ރައްޔިތުންގެ މަޖިލީހުގެ އަލިފުށީ ދާއިރާގެ މެންބަރު މުހައްމަދު ނާޝިޒު އާއި މެދު ހެންވޭރު ދާއިރާގެ މެންބަރު އަލީ އާޒިމް މާދަމާ ސިވިލް ކޯޓަށް ހާޒިރުވުމަށް އެ ކޯޓުން ޗިޓް ފޮނުވައިފި އެވެ.
އާޒިމާއި ނާޝިޒް ކޯޓަށް ހާޒިރު ކުރަން އަމުރު ކުރީ އެ ދެ ބޭފުޅުން ގެރެންޓީ ދީގެން ފުނައްޑޫ ޓޫނާ ޕްރޮޑަކްޓްސްގެ ފަރާތުން ބީއެމްއެލް އިން ނަގާފައިވާ ލޯނުތަކަކަށް ދައްކަން ސިވިލް ކޯޓުން ހުކުމްކޮށްފައިވާ 117 މިލިއަން ރުފިޔާ ހުކުމް ތަންފީޒު ކުރުމުގެ މައްސަލައިގަ އެވެ.
އެ މައްސަލައިގެ ޝަރީއަތަށް މާދަމާ މެންދުރު 45: 2 އަށް ސިވިލް ކޯޓަށް ހާޒިރުވުމަށް އާޒިމްއަށާއި ނާޝިޒަށް  ޗިޓް ފޮނުވާފައިވާކަން ސިވިލް ކޯޓުން ވެސް ކަށަވަރުކޮށްދެ އެވެ.
އެ މައްސަލައިގެ ޝަރީއަތަށް އާޒިމާއި ނާޝިޒް ބަންދުގައި ބަހައްޓައިގެން ކޯޓަށް ހާޒިރުކުރުމަށް ފުލުހުންގެ މައްޗަށް ސިވިލް ކޯޓުން އަމުރު ވެސް ނެރުނެވެ. ނަމަވެސް ފަހުން އެ އަމުރު ވަނީ ބާތިލްކޮށްފަ އެވެ.
މި ދެ ބޭފުޅުން ހިމެނެނީ ފުނައްޑޫ އަށް ނަގާފައިވާ ލޯނުތަކަށް ގެރެންޓީ ދެއްވާފައިވާ ބޭފުޅުންގެ ތެރޭގަ އެވެ. މި ބޭފުޅުންގެ އިތުރުން ކޯޓުގެ ހުކުމް ރައްދުވަނީ މ.ރަފީގުގޭ އަހްމަދު ރަޝީދާއި ރީތި ބީޗް ޕްރައިވެޓް ލިމިޓާއި ކަނބާލިފަރު އިންވެސްޓްމަންޓަށެވެ.
ފުނައްޑޫ އަށް ބީއެމްއެލް އިން ފަސް ލޯނެއް ދޫކޮށްފައިވެ އެވެ. އެއީ 35،980،000ރ. ގެ ޑިމާންޑް ލޯނަކާއި 3،500،000 ޑޮލަރުގެ ޑިމާންޑް ލޯނަކާއި 10،280،000ރ. ގެ އޯވަޑްރާފްޓް ފެސިލިޓީއަކާއި 12،000،000ރ. ގެ އޯވަޑްރާފްޓް ފެސިލިޓީއަކާއި 1،200،000 ޑޮލަރުގެ އޯވަޑްރާފްޓް ފެސިލިޓީއެކެވެ.
ނާޝިޒާއި އާޒިމް ސިވިލްކޯޓަށް ހާޒިރުކުރުމަށް ކޯޓުން މި އަމަރުނެރެފައިމިވަނީ، ބޭންކް އޮފް މޯލްޑިވްސްއިން ނަގާފައިވާ ލޯން ތަކެއް ދެއްކުމަށް ސިވިލްކޯޓުން ކޮށްފައިވާ ހުކުމާއި އެއްގޮތަށް ނާޝިޒާއި އަލީ އާޒިމް އެލޯންތައް ދައްކަމުން ނުދާތީ، އެހުކުމް ތަންފީޒް ކޮށްދިނުމަށް ބޭންކް އޮފް މޯލްޑިވްސްއިން ސިވިލްކޯޓަށް މައްސަލަ ހުށައެޅުމާއި ގުޅިގެންނެވެ.
ނާޝިޒާއި އަލީ އާޒިމް ކޯޓަށް ހާޒިރުވުމަށް ސިވިލްކޯޓުން އަމަރު ނެރެފައިވާއިރު، ނިމިގެންދިޔަ ބޭންކް އޮފް މޯލްޑިވްސްގެ އަހަރީ އާއްމު ޖަލްސާގައި ބީއެމްއެލްގެ ޗެއަރމަންވަނީ ކުރިއަށްއޮތްތަނުގައި ސިވިލްކޯޓުން ކޮށްފައިވާ އެކި ހުކުމްތައް ތަންފީޒްކުރުމަށް ވަރަށް އަވަހަށް ކޯޓަށް އެފަދަ މައްސަލަތައް ހުށައަޅާނޭކަމަށް ވިދާޅުވެފައެވެ.
ސިވިލް ކޯޓުން ފެބްރުއަރީ 7، 2010 ގައި ކުރި ހުކުމުގައި ވަނީ އެ ދުވަހުން ފެށިގެން އެއް އަހަރު ދުވަހުގެ ތެރޭގައި، އެ މަހަކު ދައްކަން ޖެހޭ މިންވަރެއް ކޮންމެ މަހަކު ބީއެމްއެލް އަށް ދައްކަމުން ގޮސް ހަލާސްކުރުމަށް، ދައުވާ ލިބޭ ފަރާތްތަކުގެ މައްޗަށް ހުކުމްކުރާ ކަމަށެވެ. މި ހުކުމާ މެދު ހިތްހަމަނުޖެހިގެން ހައި ކޯޓުގައި އިސްތިއުނާފުކުރުމާ ގުޅިގެން މިދިޔަ ފެބްރުއަރީ 27 ގައި ކުރި ހުކުމުގައި ވަނީ ދަށު ކޯޓުން ކުރި ހުކުމަށް ތާއީދުކޮށްފަ އެވެ.
ގާނޫނު އަސާސީގެ 73 ވަނަ މާއްދާގެ (ނ) ގައި ބުނާ ގޮތުން އަދާކުރަން ޖެހޭ ސާބިތު ދަރަންޏެއް އޮތް މީހަކު އެ ހުކުމާ އެއްގޮތަށް އެ ދަރަނި އަދާކުރަމުން ނުދާ ނަމަ އެ މީހެއްގެ މެންބަރުކަން ގެއްލޭނެ އެވެ.