ރާއްޖޭގެ ހުރިހައި ރަށްތަކުގައި ކަރަންޓުގެ ޚިދުމަތ 24 ގަޑިއރު ޔަޤީން ކަމާއިއެކު ޟޯރުކޮށް ދިނުމަށް ކުރަންޖެހޭ ޚަރަދުތައް ވަަރަށް ބޮޑު ކަމަށާއި އެހެން ނަމަވެސް ސަރުކާރުން އެޚަރަދުތައް ކުރާނެ ކަމަށް އެންވަޔަރަންމަންޓް މިނިސްޓަރ ޠާރިޤް އިބްރާހީމް ވިދާޅުވެއްޖެއެވެ.
ޠާރިޤް މިމޭރުމުން ވިދާޅުވީ މޯލްޑިވްސް އެނަރޖީ ޕޮލިސީ އެންޑް ސްޓްރެޖީ 2016 އާއި އައިލަންޑް އިލެކްޓްރިސިޓީ ޑާޓާ ބުކް 2016 ނެރުމަށް މިއަދު ސްޓެލްކޯގައި ބޭއްވި ރަސްމިއްޔާތުގައެވެ.
2 ފޮތް ނެރެދެއްވުމަށްފަހު ޠާރިޤް ވިދާޅުވީ ޕޮލިސީތައް މިމޭރުމުން ލިޔެ ހާމަކުރުމުން ހަކަތައިގެ ދާއިރާގައި އިންވެސްޓްކުރަން ބޭނުންވާ ފަރާތްތަކަށް ފުރިހަމަ މައުލޫމާތު ލިބި އަދި ސިޔާސަތުގެ ޔަޤީންކަން ލިބިގެންދާނެ ކަމަށެވެ.
ޠާރިޤް ވިދާޅުވީ 2018 ވަނަ އަހަރުގެ ނިޔަލަށް ޜާއްޖޭގައި ދުވާލުގަޑީގައި ބޭނުންކުރާ ހަކަތައިގެ 30 އިންސައްތައަކީ އިއާދަ ކުރަނިވި ހަކަތަ ކަމުގައި ހެދުމަށް ސަރުކާރުން ކުރިއަށް ގެންދާ މަޝްރޫއު ކާމިޔާބު ކަމާއިއެކު ކުރިއަށްދާ ކަމަށާއި ލަނޑުދަނޑި ހާޞިލުކޮށް ރާއްޖޭގެ ހުރިހައި ރަށެއްގައިވެސް އިއާދަކުރަނިވި ހަކަތަ ލިބޭނެ ނިޒާމުތައް ޤާއިމުކުރެވޭނެ ކަމަށެވެ.
ޠާރިޤް ވިދާޅުވީ މިފޮތުގެ ސަބަބުން މިސަރުކާރުން ވެރިކަމާއި ހަވާލުވިއިރު ރަށްރަށުގައި ކަރަންޓުގެ ހާލަތު އޮތް ގޮތާއި މިހާރުގެ ހާލަތު އަދި ސަރުކާރުން ކަރަންޓުގެ ޚިދުމަތް ތަރައްޤީކުރުމަށް ކުރަމުން ގެންދާ މަސައްކަތްތަކާއި ސިޔާސަތު އެނގިގެންދާނެ ކަމަށެވެ.
ޠާރިޤް ވިދާޅުވީ ކޮންމެ ރަށެއްގައި ސިންކްރޮނައިޒްޑް ޕެނެލް ސިސްޓަމެއް ބެހެއްޓުމަކީ އެކަމަށް ވަރަށް ބޮޑު ހޭދައެއް ކުރަންޖެހޭނެ ކަމެއް ކަމަށާއި ކިތަންމެ ބޮޑު ހޭދައެއް ކުރަންޖެހުނު ނަމަވެސް މިސަރުކާރުން އެކަން ކުރާނެ ކަމަށެވެ. "އެއިރުން ކަރަންޓަށް ހޭދަވާ ތެލުގެ އަދަދު މަދުވެ އަގުހެޔޮ ކުރެވޭނެ. ކަރަންޓު ލިބުމުގެ ޔަޤީންކަން ލިބޭނެ." ކަމަށްވެސް ޠާރިޤް ވިދާޅުވިއެވެ.
ކަަރންޓު އުފެއްދުމުގެ ޚަރަދުކުޑަކޮށް ވީހައި ހެޔޮ އަގެއްގައި ކަރަންޓުގެ ޚިދުމަތް ފޯރުކޮށްދިނުމަށް މިސަރުކާރުން ކުރަމުންގެންދާ މަސައްކަތްތައް ޠާރިޤް ވަނީ ފާހަގަކުރައްވައިފައެވެ. އަދި މި ސިޔާސަތުތައް ތަންފީޒުކުރައްވައި ތަޞްދީޤް ކުރެއްވުމަށް ރައީސުލްޖުމްހޫރިއްޔާ ޢަބްދުﷲ ޔާމީން ދެއްވާ ޚާއްޞަ ސަމާލުކަންވެސް ޠާރިޤް ވަނީ ފާހަގަކުރައްވައިފައެވެ.