ވަރަށް ރީތި ފިލްމުތަކެއް އުފައްދާފައިވާ ކާމިޔާބު ފިލްމު ޑައިރެކްޓަރު އަދި ޕްރޮޑިއުސަރު މަހޭޝް ބަޓްގެ އިރުޝާދާ އެއްގޮތަށް ގެނެސްދޭން ނިންމާފައިވާ ފިލްމެއް އިއުލާނުކޮށްފިއެވެ. ސިދާންތު ސަޗްދޭވް، ސުހްރީތާ ދާސް އަދި ޝްވޭތާ ބޯތުރާ ޕްރޮޑަކްޝަން ޓީމުގައި އިސްކޮށް ހަރަކާތްތެރިވާ މި ފިލްމުގެ ނަމަކީ "ނާމް - ޓު ލިވް އިޒް ވޯ"އެވެ. ލޯބީގެ ރަހަތަކާ އެކު އުފައްދާ މި ވަރުގަދަ އެކްޝަން ތުރިލާގެ ލީޑް ތަރިންނަކީ މިދިޔަ އަހަރު ގެނެސްދިން ފިލްމު "ސްކައި ފޯސް"އިން ފިލްމީ ދާއިރާއަށް ތައާރަފްވި ވީރް ޕަހަރިއާ އާއި ވަރޫން ޝަރުމާއެވެ. މި ފިލްމުގެ އެކްޓަރުންނަކީ ކޮބައިކަން އިއުލާނުކުރި ނަމަވެސް ފިލްމުގައި ބަތަލާގެ ރޯލަށް ގެންނާނީ ކޮން ފަންނާނެއްކަން ހާމައެއް ނުކުރެއެވެ. މަހޭޝްގެ ހާއްސަ ބެލުމުގެ ދަށުން ސްކްރީންޕްލޭ ތައްޔާރުކުރާ "ނާމް"ގެ ނަން މަހޭޝްގެ 1986 ވަނަ އަހަރުގެ ކާމިޔާބު ފިލްމު "ނާމް"އަށް ނިސްބަތްވީ ނަމަވެސް، މިއީ އެ ފިލްމުގެ ރީމޭކެއް ނޫންކަން އުފެއްދުންތެރިން ވަނީ ސާފުކޮށްދީފައެވެ. ވީރް ޕަހަރިޔާގެ ކެރިއަރުގެ ފުރަތަމަ ފިލްމު "ސްކައި ފޯސް"ގެ ޕޯސްޓަރެއް. މަހޭޝް ބަޓްއާ އެކު ވީރް މަސައްކަތްކުރާ ފިލްމު "ނާމް" އަކީ އެކްޓަރުގެ ކެރިއަރުގެ ދެވަނަ ފިލްމު-- ފޮޓޯ/އިންޑިއަންއެކްސްޕްރެސް ފިލްމުގެ ވާހަކަ އަދި ސިއްރުކޮށްފައި އޮތް ނަމަވެސް، ވީރް ޕަހާރިއާ ފެންނާނީ "އެންގްރީ ޔަންގް މޭން"އެއްގެ ގޮތުގައި ކަމަށާއި، ވަރޫން ޝަރުމާ ފެންނާނީ ވިލަންގެ ރޯލުން ކަމަށް އުފެއްދުންތެރިން ބުނެއެވެ. މި ފިލްމުގެ ކާސްޓުންނާ ގުޅޭގޮތުން މަހޭޝް ބުނީ، މި ޒަމާނުގެ ތަރިންނަކީ ފިލްމީ ދާއިރާގެ މައުލޫމާތު މާބޮޑަށް ވެސް ދަންނަ މުއްސަނދި ބައެއް ކަމަށާއި، އެމީހުންގެ މަސައްކަތުގެ ޖޯޝާއި ފޯރި ރަނގަޅު ގޮތުގައި ބޭނުންކޮށްފިނަމަ ވަރަށް ތަފާތު ފިލްމުތަކެއް ސިނަމާއަށް ގެނެސްދެވިދާނެ ކަމަށެވެ. ފިލްމު "ނާމް"ގެ ޑައިރެކްޓަރު ސިދާންތު ސަޗްދޭވް އަކީ މީގެ ކުރިން "އާޝިގީ 2"، "އޭކް ވިލަން" އަދި "ހަމާރީ އަދޫރީ ކަހާނީ" ފަދަ ފިލްމުތަކުގައި އެސިސްޓަންޓް ޑައިރެކްޓަރެއްގެ ގޮތުގައި މަސައްކަތްކޮށް، މަހޭޝް ބަޓް އާއި މޯހިތު ސޫރީއާ އެކު ގިނަ މަސައްކަތްތަކެއް ކޮށްފައިވާ ފަންނާނެކެވެ.