އިނގިރޭސި ކުލަބުތަކުން ބޭނުންވެގެން އުޅޭ ސްޕޭނުގެ މިޑްފީލްޑަރު މާޓިން ޒުބިމެންޑީ ދިއުން އެންމެ ގާތީ ސްޕޭނުގެ ރެއާލް މެޑްރިޑަށް ކަމަށް އެ ގައުމުގެ ނޫސްތަކުން ބުނަން ފަށައިފި އެވެ.
ރެއާލް ސޮސިއެޑާޑަށް ކުޅޭ 25 އަހަރުގެ މިޑްފީލްޑަރަކީ ސްޕޭނުގެ ބޮޑެތި ކުލަބުތަކުން ވެސް ބޭނުންވާ ކުޅުންތެރިއެކެވެ. އޭނާ ގަތުމަށް މިދިޔަ ދެ ސީޒަނުގައި ސްޕޭނުގެ ބާސެލޯނާއިން ވަރަށް މަސައްކަތްކުރި އެވެ. އެއީ އޭރުގެެ ކޯޗު ޒަވީ ބޭނުންވުމުންނެވެ.
ހިނގަމުންދާ މި ސީޒަން ފެށުމުގެ ކުރިން އިނގިރޭސިވިލާތުގެ ލިވަޕޫލް ވެސް ޒުބިމެންޑީ ގަތުމަށް ވަރަށް ބޮޑަށް މަސައްކަތް ކުރި އެވެ. ނަމަވެސް ކުލަބު ބަދަލުކޮށް ކުޅުންތެރިޔާ މަޑުކުރީ އެވެ. މިހާރު އޭނާ ގަތުމަށް މަސައްކަތް ކުރަނީ އިނގިރޭސި ޕްރެމިއާ ލީގުގެ ޗެމްޕިއަން މެންޗެސްޓާ ސިޓީ އާއި އާސެނަލް އެވެ. ޒުބިމެންޑީ އާއި ސޮސިއެޑާޑްގެ އެއްބަސްވުމުގައިވާ ގޮތުން އޭނާ ގަންނަން ބޭނުންވާ ކުލަބަކުން ދައްކަންޖެހޭ އަދަދަކީ 60 މިލިއަން ޕައުންޑެވެ.
އޭނާ މިހާރު ބަދަލުވުން ގާތީ ރެއާލް މެޑްރިޑަށް ކަމަށް ބެލެވޭ ދެ ސަބަބެއް އެބައޮތެވެ. ފުރަތަމަ ސަބަބަކީ އަންނަ ސީޒަނަށް ރެއާލް މެޑްރިޑުން ޓާގެޓް ޖަހާފައިވާ ދެ މިޑްފީލްޑަރުން ކުރެ އެއް ކުޅުންތެރިއަކީ ޒުބިމެންޑީ ކަމަށްވުމެވެ. އަނެއް ކުޅުންތެރިއަކީ މެންޗެސްޓާ ސިޓީ އަށް ކުޅެމުން އަންނަ ސްޕޭނުގެ މިޑްފީލްޑަރު އަދި ޔޫރަޕުގެ މޮޅު ކުޅުންތެރިޔާ ރޮޑްރީ އެވެ. މީގެ ތެރެއިން އެންމެ ފަސޭހަވާނީ ޒުބިމެންޑީ ގަތުން ކަމަށް ސްޕޭނުގެ ނޫސްތަކުން ދެކެ އެވެ.
ދެ ވަނަ ކަމަކީ ރެއާލް މެޑްރިޑުގެ ކޯޗުކަމާ ޒަބީ އަލޮންސޯ ހަވާލުވާން އުޅުމެވެ. މިވަގުތު ބަޔާން ލެވަކޫސަން އަށް ކޯޗުކޮށްދެމުން އަންނަ އަލޮންސޯ އަކި ޒުބިމެންޑީ މިސާލެއްގެ ގޮތުން ބަލަމުން އައި ކުޅުންތެރިޔާ އެވެ.