އީރާނުގެ މަނަވަރެއް ކަމަށްވާ 'އައިރިސް ޑެނާ'ގައި އެއްޗެއް ގޮވައި ސްރީ ލަންކާގެ ދެކުނު އައްސޭރި ފަށުގައި އޮންނަ ގައްލޭގެ ކަނޑުގެ ސަރަހައްދާ ކައިރިއަށް ފެތުމާ ގުޅިގެން ލަންކާގެ ކަނޑުގެ ސިފައިންނާއި ވައިގެ ސިފައިން ގުޅިގެން އެ އުޅަނދުގައި ތިބި މީހުން ސަލާމަތްކޮށްފިއެވެ. ލަންކާގެ ޚާރިޖީ ވަޒީރު ވިޖިތާ ހެރަތު ވިދާޅުވީ، 180 ފަޅުވެރިންގެ ޖާގައިގެ އެ ބޯޓުގައި ވަރަށް ބޮޑަށް ޒަޚަމްވެފައިވާ 32 މީހުން ސަލާމަތްކޮށްފައިވާ ކަމަށެވެ. އަދި އެ މީހުން ލަންކާގެ ދެކުނުގެ ސަރަހައްދުގައި ހުރި ކަރަޕަތިޔާ ހޮސްޕިޓަލަކަށް ގެންގޮސްފައިވާ ކަމަށް އޭނާ ވިދާޅުވިއެވެ. އެ ހާދިސާ ހިނގީ ލަންކާ ސަރަހައްދުގެ ކަނޑުގައި ކަމުން ލަންކާ ކަނޑުގެ ސިފައިންނާއި ވައިގެ ސިފައިންގެ ފަރާތުން ވަގުތުން އެކަމަށް އިޖާބަދީފައިވާ ކަމަށް ކަނޑުގެ ސިފައިންގެ އޮފިޝަލަކާ ހަވާލާދީ ލަންކާގެ ނޫހެއް ކަމަށްވާ ޑެއިލީ މިރާއިން ރިޕޯޓުކޮށްފައިވެއެވެ. ލަންކާގެ ދިފާއީ ވުޒާރާއިން ބުނީ މަނަވަރުގައި ދެން ތިބި ފަޅުވެރިން ހޯދުމުގެ މަސައްކަތް ކުރަމުން އަންނަ ކަމަށާއި އެ އުޅަނދު އަޑިއަށް ދިޔައީ ލަންކާގެ ދެކުނުން 40 ކިލޯމީޓަރު (25 މޭލު) ބޭރަށް ކަމަށެވެ. އައިރިސް ޑެނާ އަކީ އީރާނުގެ ކަނޑުގެ ސިފައިންގެ ދެކުނު ފްލީޓްގައި ޚިދުމަތްދޭ މޫޖް ކްލާހުގެ ފްރިގޭޓެކެވެ. މި ހާދިސާ ހިނގުމުގެ ކުރިން އިންޑިއާގެ ވިސާކަޕަޓްނަމްގައި ބޭއްވި މިލާން 2026 މަލްޓިނޭޝަނަލް ނޭވަލް އެކްސަސައިޒް އަދި ފްލީޓް ރިވިއުގައި އެ މަނަވަރު ވަނީ ބައިވެރިވެފައެވެ. ލަންކާ މަޖިލީހުގެ އިދިކޮޅު މެންބަރަކު ވަނީ މިއީ އީރާނާ ދެކޮޅަށް އެމެރިކާއާއި އިސްރާއީލުން ދެމުން ގެންދާ ހަމަލާތަކުގައި ބޮން އަޅައި ފައްތާލި މަނަވަރެއްތޯ ސުވާލުކުރައްވާފައެވެ. ނަމަވެސް އެ ސުވާލަށް ލަންކާ ސަރުކާރުން ޖަވާބެއް ނުދެއެވެ. އެމެރިކާއާއި އިސްރާއީލު ގުޅިގެން އީރާނަށް ހަމަލާ ދެމުން އަންނައިރު، އީރާނުންވެސް އަންނަނީ ރައްދުގައި ވަރުގަދަ ހަމަލާތަކެއް ދެމުންނެވެ.