ސިޔާސީ ކަންކަމަށްވުރެ ބޮޑަށް ޤައުމީ އުޞޫލުތަކަށް އަބަދުވެސް އިސްކަން ދޭން ޖެހޭނެ ކަމަށް ކުރީގެ ރައީސް މައުމޫން އަބްދުލްޤައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، މިހާރު ކުރިއަށްދާ ނަޞްރުގެ ދުވަހުގެ ޖަލްސާގައި ވާހަކަފުޅު ދައްކަވަމުންނެވެ.
ރައީސް މައުމޫން ވިދާޅުވީ ނޮވެމްބަރު 3ގެ ހަމަލާއިން ވަރަށް ގިނަ އިބްރަތްތަކެއް ލިބިދޭ ކަމަށާއި، ދިވެހީންގެ އެއްބައިވަންތަކަން، ނުގުޑާ ފަދަ އަޒުމެއްގައި ބެހެއްޓުމުގެ މުހިންމުކަން އެ ހަމަލާއިން އަންގައިދިން ކަމަށެވެ.
”ދުނިޔޭގެ ކަންތައްތައް ބަދަލުވެގެންދާ ގޮތުން، ރާއްޖޭގެ ޤައުމީ މަސްރަހަށް ބަދަލުތަކެއް އައި ނަމަވެސް، އަދި ޒަމާނާ އެކަށީގެންވާ ގޮތަކަށް ރާއްޖޭގެ ޤާނޫނުތަކާ ޤަވާއިދުތައް ބަދަލު ވަމުން ދިޔަ ނަމަވެސް، ރާއްޖޭގައި ސިޔާސީ ޕާޓީތަކެއް އުފެދި، ހިނގަމުން ދިޔަ ނަމަވެސް، މިއިން އެއްވެސް ކަމެއްގެ ސަބަބުން އަޅުގަނޑުމެންގެ ޤައުމީ ވަޙްދަތަށް އެއްވެސް އުނިކަމެއް އައިސްގެނެއް ނުވާނެ.“ އެމަނިކުފާނު ވިދާޅުވިއެވެ.
ރާއްޖޭގައި 30 އަހަރު ވެރިކަން ކުރެއްވި ރައީސް މައުމޫންގެ ވާހަކަފުޅުގައި، ސިޔާސީ ކަންކަމަށްވުރެ ބޮޑަށް، ޤައުމީ ކަންކަމަށް އަބަދުވެސް އިސްކަން ދޭން ޖެހޭނެ ކަމަށް ވިދާޅުވިއެވެ.
ރައީސް މައުމޫން ވިދާޅުވީ، ނޮވެމްބަރު 3ގެ ހަމަލާ ދިން އިރު، މަދު ބަޔަކު ސަރުކާރާ ދެކޮޅަށް ތިބި ނަމަވެސް، ރައްޔިތުން ތިބީ ސަރުކާރާ އެއްކޮޅަށް ކަމަށާއި، ދުޝްމަނުންނަށް އެ ދުވަހު ދިވެހީންގެ ފަރާތުން އެއްބާރުލުމެއް ނުލިބުނު ކަމަށެވެ.