ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތުކޮށް، ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އިސްމާއިލް އަބްދުލްހަމީދުގެ މައްޗަށް ދައުލަތުން ކުރި ދައުވާގެ ހުކުމް އިއްވުމަށްޓަކައި މިއަދު ބާއްވަން ތާވަލުކޮށްފައި އޮތް ޝަރީއަތުގެ މަޖިލީހަށް އޭނާ ހާޒިރުނުވުމުން އެ ޝަރީއަތް ކެންސަލްކޮށްފި އެވެ.
ހެންދުނު 00: 10 ގައި ބޭއްވުމަށް ތާވަލުކުރި ޝަރީއަތް ކެންސަލްކުރީ މެމްބަރު އިސްމާއީލް އަބްދުލްހަމީދުގެ ބަލި ހަލާތު ހުރި ގޮތުން ކޯޓަށް ހާޒިރުވުމަށް އުޒުރުވެރިވެވަޑައިގަންނަވާ ކަމަށް ވިދާޅުވެ ސިޓީއެއް ފޮނުއްވާފައިވާތީ ކަމަށް ކޯޓުން ބުންޏެވެ.
އިސްމާއިލް އަބްދުލްހަމީދުގެ މައްޗަށް ކޮށްފައިވާ ދައުވާގައި ބުނެފައިވަނީ މާލޭ މުނިސިޕަލްޓީގެ ޑިރެކްޓަރަކަށް ހުންނަވައިގެން، އޭރުގެ ވޭސްޓް މެނޭޖްމެންޓަށް ކޮޅުވެއްޓިއެއް ގެނައުމުގައި އޭނާ ކޮރަޕްޝަންގެ އަމަލެއް ހިންގާފައިވާ ކަމަށެވެ. ޝަރީއަތުގައި ދައުލަތުން ބުނެފައިވަނީ ދައުލަތަށް ކޮޅުވެއްޓި ނުލިބެނީސް، އެ އުޅަނދު ލިބިއްޖެ ކަމަށް ބުނެ އެ އުޅަނދުގެ އަގުގެ ބާކީ 50 ޕަސެންޓަށްވާ ފައިސާ، އުޅަނދު ގެނައި ކުންފުންޏަށް ހޯދާދީފައިވާ ކަމަށެވެ.
އިސްމާއީލް އަބްދުލްހަމީދުގެ މައްޗަށް ދައުލަތުން ކޮށްފައިވަނީ ސަރުކާރުގެ މުވައްޒަފަކު މަގާމުގެ ނުފޫޒު ބޭނުންކޮށްގެން ނާޖައިޒު ފައިދާ ހޯދައިދިނުމުގެ ކުށުގެ ދައުވާ އެވެ. ކޮރަޕްޝަން ހުއްޓުވުމާއި މަނާކުރުމުގެ ގާނޫނުގެ ދަށުން، އެފަދަ ކުށެއްކޮށްފި މީހެއްގެ އަދަބަކީ ގިނަވެގެން ތިން އަހަރު ދުވަހުގެ މުއްދަތަށް ޖަލަށްލުން ނުވަތަ އަރުވާލުން ނުވަތަ ގޭގައި ބަންދުކުރުމެވެ.
ރައްޔިތުންގެ މަޖިލީހުގެ މެންބަރުކަން ގެއްލޭ ސަބަބުތަކުގެ ތެރޭގައި ޖިނާއީ ކުށެއް ކުރިކަން ސާބިތުވެ އަހަރު ދުވަހަށް ވުރެ ދިގު މުއްދަތެއްގެ ހުކުމެއް ތަންފީޒުކުރަން ޖެހުން ހިމެނެ އެވެ.