އެންޓި ސްކޭމް ސެންޓަރުން ތަހުގީގު ކުރަމުންދާ މައްސަލައެއްގެ ތަހުގީގަށް ސުވާލުކުރުމަށްޓަކައި، ފުލުހުން ފޮޓޯއާއެކު އާއްމުކުރި ތ. ހިރިލަންދޫ އަންހެން މީހާ ހައްޔަރުކޮށްފިއެވެ. ސްކޭމް މައްސަލައެއްގެ ތަހުގީގަށް ހާޒިރުކުރަން ބޭނުންވެގެން ފުލުހުން ފޮޓޯއާއެކު އާއްމުކޮށް ހޯދަން އިއުލާން ކުރީ ތ. ހިރިލަންދޫ، ނާގަލި، ޢާއިޝަތު ނާޛިރާ (41އ) އެވެ. އޭނާ ހައްޔަރުކޮށް ކޯޓަށް ހާޒިރު ކުރުމުން މި މަހުގެ 19 ވަނަ ދުވަހާއި ހަމައަށް އޭނާ ބަންދުކޮށްފައި ބެހެއްޓުމަށް ކްރިމިނަލް ކޯޓުން ވަނީ އަމުރުކޮށްފައެވެ. https://sun.mv/218637 ފުލުހުން މި އަންހެން މީހާ ހޯދަން އިއުލާނުކުރީ، އޭނާ އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމުގެ ޗިޓު ރައްދުކުރެވިފައި ނުވާތީއެވެ. ފުލުހުންގެ އިދާރާއިން ހާމަކުރި ގޮތުގައި، ޢާއިޝަތު ނާޛިރާ ހާޒިރުކުރީ ސްކޭމްގެ މައްސަލައެއްގެ ތަހުގީގުގައި ތުހުމަތުކުރެވޭ ފަރާތެއްގެ ހައިސިއްޔަތުން ސުވާލުކުރުމަށެވެ. އޭނާގެ ބަންދު އަމުރުގައި ބުނެފައިވާ ގޮތުން މަކަރާއި ހީލަތުން ފައިސާ ހޯދާފައިވާ 14 މައްސަލައެއްގެ ތުހުމަތު މި އަންހެން މީހާގެ މައްޗަށް ކުރެވެއެވެ. އޭނާ ބަންދު ކުރަން ނިންމި މަޖިލީހުގައި، އޭނާ ވަނީ އޭނާއަކީ ބަލި މީހެއް ކަމަށް ބުނެފައެވެ. އަދި ވަކީލެއްގެ ފުރުސަތު ދިނުމަށް އޭނާ އެދިފައިވެއެވެ. އޭނާ ވަކީލަކު އައްޔަންކޮށްފިނަމަ ބަންދު އަމުރު މުރާޖައާ ކުރާނެ ކަމަށް ބަންދު އަމުރުގައި ގާޒީ މުޒައްމިލް ނާސިރު ވިދާޅުވެފައިވެއެވެ. ސްކޭމް ކުރުމަށްފަހު ފިލައިގެން އުޅުމުގެ މައްސަލަތައް ރާއްޖޭގައި ވަރަށް އާންމެވެ. ގިނައިން މިފަދައިން ކަން ކުރަނީ އޮންލައިންކޮށް އެކި ސްކޭމްތައް ކުރުމަށްފަހުގައެވެ. ސްކޭމްތަކުގައި ގިނަ އަދަދެއްގެ ދިވެހީން ޖެހޭއިރު، މިފަދަ ކަންކަމުގައި ގެއްލޭ މުދަލާއި ފައިސާ ހޯދަން ދިގު މުއްދަތެއް ނަގާއިރު ގިނަފަހަރު ނުހޯދި ވެސް އެކީގައި ގެއްލެއެވެ.