އެސްޓޯނިއާގެ ޓާރްޓޫ ސިޓީގައި ހުންނަ ޔުނިވަރސިޓީ އޮފް ޓާރްޓޫގައި ދިވެހި ދަރިވަރުންނަށް ހުރި ފުރުޞަތުތަކާއި ގުޅޭގޮތުން ރައީސުލްޖުމުހުރިއްޔާ ޑރ. މުހައްމަދު މުއިއްޒު މަޝްވަރާކުރައްވައިފިއެވެ.
ރައީސް ޑރ. މުއިއްޒު މި މަޝްވަރާތައް ކުރައްވާފައިވަނީ އެމަނިކުފާނު އެސްޓޯނިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި، އެ ޔުނިވަރސިޓީއަށް ޒިޔާރަތްކުރައްވާ، އެ ޔުނިވަރސިޓީގެ ރެކްޓަރ، ޕްރޮފެސަރ ޓޫމަސް އައްސެރްއާއި އެ ޔުނިވަރސިޓީގެ އޮފިޝަލުންނާ ބައްދަލުކުރައްވާ ދެއްކެވި ވާހަކަފުޅުތަކުގެ ތެރެއިންނެވެ.
މި ބައްދަލުކުރެއްވުމުގައި، ޔުނިވަރސިޓީ އޮފް ޓާރްޓޫގެ އޮފިޝަލުން ވަނީ އެ ޔުނިވަރސިޓީގެ ވަނަވަރު ތަފްޞީލުކޮށް ދެއްވައި، ސައިންޓިފިކް ރިސަރޗްގެ ރޮނގުން މުޅި ވިލާތު ބައްރުގައިވެސް އެންމެ ކުރިއަރާފައިވާ އެއް ޔުނިވަރސިޓީގެ ގޮތުގައި އެ ޔުނިވަރސިޓީގެ ދަރަޖަ ފާހަގަކުރައްވާފައެވެ.
ރައީސް ޑރ. މުއިއްޒު ދެއްކެވި ވާހަކަފުޅުގައި، ދިވެހި ދަރިވަރުންނަށް މަތީ ތަޢުލީމު ޙާޞިލްކުރުމަށް ހުރި ސްކޮލަރޝިޕް ފުރުޞަތުތަކާއި މަގުތައް އޮޅުންފިލުއްވާފައިވާއިރު މެޑިސިން، ޑިޖިޓަލް ދާއިރާއާއި، މޫސުމަށް އަންނަ ބަދަލުތަކާއި ތިމާވެށީގެ ސައިންސް ފަދަ އެކި ދާއިރާތަކުންވެސް ފަންނުވެރިން ތަމްރީނުކުރަން ޖެހިފައިވާކަން ފާހަގަކުރައްވާފައިވެއެވެ.
ޓާރްޓޫ ޔުނިވަރސިޓީގެ މަންދޫބުން ވަނީ ދިވެހި ދަރިވަރުންނަށް ޖާގަ ދިނުމުގެ ވިސްނުމަށް މަރުޙަބާ ދަންނަވައި، ލިބެންހުރި ސްކޮލަރޝިޕް ފުރުޞަތުތަކާއި، ދެ ފަރާތުން ގުޅިގެން ކުރެވިދާނެ ކަންކަމުގެ މަޢުލޫމާތު ހުށަހަޅުއްވާފައެވެ. އަދި ޢިލްމީ ރޮނގުން ގުޅުން ބަދަހިކުރުމަށް އިތުރަށް މަޝްވަރާކުރުމަށް ތައްޔާރަށް ތިބިކަންވެސް ފާހަގަކުރައްވާފައިވެއެވެ.
ރައީސް ޑރ. މުއިއްޒު އެސްޓީނިއާއަށް ކުރައްވަމުން ގެންދަވާ މި ދަތުރުފުޅަކީ އެސްޓޯނިއާގެ ރައީސް ޑޮކްޓަރ އަލާރް ކަރިސްގެ ދަޢުވަތަކަށް ކުރައްވާ ރަސްމީ ދަތުރުފުޅެކެވެ. މި ދަތުރުފުޅުގައި، ރައީސުލްޖުމްހޫރިއްޔާގެ އަރިހުގައި ސަރުކާރުގެ މަތީ ފަންތީގެ ވަފުދެއް އަދި ރާއްޖޭގެ ފަންނިއްޔާތުގެ ދާއިރާގެ މާހިރުންގެ މައްޗަށް އެކުލެވިގެންވާ ވަފުދެއްވެސް ބައިވެރިވެވަޑައިގަންނަވައެވެ.