ތިބާއަށް ތިއަ ފެންނަނީ ކައިވެނީގެ ލިޔުމެވެ. ކައިވެނިކޮށްދިން މީހާ ސޮއިކޮށް ތައްގަނޑުޖަހާފައި ދޭ ލިޔުމެވެ. ބަލަ އެއަށްވުރެ މާ މުހިންމު ލިޔުމެއްވެއެވެ. އެއީ ތިބާއަށް ދުނިޔޭގައި ފެންނާނެވެސް ލިޔުމެއް ނޫނެވެ. ބިރުވެތިވާންވީ އެލިޔުމަށެވެ. އެލިޔުން ތިބާއަށް ދައްކަވައި ސުވާލުކުރައްވަވާނެ ވަޤުތަށެވެ. މިކިޔައިދެނީ އެކަން ހިނގާ ސަބަބާއި ހިނގާ ގޮތެވެ.
އިސްލާމް ދީނުގައި ކައިވެނި ކުރުމަކީ ވަރަށް ފަސޭހަ ކަމެކެވެ. ހަމައެފަދައިން ވަރިކުރުމަކީ ވެސް އެހައި ފަސޭހަކަމެކެވެ. ކައިވެނިކުރުމާއި ވަރިކުރުމަކީ އެހައި ފަސޭހަ ކަމެއްގެ ގޮތުގައި ލައްވަވާފައިވަނީ 3 އިރު ހެދުން ބަދަލުކުރާ ފަދައިން އިނދެ ވަރިކުރާކަށް ނޫނެވެ. ފަސޭހައިން ކައިވެނިވެސް ވަރިވެސް ނުކުރެވޭނަމަ ކުރިމަތިވާނެ މައްސަލަތަކުން ސަލާމަތްވުމުގެ ފުރުޞަތު ދިނުމަށެވެ. އެއްވެސް ޙާލެއްގައި އެއް ދުވަހު ކައިވެނިކޮށްފައި އަނެއް ދުވަހު ވަރިކުރަން ހިތްވަރުދިނުމަކަށް ނޫނެވެ.
ބައެއް މީހުން ހެނދުނު އޮފީހަށްދާ ހެދުން މެންދުރު އޮފީހުން އައިސް ބަދަލުކުރެއެވެ. އެއަށްފަހު ލާ ހެދުން ބާލައި ރޭގަނޑު ބޭރަށް ދާން ލަނީ އައު ހެދުމެކެވެ. ސާފުތާހިރުކަމުގެ ގޮތުން ބަލައިފިނަމަ އެއީ ވަރަށް ރަނގަޅު ގޮތެކެވެ. ނަމަވެސް ކައިވެނީގެ ގުޅުމާއިމެދު އެގޮތަށް އަމަލުކޮށްގެން ނުވާނެއެވެ. ކައިވެނިކޮށް ވަރިކުރަން ޖެހޭނީ ފިހާރައަކުން ރީތި ހެދުމެއް ފެންނައިރަށް ގަނެގެން ލައި އުޅޭ އުޞޫލުން ކަންކުރާކަށް ނޫނެވެ. އަދި ހެދުން ކިރިޔާ ބައުވެލާއިރަށް އެއްލައިލާ އުޞޫލުން ކަންކުރާކަށް ވެސް ނޫނެވެ. ކައިވެނީގެ ގުޅުމަކީ އެއަށްވުރެ މާމަތިވެރި ގުޅުމެކެވެ.
ހަމައެކަނި މިމިންވަރު ހިތްމައްޗަށް ގެނެސްބަލާށެވެ! ކައިވެނި ފަށަނީ ﷲ ތަޢާލާގެ އިސްމްފުޅުންކަމާއި ކައިވެނީގެ ޚުޠުބާގައި ކިތަށްފަހަރު ﷲ ތަޢާލާގެ ނަންފުޅު ބޭނުންކުރެވޭ ކަމެވެ. މިއީ އާދައިގެ ކަންކަމެއް ނޫނެވެ.
ބިރުވެތިވާންވީ ކޮންމެ ކައިވެންޏެއް ކުރެވެނީ ﷲ ތަޢާލާގެ ނަންފުޅު އެތައް ފަހަރަކު ބޭނުންކޮށްގެން ކަމަށްވާތީ އެކަމަށެވެ. ކައިވެނީގެ އެންމެ ބޮޑު އިޤްރާރަކީވެސް ﷲ ތައާލާގެ ދީންމަތީގައި ސާބިތުވެ ތިބުން ކަމެވެ. ﷲ ތަޢާލާއަށް އުރެދުމެއް ހިމެނޭ އެއްވެސް ކަމެއް ދެމީހުން ކުރެ އެކަކުވެސް ނުކުރުމެވެ. ﷲ ތަޢާލާއަށް އުރެދުމެއްވާ އެއްވެސް ކަމެއްގައި އަނބިމީހާ، ފިރިމީހާއަށް ކިޔަމަންތެރިވާން ނުޖެހެނީ އެހެންވެގެންނެވެ.
ހިތާމައަކީ ﷲ ތައާލާގެ ނަންފުޅު ބޭނުންކޮށްގެން އަހަރެމެންވާ ވައުދުތައް މަތިން ދާދި އަވަހަށް ހަނދާންނެތިގެންދާ ކަމެވެ. ރީތި، އައު ހެދުން ފެނުމުން ހޯދައި އަމަލުކުރާ އުޞޫލުން ކައިވެންޏާއިމެދު ޢަމަލުކުރެވޭ ކަމެވެ. މީސްތަކުންނޭވެ! ލޮބުވެތި އަޚުންނާއި އުޚުތުންނޭވެ! ﷲ ތަޢާލާއަށް ބިރުޔވެތިވާށެވެ! ކައިވެނިތައް ދަމަހައްޓަން ގަދައަޅައި މަސައްކަތްކުރާށެވެ! އެކުގައި ދިރިއުޅެވެން ނެތްނަމަ، ފުރިހަމަކުރަންޖެހޭ ހުރިހާ މަރުހަލާތަކެއް ފުރިހަމަކޮށްފައި ނޫނީ ކައިވެނި ރޫޅައި ނުލާށެވެ! ދެމަފިރިންނަކީ ވެސް ﷲ ތަޢާލާއަށް އިޚްލާޞްތެރިން ކަމުގައި ވާނަމަ ހުރިހާ މައްސަލަތަކެއްވެސް ދާނީ ޙައްލުކުރެވެމުންނެވެ. ދެމަފިރިންނަށް ﷲ ތަޢާލާގެ ރަޙްމަތްފުޅު ދާނީ ހަމަ އޮހެމުންނެވެ!
ކައިވެނިތައް އަހަރެމެން ރަޖިސްޓްރީ ކުރަނީ އެ ޤައުމެއްގައި ދައުލަތުން އެކަމަށް ކަނޑައަޅާ ކޯޓު ނުވަތަ ނުވަތަ އެނޫންވެސް އެފަދަ ތަންތަނުގައެވެ. (ރާއްޖޭގައި ހަމައެކަނި ކޯޓުތަކުގައެވެ.)
މުހިންމީ ދުނިޔޭގައި ކައިވެނި ރަޖިސްޓްރީކުރާ އިދާރާއެއްނޫނެވެ. އެއީ ކޮންމެތަނަކަށްވެސް ވެދާނެއެވެ. ބައެއް ޤައުމުތަކުގައި މިސްކިތްތަކުގައި، އަނެއްބައި ޤައުމުތަކުގައި ޖަމާޢަތްތަކުގައިވެސް އެބަ ރަޖިސްޓްރީކުރެއެވެ.
ކައިވެނީގެ އެންމެ މުހިންމު ރަޖިސްޓްރީއަކީ ކައިވެނިކުރުމުން މަލާއިކަތުން އެމީހެއްގެ ފަތުގައި ލިޔުއްވަވާ ލިޔުއްވެވުމެވެ. ކޮންމެ ކައިވެންޏެއްވެސް ﷲ ތަޢާލާގެ ޙަޟްރަތުގަ "ރަޖިސްޓްރީ" ކުރެވޭ ކަމަށް މިބުނީ އެމީހެއްގެ ފަތުގައި ލިޔުއްވަވާތީއެވެ. އެއީ އާދައިގެ ކަމެއްކަމަށް ހީވެސް ނުކުރާށެވެ!
--މުފްތީ މެންކުގެ ދަރުސަކުން