ބަންގްލަދޭޝްއަށް ފުލުހުންގެ ޓީމެއް ދިޔައީ، ރައުދާ އާތިފުގެ މަރުގެ ތަހުގީގާއި ގުޅޭ މައުލޫމާތު ހޯދުމަށާއި، އަދި ރައުދާގެ އެހީތެރިކަން ފޯރުކޮށްދިނުމަށް ކަމަށް ދިވެހި ފުލުހުން ވިދާޅުވެއްޖެއެވެ.
ފުލުހުން މިއަދު ނެރުނު ނޫސްބަޔާނެއްގައި ވިދާޅުވީ، މި ހާދިސާ ތަހުގީގު ކުރުމަށް އެ އިދާރާގެ، އިސް ދެ އޮފިސަރަކު މިއަދު ބަންގްލަދޭޝްއަށް ގޮސްފައިވާ ކަމަށެވެ.
ފޮރިން މިނިސްޓްރީ އާއި ގުޅިގެން އިންތިޒާމުކުރި މި ދަތުރުގައި، ކަމާގުޅުންހުރި ފަރާތްތަކުގެ އެހީތެރިކަމާއެކު އެ ހާދިސާ އާއި ގުޅުންހުރި މައުލޫމާތު އެއްކުރުމަށް ހަމަޖެހިފައިވާ ކަމަށް ފުލުހުން ވިދާޅުވިއެވެ. އަދި ބަންގްލަދޭޝްގައި މިވަގުތު ތިބި، ރައުދާގެ އާއިލާ އާއި އެހެނިހެން ދިވެހި ދަރުވަރުންނާއި، އެ ދަރިވަރުންގެ އާއިލާތަކާއި ބައްދަލުކޮށް، މައުލޫމާތު ސާފުކުރާނެ ކަމަށް ފުލުހުން ވިދާޅުވިއެވެ.
ރައުދާގެ މަރުގެ މައްސަލައިގެ ތަހުގީގު ވަރަށް ގާތުން ބަލަމުން އަންނަ ކަމަށާއި، މި ހާދިސާ އާއި ގުޅޭގޮތުން އެއްކުރެވޭ މައުލޫމާތުގެ އަލީގައި، ކުރިއަށް އޮތް ތަނުގައި ވެސް ރާއްޖެއިން ބޭރުގައި ކިޔަވަން ތިބޭ ދިވެހި ދަރުވަރުންގެ، ސަލާމަތާއި ރައްކާތެރިކަން ކަށަވަރުކުރުމަށް، އެޅެންހުރި ފިޔަވަޅުތަކާއި ގުޅޭ މައުލޫމާތު އެއްކޮށް، ކަމާބެހޭ ފަރާތްތަކާއި ހިއްސާކުރެވޭނެ ކަމަށް ފުލުހުން ވިދާޅުވިއެވެ.
ރައުދާގެ މަރުގެ މައްސަލަ، ބަންގަލްދޭޝްގެ ފުލުހުންގެ ތެރޭގައި އޮންނަ ހާއްސަ ޔުނިޓެއް ކަމަށްވާ، "ޑިޓެކްޓިވް ބްރާންޗް" އިން ތަހުގީގު ކުރަން ފަށާފައިވާއިރު، ރައުދާގެ އޮޓޮޕްސީ ރިޕޯޓު މިދިޔަ ހޮނިހިރު ދުވަހު ވަނީ އާއްމުކޮށްފައެވެ.
ބަންގްލަދޭޝް ރާޖްޝާހީ މެޑިކަލް ކޮލެޖް ހޮސްޕިޓަލުގެ ޑިޕާޓްމެންޓް އޮފް ފޮރެންސިކް މެޑިސިންގެ އިސްވެރިޔާ ޕްރޮފެސަރ މަންސޫރު ރަހްމާން ވިދާޅުވީ އޮޓޮޕްސީ ރިޕޯޓުގެ ނަތީޖާއިން ރައުދާ މަރުވެފައިވަނީ އަމިއްލައަށް ދަންޖެހިގެން ކަމަށް ދައްކާފައިވާ ކަމަށެވެ.
އޮޓޮޕްސީ ރިޕޯޓުން ރައުދާ މަރުވެފައިވަނީ އަމިއްލައަށް ކަމަށް ދައްކާފައިވާއިރު، ރައުދާގެ އާއިލާއިން ވަނީ ރައުދާގެ މަރުގައި "ތުހުމަތު ކުރެވޭ ކަންތައްތަކެއް އެބަހުރި" ކަމަށާއި، ހުކުރު ދުވަހު ހެދި އޮޓޮޕްސީ ރިޕޯޓަށް "އިތުބާރު ނުކުރެވޭ" ކަމަށް ބުނެފައެވެ. އަދި އިތުރު އޮޓޮޕްސީއެއް ހެދުމާމެދު ވިސްނަމުންދާ ކަމަށް އާއިލާއިން ހާމަކުރެއެވެ.
އުމުރުން 20 އަހަރުގެ ރައުދާ މަރުވިއިރު އޭނާ ދިޔައީ އިސްލާމިކް ބޭންކް މެޑިކަލް ކޮލެޖް އިން އެމްބީބީއެސް ހަދަމުންނެވެ. އޭނާ ދިރިއުޅެނީ ސިންގަލް ރޫމެއްގައި ކަމަށް ވެއެވެ. ރައުދާ ދަންޖެހިފައި ހުއްޓާ ފެނުނީ، މިދިޔަ ބުދަ ދުވަހުގެ ހެނދުނު ސައިބޯން ރައުދާ ނުނިކުތުމުން ކުޑަދޮރުން ބެލިއިރު އޭނާގެ ރަހުމަތްތެރިއަކަށެވެ.