއިއްޒު، އެސްޓޯނިއާގެ ވެރިރަށް ޓަލިންގައި ހުންނަ ގްރީނަރޖީ ޑޭޓާ ސެންޓާރސް (ޖީ.ޑީ.ސީ.)އަށް ޒިޔާރަތްކުރައްވައިފިއެވެ.
ރައީސް ގްރީނަރޖީ ޑޭޓާ ސެންޓާރސްއަށް ޒިޔާރަތްކުރެއްވުމުން އެ މަނިކުފާނަށް މަރުޙަބާ ވިދާޅުވީ ޗީފް އެގްޒެކެޓިވް އޮފިސަރ އަދި ޗީފް ޑިވެލޮޕްމަންޓް އޮފިސަރ، ކެރްތް އެވެރްތް އަދި ޗީފް ޓެކްނޮލޮޖީ އޮފިސަރ ޓޫމަސް ކެލްއެވެ.
މި ޒިޔާރަތުގައި ޖީ.ޑީ.ސީ.ގެ ފައުންޑަރ އުއްލަރު ޔާކްސޯ ވަނީ އެ ސެންޓަރާ ބެހޭގޮތުން ރައީސްއަށް ޕްރެޒެންޓޭޝަނެއް ހުށައަޅައިދެއްވާފައެވެ.
މި ޕްރެޒެންޓޭޝަންގައި ޔާކްސޯ ވަނީ، މި ސެންޓަރުގެ މުހިންމު އެއް އަމާޒަކީ ސެންޓަރުގެ ޕާޓްނަރުން ޑިޖިޓަލައިޒޭޝަންގެ ތެރެއިން ގުޅިލާމެހިފައިވާ ޑިޖިޓަލް މުސްތަގުބަލަކަށް ވާސިލުކޮށްދިނުމަށްޓަކައި އެޑްވައިޒަރީ ރޯލެއް އަދާކުރުންކަން ފާހަގަކުރައްވާފައެވެ.
މިއަށްފަހު ރައީސް ވަނީ އެ ސެންޓަރ ބައްލަވާލައްވާ، ހަކަތަ ސަމަކާރަ ކުރުމާގުޅޭ މަސައްކަތްތަކާއި ޑޭޓާ ރައްކާކުރުމުގައި އެ ސެންޓަރުން ކުރާ މަސައްކަތްތަކުގެ މަޢުލޫމާތު އޮޅުންފިލުއްވާފައެވެ.
މި ސެންޓަރަކީ ދެހާސް ވިހި ވަނަ އަހަރު އެފެދުނު ބޯލްޓިކް ސަރަޙައްދުގެ އެންމެ ބޮޑު ޑޭޓާ ސެންޓަރެވެ.
އެ ސެންޓަރުގެ ސެކިއުރިޓީއާއި ސަވެއިލަންސް ބެލެހެއްޓުމުގެ ނިޒާމަކީ އެޑްވާންސްޑް އޭ.އައި ޓެކްނޮލޮޖީއަށް ބަރޯސާވާ ނިޒާމެކެވެ.
ދެމެހެއްޓެނިވި ގޮތެއްގައި ހިންގުމަށް ވަރަށް ބޮޑު އިސްކަމެއްދީގެން މި ސެންޓަރުގައި ހަކަތަ ސަމަކާރަ ކުރުމަށްޓަކައި އިއާދަކުރަނިވި ހަކަތައިގެ އިތުރުން ކުނިން އުފެދޭ ހޫނު ހަކަތައަށް ބަދަލުކޮށްގެން ބޭނުންކުރެއެވެ.
މި ސެންޓަރުން އެ ސަރަޙައްދުގެ ރަށްތައް ދެމެހެއްޓެނިވި ޑިޖިޓަލް ބަދަލަކަށް ވާސިލުވުމަށްޓަކާ ހިދުމަތް ހޯދާ ފަރާތްތަކަށް އިތުބާރުކުރެވޭ، ހަރުދަނާ، ދެމެހެއްޓެނިވި ގޮތެއްގައި ޑިޖިޓަލް ވިއުގައަކުން ގުޅާލުމަށް އެހީތެރިވެދެއެވެ.
ރައީސް އެސްޓޯނިއާއަށް މިހާރު ކުރައްވަމުންގެންދަވާ ދަތުރުފުޅަކީ އެ ގައުމުގެ ރައީސް ޑރ.އަލާރް ކަރިސްގެ ދަޢުވަތަކަށް ކުރައްވަމުންގެންދަވާ ދަތުރުފުޅެކެވެ.
މި ދަތުރުފުޅުގައި އެމަނިކުފާނުގެ އަރިހުގައި، ރާއްޖާގެ ފަންނިއްޔާތުގެ މާހިރުންގެ މައްޗަށް އެކުލެވިގެންވާ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ.