ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ސަރުކާރުން އިސްލާހު ހުށަހެޅުމުގެ ކުރިން ރައްޔިތުން ބޭނުންވާ ގޮތް ސަރުކާރުން ބަލަންޖެހޭ ކަމަށާއި ގާނޫނު އިސްލާހު ކުރުމުގެ ވާހަކަތައް ދައްކަންވާނީ އޭގެ ފަހުން ކަމަށް އިދިކޮޅު ޑީއާރުޕީން ބުނެފި އެވެ.
މީހުން ދިރިއުޅޭ ރަށްރަށް ކައުންސިލްތަކުގެ އިންތިހާބުގެ ކުރިން ކަނޑައަޅައި ސަރުކާރުގެ ގެޒެޓުގައި ޝާއިއުކުރަން ވާނެ ކަމަށް އެ ގާނޫނުގައި ބުނެފައިވާއިރު ސަރުކާރާއި ޑީއާރުޕީން އެކަމަށްޓަކައި މިހާރު ފަށާފައިވާ މަޝްވަރާތަކުގައި އެ ޕާޓީ ތަމްސީލު ކުރައްވާ ޑެޕިއުޓީ ލީޑަރު އިބްރާހިމް ޝަރީފު އިއްޔެ "ހަވީރަ"ށް ވިދާޅުވީ ސަރުކާރުން ހުށަހަޅާ ގިނަ އިސްލާހުތައް ޑީއާރުޕީ އަށް ބަލައިނުގަނެވޭނެ ކަމަށެވެ. އެހެން ނަމަވެސް ގާނޫނަށް ގެންނަން ސަރުކާރުން ހުށަހަޅާފައިވާ އިސްލާހުތަކާ މެދު ޑީއާރުޕީ އަށް ގޮތެއް ނިންމޭނީ އެ ޕާޓީގެ ޕާލިމެންޓްރީ ގުރޫޕުން ނިންމާ ގޮތެއްގެ މައްޗަށް ކަމަށް ޝަރީފު ފާހަގަކުރެއްވި އެވެ.
މިދިޔަ ހަފުތާގައި ބޭއްވި މަޝްވަރާތަކުގައި ލާމަރުކަޒީ ގާނޫނަށް ގެންނަން ސަރުކާރުން ހުށަހެޅި އިސްލާހުތަކުގެ ތެރޭގައި ހިމެނެނީ 25،000 މީހުންގެ އާބާދީގެ ބަދަލުގައި 10،000 މީހުންގެ އާބާދީ ހިމެނޭ ރަށްރަށުގައި ސިޓީ ކައުންސިލްތައް އުފެއްދުމާއި ހަތަރު ނޯޓިކަލް މޭލުތެރޭގައި ހުރި ރަށްރަށް އިދާރީ ގޮތުން ގުޅުވާލުމާއި ކައުންސިލްތަކަށް މެމްބަރުން ހޮވުމުގައި ބަލާ ނިސްބަތަށް ބަދަލު ގެނައުމަށެވެ.
"މީގެ ތެރެއިން ގިނަ އިސްލާހުތަކެއް އަޅުގަނޑުމެންނަށް ބަލައެއްނުގަނެވޭ. އެ މީހުން [ސަރުކާރުން] އުޅެނީ ގާނޫނަށް އިސްލާހު ގެނެސް ރައްޔިތުންގެ ވޯޓަކަށް ނުގޮސް މިކަން ނިންމަން. އެއީ އަޅުގަނޑުމެން ބޭނުންވާނެ ގޮތެއް ނޫން،" އޭނާ ވިދާޅުވި އެވެ. "ރައްޔިތުން ނިންމީ އެ މީހުންނަށް ކިތަންމެ ދެރަ ގޮތަކަށް ވިޔަސް އެކަން އަޅުގަނޑުމެން ގަބޫލުކުރާނަން. ހަތަރު ނޯޓިކަލްގައި ހިމެނޭ ހުރިހާ ރަށްރަށުގެ މީހުން ވެސް ތިމާމެންނަކީ [އިދާރީ ގޮތުން] އެއް ރަށެކޭ ބުންޏަސް އަޅުގަނޑުމެން އެކަން ގަބޫލު ކުރާނަން. ގާނޫނު އިސްލާހުކުރަން ރައްޔިތުން ބޭނުންތޯ ފުރަތަމަ ރައްޔިތުން ކައިރީގައި އަހާށޭ އަޅުގަނޑުމެން މި ބުނަނީ. މިސާލަކަށް އައްޑު އަތޮޅު ރައްޔިތުން ބުނަންވީ އެއީ ސިޓީއެކޭ. އެކަމާ އަޅުގަނޑުމެންގެ މައްސަލައެއް ނެތް."
ޝަރީފު ވިދާޅުވީ ގިނަ ސިޓީ ކައުންސިލްތައް ހަދަން ސަރުކާރުން ބޭނުންވާއިރު އަތޮޅު ކައުންސިލްތަކާއި ސިޓީ ކައުންސިލްތަކާ ދެމެދު އެއްވެސް ފަރަގެއް އޮތް ކަމަށް ދެކެވަޑައިނުގަންނަވާ ކަމަށެވެ. އަދި ވިދާޅުވީ އަތޮޅުގައި އޮންނަ ރަށެއް އެއީ ސިޓީ ކައުންސިލެއް ކަމަށް ކަނޑައަޅައިފި ނަމަ އެ ރަށެއް އެ އަތޮޅަކުން ވަކިވާނެ ކަމަށް ވެސް ޝަރީފު ވިދާޅުވި އެވެ. އަދި ސިޓީ ކައުންސިލްތައް އުފެއްދުމުން ރަށު ކައުންސިލްތައް މަދުވާނެ ކަމަށާއި ސަރުކާރުން ބޭނުންވަނީ ގިނަ ބަޔަކަށް މުސާރަ ދޭން ޖެހިދާނެތީ އެ ގޮތް ކަމަށް ވެސް އޭނާ ވިދާޅުވި އެވެ.
"މާލޭގައި ސިޓީ ކައުންސިލެއް ހަދަން ޖެހުނީ މާލެ އަތޮޅުން މާލެ ބާކީ ކުރުމަށްޓަކައި. މާލެއަކީ ރާއްޖޭގެ ވެރިރަށް ކަމަށް ވުމުން ޒަމާނުއްސުރެ މާލެ އޮތީ މާލެ އަތޮޅުން ބޭރުކޮށްފައި. އެހެންވީމަ ސުވާލަކީ މިސާލަކަށް ކުޅުދުއްފުއްޓަކީ ހދ. އަތޮޅުގެ ވެރިކަން ކުރާ ރަށް ކަމުގައި އޮތް އޮތުން ބަދަލުކުރަންވީތޯ؟،" ޝަރީފު ވިދާޅުވި އެވެ. "ސަރުކާރުން މި އުޅެނީ ކައުންސިލްތައް ވީހާ ވެސް ބޮޑަކަށް މަދުކޮށްގެން މުސާރަ ދޭންޖެހޭ މީހުންގެ އަދަދު މަދުކުރަން. އެހެން ނަމަވެސް މިހާރު ގާނޫނު ހަދާފައި އެ އޮތީ ރާއްޖޭގެ ޖިއޮގްރަފިކަލް ރިއަލިޓީ އަށް ބަލައިގެން."
ޝަރީފު އަދި ވިދާޅުވީ ސިޓީ ކައުންސިލްތަކަށް މެމްބަރުން އިންތިހާބުގައި ބަލާ މިންގަނޑަކީ ކޮންމެ 5،000 މީހަކަށް އެކަކު ކަމުގައިވާއިރު ސަރުކާރުން މަސައްކަތް ކުރަނީ އެ ނިސްބަތް ދަށްކޮށްގެން މާލޭގެ ސިޓީ ކައުންސިލްތަކުގެ މެމްބަރުންގެ އަދަދު އިތުރު ކުރަން ކަމަށެވެ.
"ސަރުކާރުން މި ބަލަނީ މާލޭގެ ކައުންސިލްގައި މީހުން ގިނަވާނެ ގޮތެއް. މިހާރު 21 މީހުން [މާލޭ ސިޓީ ކައުންސިލްގައި ތިބޭ] ނަމަ އާބާދީގެ ނިސްބަތް 2،500 އަށް ދަށްކުރުމުން މާލެ އަށް 22 މީހުން ހަމަވާނެ،" ޝަރީފު ވިދާޅުވި އެވެ.
އާބާދީގައި 10،000 މީހުންގެ ހިމެނޭ ރަށްރަށުގައި ސިޓީ ކައުންސިލްތައް އުފެއްދުމަށް ގާނޫނަށް އިސްލާހު ގެނައުމުން ސަރުކާރުން ބުނެފައި ވަނީ މާލެއާއެކު ހަތަރު ސަރަހައްދެއްގައި ސިޓީ ކައުންސިލްތައް އުފެދޭނެ ކަމަށެވެ. އެއީ ކުޅުއްފުއްޓާއި ފުވައްމުލައް އަދި އައްޑު އަތޮޅުގަ އެވެ.
ސަރުކާރުން ބުނެފައި ވަނީ އިދާރީ ގޮތުން އަތޮޅުތައް އެއްކޮށްލާނީ ރައްޔިތުންގެ ރެފަރެންޑަމަކަށް ގޮސްގެން ކަމަށެވެ. އަދި ލާމަރުކަޒީ ގާނޫނުގައި ވެސް ބުނެފައި ވަނީ "މި ގާނޫނަށް އަމަލުކުރަން ފަށާއިރު ދިވެހިރާއްޖޭގެ އިދާރީ ދާއިރާތަކުގައި މީހުން ދިރިއުޅޭ ރަށްތަކުގެ ތެރެއިން ރަށެއްގެ ނުވަތަ ރަށްތަކެއްގެ ރަށްވެހީން، ސަރުކާރުން ކަނޑައަޅާ އާބާދީ އެއްފަސްކުރުމުގެ ސިޔާސަތުގެ ދަށުން، އެހެން ރަށަކަށް ބަދަލުކުރުމުގެ އިހުތިޔާރު ސަރުކާރަށް ލިބިގެންވެ އެވެ. ނަމަވެސް މީހުން ދިރިއުޅޭ ރަށެއްގެ ރަށްވެހީން މިފަދަ ގޮތަކަށް އެހެން ރަށަކަށް ބަދަލު ކުރެވޭނީ އެ ރަށެއްގެ ރައްޔިތުންގެ އަޣުލަބިއްޔަތު އެ ގޮތަށް ބޭނުންވާނަމަ އެވެ،" މިހެންނެވެ.