ހިޔާ ފުލެޓްތައް ކުއްޔަށް ދިނުން ހުއްޓުވަން ގާނޫނު އިސްލާހުކުރުމުގެ މަސައްކަތް ކުރަމުން އަންނަ ކަމަށް ހައުސިން މިނިސްޓަރު ޑރ. އަބްދުالله މުއްތަލިބު މިއަދު ވިދާޅުވެއްޖެއެވެ.ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ އެންމެފަހުން ހުޅުމާލެއިން ހަވާލުކުރި 4،000 ފްލެޓްތައް ދީފައިވަނީ ރެންޓް އޯން މޮޑެލްގެ ދަށުން ކަމަށްވާތީ އެހެންވެ އެތަންތަން ކުއްޔަށް ދޭ މީހުންނަށް ފިޔަވަޅު އަޅަން ފަސޭހަ ކަމަށެވެ. އެ ފްލެޓުތަކުގެ އެއްބަސްވުމުގައި ވެސް ކުއްޔަށް ދިނުމަކީ މަނާ ކަމެއް ކަމަށް އޮވެ އެވެ. "އެހެންވީމަ ގާނޫނުން ކަނޑައަޅަން މި އުޅެނީ އެގޮތަށް ކުއްޔަށް ދިނުމަކީ މަނާ ކަމެއް ކަމަށް،" މިނިސްޓަރު ވިދާޅުވިއެވެ.މިދިޔަ އޮކްޓޫބަރު މަހު، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާއި އެފްޑީސީން ވަނީ، ކުއްޔަށް ދޫކޮށްފައިވާ ސޯޝަލް ހައުސިން ފުލެޓްތައް ހޯދުމުގެ މަސައްކަތް ފަށައިފައިވާ ކަމަށް ބުނެފައެވެ.މުއްތަލިބު ވިދާޅުވީ އެޗްޑީސީން އާންމުކޮށް އަންގަމުން ނުދާ ނަމަވެސް، ބިދޭސީންނަށް ލޭބާ ކުއާޓާސްގެ ގޮތުގައި ދީފައިވާ ފުލެޓުތައް ހޯދައި، ނޯޓިސް ދިނުމުގެ މަސައްކަތް އެ ކުންފުނިން ކުރިއަށްގެންދާ ކަމަށެވެ."މި ވަގުތަށް ސަރުކާރުން ދެ ކަމެއް ކުރަނީ، އެއީ އެ ތަންތަނުގައި އުޅޭ ރައްޔިތުންނަށް އުނދަގޫވާ ކަންތައްތައް ހުއްޓުވުން، ދެވަނަ ކަމަކީ ގާނޫނަށް ބަދަލު ގެނެސްގެން ކުއްޔަށް ދިނުމަކީ މަނާ ކަމެއް ކަމަށް ކަނޑައެޅުން،" މުއްތަލިބު ވިދާޅުވިއެވެ.ގާނޫނަށް އިސްލާހު ގެނެސްގެން ހިޔާ ފްލެޓުތައް ކުއްޔަށް ދިނުން ހުއްޓުވުމަށް ސަރުކާރުން މަސައްކަތް ފެށިއިރު، ގާތްގަނޑަކަށް 4000ރ. އަށް ކުލި ކުޑަކޮށްދީފައިވާ އެ ފްލެޓުތައް 20،000ރ. އަށް ކުއްޔަށް ދޫކުރަމުންދާ މައްސަލަ ބޮޑެވެ.