މަހާސިންތާގެ ދައުވަތަށް ފުރަގަސް ދެއްވައި މައުމޫން މެލޭޝިޔާއަށް

މެޑަމް ފާތިމަތު އިބްރާހިމް އިސްނަގަވައިގެން ބާއްވާ، ރައީސް އަބްދުﷲ ޔާމީން 2018 ގެ ރިޔާސީ ކެމްޕޭން ލީޑަރުން ތަމްރީން ކުރުމުގެ މަހާސިންތާއަށް ދައުވަތު ދެއްވާފައި ވަނިކޮށް، ޕީޕީއެމްގެ ރައީސް މައުމޫން އަބްދުލް ގައްޔޫމް ރާއްޖެ އިން ބޭރަށް ފުރާވަޑައިގަންނަވަން ނިންމަވައިފި އެވެ.
މި މަހުގެ ތިނަކުން ފަހަކަށް ބޭއްވި މަހާސިންތާގެ ފުރަތަމަ ބުރު އިފްތިތާހު ކޮށްދެއްވުމަށް މައުމޫންއަށް ދައުވަތު ދެއްވި ނަމަވެސް، އެ ދައުވަތު ވަނީ ގަބޫލު ނުކުރައްވައިފަ އެވެ. މައުމޫންގެ އޮފީހުން ބުނެފައި ވަނީ މައުމޫންއަށް އެ ޖަލްސާ ޝަރަފުވެރި ކޮށްދެއްވުމަށް ވަޑައިގަތުމަށް އުޒުރުވެރިވާ ކަމަށެވެ.
ނައިބު ރައީސް އަހުމަދު އަދީބު ސޮއި ކުރައްވައި މައުމޫންއަށް ދެ ވަނަ ބުރަށް ދައުވަތު ދެއްވި ނަމަވެސް، އަވަސް އަށް ކަށަވަރުވެފައިވާ ގޮތުގައި މައުމޫން މިއަދުގެ ވަގުތެއްގައި އަމިއްލަ ދަތުރުފުޅެއްގައި މެލޭޝިޔާއަށް ފުރާވަޑައިގަންނަވާނެ އެވެ. އެ ދަތުރުފުޅަކީ ގާތްގަނޑަކަށް ހަފްތާއެއްހާ ދުވަހުގެ ދަތުރުފުޅެއް ކަމަށް އެނގިފައިވެ އެވެ. އަދި މައުމޫން އެ ދަތުރުފުޅު ޕްލޭން ކުރެއްވީ މަހާސިންތާގެ ދައުވަތު ލިބިވަޑައިގަތް ފަހުން ކަމަށް ވެސް އެނގިފައިވެ އެވެ. އެހެން ނަމަވެސް އެކަމާ ގުޅޭ ގޮތުން މައުމޫންގެ އޮފީހުން ވެސް އަދި ޕީޕީއެމް އިން ވެސް ވަކި އެއްޗެއް ނުބުނެ އެވެ.
މަހާސިންތާ އިންތިޒާމް ކުރާ މެޑަމް ކެމްޕޭން އޮފީހުން ބުނާ ގޮތުގައި ކެމްޕޭން ލީޑަރުން ތަމްރީން ކުރުމުގެ މުހިންމު މަހާސިންތާއެއްގައި މައުމޫން ފަދަ ދުވަސްވީ ސިޔާސީ ތަޖުރިބާކާރެއް ބައިވެރިވެ ވަޑައިގަތުމަކީ މެޑަމް ވަރަށް ބޮޑަށް ބޭނުންފުޅުވާ ކަމެކެވެ.
މަހާސިންތާގެ މައްސަލަ ޕާޓީގެ ތެރޭގައި ބޮޑުވީ 2018 ގެ ޕީޕީއެމްގެ ކެންޑިޑޭޓް ކަނޑައަޅާފައި ނުވަނިސް، ޕާޓީތަކުގެ ގޮފިތަކުގެ މެންބަރުން މާލެ ގެނެސްގެން އެފަދަ މަހާސިންތާއެއް ނުބޭއްވޭނެ ކަމަށް މައުމޫން ވަކާލާތު ކުރެއްވުމުންނެވެ. އަދި މީގެ އިތުރުން ޕާޓީގެ އެންމެ އިސް މަގާމުތައް ފުރުއްވާ ބޭފުޅަކީ 65 އަހަރަށް ވުރެ ހަގު އުމުރުގެ ބޭފުޅެއް ކަމަށް ހެދުމަށް ސިޔާސީ ޕާޓީތަކުގެ ގާނޫނަށް ހުށަހަޅާފައިވާ އިސްލާހަށް ޕީޕީއެމްގެ މަޖިލީހުގެ ބައެއް މެންބަރުން ތާއީދު ކުރެއްވުމުން ވެސް އެކަމުގައި ވަނީ ނުތަނަވަސްކަމެއް އުފެދިފަ އެވެ.
އެ މައްސަލަ ގަނޑު ހޫނުވެ، މި ސަރުކާރުގައި ތިއްބެވި ރައީސް މައުމޫނަށް ތާއީދު ކުރާ ފަރާތްތަކުގެ މަގާމުތައް ދަށްކޮށްފައިވެ އެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ