ދިވެހީންގެ އުފެއްދުންތެރިކަމުގެ މައުރަޒު 2026ގައި ބައިވެރިވުމަށް މިހާތަނަށް 80 އެޕްލިކޭޝަން ލިބިފައިވާ ކަމަށް ބިޒްނަސް ސެންޓަރ ކޯޕަރޭޝަނުން ވިދާޅުވެއްޖެއެވެ.
ދިވެހީންގެ އުފެއްދުންތެރިކަމުގެ މަޢުރަޒަކީ، ރާއްޖޭގެ އެކި ކަންކޮޅުތަކުގައި ތިބި އަތްތެރި މަސައްކަތްތެރިންނާއި، ކުދި އަދި މެދު ފަންތީގެ ވިޔަފާރިތަކާއި، ޑިޖިޓަލް އުފެއްދުންތެރިންގެ އިތުރުން އައު އީޖާދުތައް ކުރާ ފަރާތްތަކަށް އެ ފަރާތްތަކުގެ މަސައްކަތްތައް ދައްކާލުމަށް ބާއްވާ މަޢުރަޒެކެވެ.
މިއަހަރުގެ އުފެއްދުންތެރިކަމުގެ މައުރަޒާ ގުޅޭގޮތުން ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަ ދައްކަވަމުން ބީސީސީގެ ޗީފް ސްޓްރެޓިޖިކް އޮފިސަރ މަރިޔަމް ނަޝާ ވަނީ، މިދިޔަ އަހަރުގެ އުފެއްދުންތެރި ކަމުގެ މައުރަޒަށް އާންމުންގެ ފަރާތުން ބޮޑު ތަރުހީބެއް ލިބިފައިވާކަން ފާހަގަކުރައްވާފައެވެ.
އެގޮތުން މިދިޔަ އަހަރުގެ މައުރަޒުގައި 250 ފަރާތަކުން 2500އަށްވުރެ ގިނަ އުފެއްދުން ބައިވެރިކޮށްފައިވާކަން ނަޝާ ފާހަގަކުރެއްވިއެވެ. އަދި މިދިޔަ އަހަރެކޭވެސް އެއްގޮތަށް މިއަހަރުގެ މައުރަޒަށްވެސް ބޮޑު ތަރުޙީބެއް ލިބޭނެ ކަމަށް އުއްމީދު ކުރައްވާ ކަމަށާއި، މިހާތަނަށް 80 އެޕްލިކޭޝަން ލިބިފައިވާ ކަމަށް ވިދާޅުވިއެވެ.
"ފާއިތުވެދިޔަ އަހަރުގެ މައުރަޒަށް ބަލާއިރު ޖުމްލަ ގޮތެއްގައި 250 ފަރާތަކުން 2500އަށްވުރެ ގިނަ އުފެއްދުންތައް ވަނީ ބައިވެރިކޮށްފައި. މިއަހަރުގެ އެޕްލިކޭޝަނަށް އަޅުގަނޑުމެން މި ހުޅުވާލީ، މިމަހުގެ 8 ވަނަ ދުވަހު. މިހާތަނަށް އައިރު 80 އެޕްލިކޭޝަން. މީގެންވެސް މިއަހަރުގެ މައުރަޒަށް އާންމުންގެ ފަރާތުން ތަރުޙީބު ލިބުނުކަން ފާހަގަކުރެވޭ". މަރިޔަމް ނަޝާ ވިދާޅުވިއެވެ.
މިއަހަރުގެ މައުރަޒުގައިވެސް ސަރުކާރުގެ ކުންފުނިތަކާއި، ޖަމިއްޔާ ޖަމާޢަތްތަކާއި، ތަޢުލީމުދޭ އިދާރާތަކަށްވެސް ބައިވެރި ވެވޭނެއެވެ. އަދި މިދިޔަ އަހަރާ ޚިލާފަށް މިއަހަރުގެ މައުރަޒުގައި 13 އަހަރުން މަތީގެ ކޮންމެ މީހަކަށްވެސް ބައިވެރި ވެވޭނެއެވެ.
މިއަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، މި އަހަރަކީ "އުފެއްދުންތެރިކަމުގެ އަހަރު"ގެ ގޮތުގައި ކަނޑައަޅުއްވައި އެކަން އިޢުލާނު ކުރައްވާފައެވެ. އެހެންކަމުން ދިވެހީންގެ އުފެއްދުންތެރިކަމުގެ މަޢުރަޒު 2026 ވާނީ، ދިވެހި އުފެއްދުންތެރިންނާއި ފަންނުވެރިންނަށް ހުޅުވިގެންދާނެ މުހިންމު ފުރުޞަތަކަށް ކަމަށް ބީސީސީން ވިދާޅުވިއެވެ.
މިއަހަރުގެ މައުރަޒު ކުރިއަށްދާނީ، އޮކްޓޯބަރު މަހުގެ 23 އިން 31އަށް ހުޅުމާލެ ސެންޓްރަލް ޕާކުގައެވެ.