އެމެރިކާ އާއި އިޒްރޭލު އަދި އީރާނާ ދެމެދު އުފެދިފައިވާ ހަމަނުޖެހުންތަކުގެ ސަބަބުން ދުނިޔޭގެ ބާޒާރުގައި ތެލުގެ އަގަށް އައިސްފައިވާ ބަދަލުތަކާ ގުޅިގެން، ޕާކިސްތާނުގެ އިގްތިސާދު ހަމަޔަކަށް އެޅުވުމަށްޓަކައި ވަރުގަދަ އިގްތިސާދީ ފިޔަވަޅުތަކެއް އަޅަން ނިންމަވާފައިވާކަން އެ ގައުމުގެ ބޮޑުވަޒީރު ޝެހްބާޒް ޝަރީފް މިއަދު އިއުލާނުކުރައްވައިފި އެވެ.
ގައުމާ މުހާތަބު ކުރައްވައި ވާހަކަދައްކަވަމުން ބޮޑުވަޒީރު ޝަރީފް ވިދާޅުވީ، ދުނިޔޭގެ ބާޒާރުގައި ތެޔޮ ފީފާއެއްގެ އަގު 100 ޑޮލަރަށް ވުރެ މައްޗަށް އިއްޔެ ގޮސްފައިވުމާ އެކު، ތެޔޮ އިގްތިސާދު ކުރުމަށާއި އިގްތިސާދީ ފިއްތުންތަކުން އަރައިގަތުމަށްޓަކައި ސަރުކާރުން ހާއްސަ ޕްލޭނެއް އެކުލަވާލާފައިވާ ކަމަށެވެ. އަދި މިހާލަތު މިގޮތަށް ކުރިއަށްދާ ނަމަ، ތެލުގެ އަގު އަތްނުފޯރާ ފަށަށް ހިނގައިދާނެ ކަމުގެ އިންޒާރު ވެސް އޭނާ ދެއްވި އެވެ.
އަލަށް އެޅި ފިޔަވަޅުތަކުގެ ދަށުން، ސަރުކާރުގެ ހުރިހާ އޮފީސްތަކެއް ހަފުތާއަކު ހަތަރު ދުވަހު (ހޯމަ ދުވަހުން ފެށިގެން ބުރާސްފަތި ދުވަހަށް) މަސައްކަތްކުރާ ގޮތަށް ވަނީ ހަމަޖައްސާފަ އެވެ. މީގެ އިތުރުން، ސްކޫލްތަކާއި ކޮލެޖްތައް ދެ ހަފުތާގެ މުއްދަތަށް ބަންދުކުރުމަށް ނިންމާފައިވާއިރު، މަތީ ތައުލީމު ދޭ މަރުކަޒުތަކުގެ ކިޔެވުން އޮންލައިންކޮށް ކުރިއަށް ގެންދިއުމަށް ވަނީ އަންގާފަ އެވެ.
އަދި ޒަރޫރީ ހިދުމަތްތަކާއި ދަނޑުވެރިކަމާއި ސިނާއީ ދާއިރާ ފިޔަވައި ސަރުކާރާއި އަމިއްލަ އޮފީސްތަކުގެ %50 މުވައްޒަފުން ގޭގައި ތިބެގެން މަސައްކަތްކުރާ ގޮތަށް ވަނީ ހަމަޖައްސާފަ އެވެ.
ތެލުގެ ހަރަދު ކުޑަކުރުމުގެ ގޮތުން، ކުރިއަށް އޮތް ދެ މަސްދުވަހު ސަރުކާރުގެ އުޅަނދުތަކަށް ދޫކުރާ ތެޔޮ %50 މަދުކުރުމަށާއި، ސަރުކާރުގެ ރަސްމީ އުޅަނދުތަކުގެ ތެރެއިން %60 އުޅަނދު ބޭނުންނުކޮށް ބެހެއްޓުމަށް ވެސް ވަނީ ނިންމާފަ އެވެ.
މީގެ އިތުރުން، އިގްތިސާދީ ދަތިކަމުން އަރައިގަތުމަށް އެޅި އިތުރު ފިޔަވަޅުތަކުގެ ތެރޭގައި ގާނޫނު ހަދާ މަޖިލީހުގެ މެންބަރުންގެ މުސާރައިން %25 އުނިކުރުމާއި، ފެޑްރަލް މިނިސްޓަރުންނާއި މުޝީރުންނަށް ދެ މަސްދުވަހުގެ މުސާރަ ނުދިނުމާ އަދި ސަރުކާރުގެ ޖުމްލަ ހަރަދުތަކުގެ ތެރެއިން %20 އުނިކުރުން ހިމެނެ އެވެ.
ބޮޑުވަޒީރު ޝަރީފް އިތުރަށް ވިދާޅުވީ، ސަރުކާރުގެ އިސްވެރިން ގައުމުން ބޭރަށް ކުރައްވާ ރަސްމީ ދަތުރުތައް މިވަގުތަށް މަނާކުރެވިފައިވާ ކަމަށާއި ތެލުގެ ހަރަދު ކުޑަކުރުމަށްޓަކައި ހުރިހާ ބައްދަލުވުންތަކެއް ވެސް އޮންލައިންކޮށް ބޭއްވުމަށް ހަމަޖެހިފައިވާ ކަމަށެވެ.
ޕާކިސްތާނަކީ ގަލްފުގެ ގައުމުތަކުން އިމްޕޯޓްކުރާ ހަކަތައަށް ވަރަށް ބޮޑަށް ބަރޯސާވާ ގައުމަކަށްވާއިރު، މިއީ ގައުމުގެ އިގްތިސާދު ހިމާޔަތްކުރުމަށްޓަކައި ކޮންމެހެން އަޅަންޖެހުނު ދަތި ނިންމުންތަކެއް ކަމަށް ބޮޑުވަޒީރު ފާހަގަކުރެއްވި އެވެ.
ކަމާ ބެހޭ ފަރާތްތަކުން ހާމަކޮށްފައިވާ ގޮތުގައި، މިވަގުތަށް ޕާކިސްތާނުގެ ތެލުގެ ރިޒާވް ހުރީ އެކަށީގެންވާ މިންވަރެއްގަ އެވެ. ނަމަވެސް ސަރަހައްދީ ހަމަނުޖެހުންތަކާ ގުޅިގެން ކުރިމަތިވެދާނެ ބަދަލުތައް ސަރުކާރުން ދަނީ ވަރަށް ގާތުން ބަލަމުންނެވެ.