ސްޕޭނުގެ ގައުމީ ކޯޗު ލުއިސް ޑެލަފުއެންޓޭގެ ކޮންޓްރެކްޓް އާކުރަން ނިންމައިފި އެވެ.
2024 ވަނަ އަހަރުގެ ޔޫރޯ ފުޓްބޯޅަ މުބާރާތް ސްޕޭނަށް ކާމިޔާބުކޮށްދިން ކޯޗުގެ ކޮންޓްރެކްޓް އާކުރަން ނިންމާފައި މިވަނީ އެކަން ނުކޮށްގެން އޭނާ ވަރަށް ބޮޑަށް ހިތްހަމަނުޖެހިފައި ހުއްޓަ އެވެ. ސަބަބަކީ އޭނާގެ ކޮންޓްރެކްޓްގައި ހާސިލްކުރަން ޖެހިފައިވާ ހުރިހާ ކަމެއް ވެ ނިމުނުއިރު ވެސް އައު ކޮންޓްރެކްޓްގެ ހިލަމެއް ވެސް ނުދިނުމެވެ.
ސްޕޭނުގެ މީޑިއާތަކުން ބުނަނީ ގައުމީ ކޯޗުގެ ކޮންޓްރެކްޓް އާނުކުރެވި އޮތް މައިގަނޑު ސަބަބަކީ ސްޕޭން އެފްއޭގެ އިންތިހާބު ލަސްވުމާއި އައި ރައީސަކު އިންތިހާބު ކުރުން ދިގުލައިދިއުމުން ކަމަށެވެ. ނަމަވެސް އަލަށް އިންތިހާބުވާނެ ކަމަށް ބެލެވޭ ރައީސް ރަފެލް ލައުޒެން ވަނީ ކޯޗުގެ ކޮންޓްރެކްޓް 2028 އަހަރާ ހަމައަށް އައު ކުރަން ކޯޗާއެކު އެއްބަސްވެފަ އެވެ.
އައު ކޮންޓްރެކްޓާއެކު ޑެލަފުއެންޓޭ އަށް އަހަރަކު 2 މިލިއަން ޔޫރޯ ލިބޭނެ އެވެ. ނަމަވެސް މިއީ އޭނާ އުއްމީދުކޮށްގެން ހުރި ވަރަށްވުރެ މަދު އަދަކެވެ. އޭނާ އުއްމީދު ކުރީ 3 ނުވަތަ 4 މިލިއަން ޔޫރޯގެ މުސާރައެއް ލިބޭނެ ކަމަށެވެ. ކޯޗުގެ މުސާރަ 2 މިލިއަނަށް ބޮޑުކުރާއިރު މިއީ މިހާރު ލިބެމުން އަންނަ މުސާރައިގެ 100 ގުނަ ބޮޑު އަދަދެއް ކަަމަށް ވެސް އޭނާ ބުންޏެވެ.
ކޮންޓްރެކްޓްގެ ކަންތައްތަކާމެދު ހިތްހަމަނުޖެހިފައި ހުރި ނަމަވެސް އުމުރުން 63 އަހަރުގެ ކޯޗު އެހެން ވަޒީފާއަކަށް ނުދާނެ ކަމުގެ ޔަގީންކަން ސްޕޭންގެ އެފްއޭއަށް ލިބިފައި އޮތެވެ. އެއީ އޭނާގެ ކެރިއަރުގެ ބޮޑުބައި ހޭދަކުރީ ފެޑަރޭޝަނުގެ އެކި ވަޒީފާތަކުގައި ކަމަށްވުމެވެ.