މިދިޔަ މަހު ބޭއްވި ލޯކަލް ކައުންސިލް އިންތިހާބުގައި ކައުންސިލުތަކަށް އަލަށް އިންތިހާބުވި ކައުންސިލަރުން މަގާމުގެ ހުވާކުރުން މި މަހުގެ 17 ގައި ބާއްވަން ލޯކަލް ގަވަރުމަންޓް އޮތޯރިޓީ (އެލްޖީއޭ) އިން މިއަދު ނިންމައިފިއެވެ.ނަމަވެސް ކޮވިޑުގެ މި ހާލަތުގައި އެ ރަސްމިއްޔާތުތައް ބާއްވަން ނިންމާފައިވަނީ އޮންލައިން ކޮށެވެ. އެކަމާ ގުޅޭ އިންތިޒާމުތައް އެލްޖީއޭ އިން އަންނަނީ ހަމަޖައްސަމުންނެވެ.މި ފަހަރުގެ ލޯކަލް ކައުންސިލްތަކުގެ އިންތިހާބުގައި އެންމެ ގިނަ ގޮނޑި ކާމިޔާބުކުރީ ވެރިކަން ކުރާ ކޯލިޝަންގެ މައި ޕާޓީ އެމްޑީޕީ އެވެ. އެ ޕާޓީން 400 ގޮނޑި ހޯދިއިރު، އިދިކޮޅު ޕީޕީއެމަށް ނެގުނީ 325 ގޮނޑި އެވެ.ޖުމްހޫރީ ޕާޓީން 115 މަގާމަށް ވާދަކޮށްގެން 23 ގޮނޑި، އަދާލަތު ޕާޓީން 28 ގޮނޑިއަކަށް ކުރިމަތިލައިގެން 11 މަގާމެއް އަދި އެމްޑީއޭ އިން 20 މަގާމަކަށް ވާދަކޮށްގެން 16 ގޮނޑި ކާމިޔާބުކުރި އެވެ.އަމިއްލަ ގޮތުން 600 ކެންޑިޑޭޓަކު ވާދަކުރިއިރު އޭގެ ތެރޭން ގޮނޑި ކާމިޔާބު ކުރެވުނީ 173 ކެންޑިޑޭޓަކަށެވެ.ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި 3،814 ކެނޑިޑޭޓުން ވާދަކުރިއެވެ. އޭގެ ތެރޭގައި ހިމެނެނީ ލޯކަލް ކައުންސިލް އިންތިޚާބުގައި ވާދަކުރި 2234 ކެނޑިޑޭޓުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރާ 1580 ކެނޑިޑޭޓުންނެވެ. ދެ އިންތިޚާބުގައި 1912 މަޤާމަށް ބޭފުޅުން ވަނީ އިންތިޚާބުކޮށްފައެވެ. މި އިންތިޚާބުގައި ވޯޓު ދިނުމުގެ ހައްގު 2،73،128 މީހަކަށް ލިބިގެންވާއިރު، ވޯޓުލީ 1،86،253 މީހެކެވެ. މިއީ %68.19 އެވެ. މާލޭގައި ވޯޓުލާން ނުކުތީ ޝަރުތު ހަމަވާ މީހުންގެ %39 އެވެ.