ސްރީ ލަންކާގެ ދެކުނު އައްސޭރިފަށަށް އަޑިއަށްދިޔަ އީރާނުގެ ހަނގުރާމަމަތީ މަނަވަރަކުން، ސީރިއަސް އަނިޔާތަކެއް ލިބިފައިވާ 32 ފަޅުވެރިއަކު ސަލާމަތްކޮށްފައިވާ ކަމަށް ލަންކާގެ ކަމާބެހޭ އިދާރާތަކުން މިއަދު ބުނެފި އެވެ.
ލަންކާގެ ފޮރިން މިނިސްޓަރު ވިޖިތަ ހޭރަތު މަޖިލީހުގައި ވިދާޅުވީ، އީރާނުގެ އައިއާރުއައިއެސް ދޭނާ ނަމަކަށް ކިޔާ މަނަވަރު، ލަންކާގެ ދެކުނުން ގާތްގަނޑަކަށް 40 ކިލޯމީޓަރު ބޭރަށް އަޑިއަށް ދިޔުމުގެ ކުރިން ފަތިހުގެ ވަގުތެއްގައި އެހީއަށް އެދި ސިގްނަލް ފޮނުވާފައިވާ ކަމަށެވެ. މި ހާދިސާގައި ސަލާމަތްކުރި ފަޅުވެރިންނަށް މިހާރު ދަނީ ގޯލްގެ ހޮސްޕިޓަލުގައި ފަރުވާ ދެމުންނެވެ.
ލަންކާގެ ޑިފެންސް މިނިސްޓްރީން ބުނި ގޮތުގައި، އެ މަނަވަރުގައި ޖުމްލަ 180އެއްހާ ފަޅުވެރިން ތިއްބެވެ. ބާކީ ތިބި މީހުން ހޯދުމުގެ މަސައްކަތް އަދިވެސް ދަނީ ހުއްޓުމެއްނެތި ކުރަމުންނެވެ.
"އަޅުގަނޑުމެން ދަނީ މީހުން ހޯދުމުގެ މަސައްކަތް ކުރަމުން، ނަމަވެސް ބާކީ ތިބި ފަޅުވެރިންނަށް ވީ ގޮތެއް އަދި ސާފެއް ނުވޭ،" އޮފިޝަލަކު ވިދާޅުވި އެވެ.
މި ހަރަކާތުގައި ލަންކާގެ ކަނޑުގެ ސިފައިންގެ ދެ އުޅަނދަކާއި މަތިންދާބޯޓެއް ބޭނުންކޮށްފައިވެ
އެވެ. ކަނޑުގެ ސިފައިންގެ ތަރުޖަމާނު ބުއްދިކާ ސަމްޕަތު ވިދާޅުވީ، މިއީ ބައިނަލްއަގުވާމީ ކަނޑުގެ ގާނޫނުތަކުގެ ދަށުން ލަންކާގެ ސާޗު އެންޑް ރެސްކިއު ސަރަހައްދުގެ ތެރޭގައި ހިނގި ހާދިސާއަކަށް ވާތީ، އެހީތެރިކަން ފޯރުކޮށްދިނުމުގެ ބައިނަލްއަގުވާމީ ޒިންމާގެ ދަށުން ކުރިއަށްގެންދިޔަ އޮޕަރޭޝަނެއް ކަމަށެވެ.
އީރާނުގެ މި މަނަވަރު އަޑިއަށް ދިޔުމަށް މެދުވެރިވި ގޮވުމުގެ އަސްލު ސަބަބު ކަމާ ބެހޭ އިދާރާތަކުން އަދި ކަށަވަރުކޮށްދީފައެއް ނުވެ އެވެ. ނަމަވެސް، މި ހާދިސާ ހިނގާފައި މިވަނީ އެމެރިކާ އާއި އިޒްރޭލުން އީރާނަށް ދެމުންދާ ހަމަލާތަކާ ގުޅިގެން ސަރަހައްދީ ނުތަނަވަސްކަން އިންތިހާއަށް ބޮޑުވެފައިވާ ދަނޑިވަޅެއްގަ އެވެ.