އިރާނާއި އެމެރިކާ-އިސްރާއީލާ ދެމެދު ހިނގަމުންދާ ހަނގުރާމަ ހުއްޓުވުމަށް ޗައިނާއިން ކުރަމުންދާ ހާރިޖީ މަސައްކަތްތައް އިތުރަށް ވަރުގަދަކޮށް، އަންނަ މަހު އެމެރިކާގެ ރައީސް ޑޮނަލްޑް ޓްރަމްޕާއެކު ބޭއްވުމަށް ހަމަޖެހިފައިވާ މުހިންމު ސަމިޓަށް މަގުފަހިކުރަން ފަށައިފިއެވެ.
އަންނަ މޭ މަހުގެ 14 އަދި 15 ގައި ބޭއްވުމަށް ހަމަޖެހިފައިވާ މި ބައްދަލުވުމާ ބެހޭގޮތުން ދިރާސާކުރާ ފަރާތްތަކުން ބުނާގޮތުގައި، ޗައިނާގެ ރައީސް ޝީ ޖިންޕިންގްގެ އަމާޒަކީ ޓްރަމްޕަށް ހޫނު މަރުހަބާއެއް ކިޔައި، ދެ ގައުމުގެ ދެމެދުގައި އޮތް ނުތަނަވަސްކަން ކުޑަކުރުމެވެ.
ހާރިޖީ ދާއިރާގައި ޗައިނާއިން ކުރަމުންދާ މަސައްކަތްތަކަށް ބަލާއިރު، އެ ގައުމުގެ ފޮރިން މިނިސްޓަރު ވަންގް ޔީ ވަނީ މިހާތަނަށް އެކި ގައުމުތަކުގެ އިސްވެރިންނާ 30 އަށްވުރެ ގިނަ ބައްދަލުވުން ބާއްވާފައެވެ. އަދި ޗައިނާގެ ހާއްސަ މަންދޫބު ޒައި ޖުން ވަނީ މެދުއިރުމަތީގެ ފަސް ގައުމަކަށް ދަތުރުކޮށް، ހަނގުރާމަ ހުއްޓާލުމަށް ބާރުއަޅާފައެވެ.
މި ސަމިޓުގައި ޗައިނާއިން އެމެރިކާގެ ބޮއިންގް މަތިންދާބޯޓު ގަތުމުގެ ބޮޑު އެއްބަސްވުމެއްގައި ސޮއިކޮށް، އެމެރިކާގެ ދަނޑުވެރިކަމުގެ އުފެއްދުންތައް ގަތުމަށް އިތުރު ފުރުސަތުތައް ދޭނެ ކަމަށް ބެލެވެއެވެ. ނަމަވެސް، މަޝްރަހު ދިރާސާކުރާ ފަރާތްތަކުން ބުނަނީ ޗައިނާގެ މި ހަރަކާތްތަކަކީ ހަމައެކަނި ޓްރަމްޕްގެ ރުހުން ހޯދުމަށް ކުރާ "ތަމްސީލީ" މަސައްކަތްތަކެއް ކަމަށާއި، ހަގީގީ ސުލްހައެއް ގާއިމުކުރުމަށް ބޭނުންވާ އަސްކަރީ ބާރު ޗައިނާގެ ކިބައިގައި ނެތް ކަމަށެވެ.
މިހާރު ހިނގަމުންދާ އިރާން ހަނގުރާމައަކީ މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން ގުޅިގެން އިރާނާ ދެކޮޅަށް ފެށި އަސްކަރީ ހަރަކާތްތަކެކެވެ. މި ހަނގުރާމައިގެ ތެރެއިން އެމެރިކާގެ އަސްކަރިއްޔާއިން ވަނީ އިރާނުގެ ބަނދަރުތައް ބަންދުކޮށް، އެ ގައުމުގެ ތެލުގެ މުއާމަލާތްތަކަށް ހުރަސްއަޅާފައެވެ.
މިއީ ދުނިޔޭގައި އެންމެ ގިނައިން ސާފުނުކުރާ ތެޔޮ އެތެރެކުރާ އަދި އެ ގައުމަށް ބޭނުންވާ ތެލުގެ ދެބައިކުޅަ އެއްބައި މެދުއިރުމަތިން ހޯދާ ޗައިނާއަށް ކުރިމަތިވި ބޮޑު ގޮންޖެހުމެކެވެ.
މީގެ ކުރިންވެސް އިރާނާއި ސައުދީ އަރަބިއްޔާގެ ގުޅުން ބަދަހިކުރުމުގައި މެދުވެރިއެއްގެ ދައުރު އަދާކުރި ޗައިނާއިން މިހާރު މަސައްކަތް ކުރަމުންދަނީ، ޓްރަމްޕްގެ ސަރުކާރާ ދެކޮޅުނުވެ، ވިޔަފާރީގެ މަސްލަހަތުތައް ހިމާޔަތްކުރަމުން މެދުއިރުމަތީގައި ސުލްހަ ގާއިމުކުރުމަށެވެ.