އިނގިރޭސި ޕްރިމިއާ ލީގުގެ ތާވަލުގެ ފުލުގައި އޮތް ވުލްވްސް އަތުން ތާވަލުގެ ފަސްވަނައިގައި އޮތް ލިވަޕޫލް ހިތި ގޮތަކަށް ބަލިވެއްޖެއެވެ. އެންމެފަހުގެ ޗެމްޕިއަން ލިވަޕޫލުން ރަށުންބޭރުގައި ކުޅުނު މި މެޗުން ބަލިވީ 2-1 ގެ ނަތީޖާއަކުންނެވެ. މެޗުގައި ގިނަވަގުތު ބޯޅަ ހިފަހައްޓައިގެން މޮޅު ކުޅުމެއް ލިވަޕޫލުން ދެއްކި ނަމަވެސް ނިންމާލުމުގައި އެޓީމަށް މައްސަލަތަކާ ކުރިމަތިލާން ޖެހުނެވެ. އެގޮތުން އެ ޓީމަށް މި މެޗުގައި ލިބުނު ފުރުސަތުތައް ފާހަގަކޮށްލެވެއެވެ. ދެ ޓީމުންވެސް ފުރަތަމަ ހާފު ނިންމާލީ އެއްވެސް ލަނޑެއް ނުޖެހިއެވެ. މެޗުގައި ފުރަތަމަ ލަނޑުޖެހީ ވުލްވްސްއެވެ. މިއީ މެޗުގެ 78 ވަނަ މިނެޓުގައި ރޮޑްރިގޯ ގޮމޭޒް ކާމިޔާބުކުރި ލަނޑެކެވެ. މި ލަނޑު ޖެހިތާ ފަސް މިނެޓުފަހުން މުޙައްމަދު ސަލާހް ވަނީ ލަނޑެއްޖަހާ ނަތީޖާ ހަމަހަމަކޮށްފައެވެ. މެޗުން ވުލްވްސް މޮޅުވި ލަނޑު އިތުރުވަގުތުގައި އެޓީމަށް ކާމިޔާބުކޮށްދިނީ އަންދްރޭއެވެ. މިއީ މި ސީޒަނުގައި ވުލްވްސްގެ ތިންވަނަ މޮޅެވެ. އެންމެފަހުން ކުޅުނު ދެ މެޗުންވެސް އެޓީމު ވަނީ މޮޅުވެފައެވެ. މި ބައްޔާއެކު ލިވަޕޫލް އޮތީ ކުޅުނު 29 މެޗުން ލިބުނު 48 ޕޮއިންޓާއެކު ފަސްވަނައިގައެވެ. މެޗުން މޮޅުވި ނަމަވެސް ވުލްވްސް އަދިވެސް އޮތީ ފުލުގައެވެ. އެއީ 30 މެޗުން 16 ޕޮއިންޓާއެކުއެވެ.