ޕީޕަލްސް ނެޝަނަލް ކޮންގްރެސް (ކޮންގްރެސް ޕާޓީ) ގެ ކެމްޕެއިން ނިންމަން ޚާއްސަ ހިނގާލުމެއް ބާއްވަން ނިންމައިފިއެވެ.
“ރައްޔިތުންގެ ބޮޑު ހިނގާލުން” އޮންނާނީ މިއަދު ހަވީރު 15:45 ގައެވެ. ހިނގާލުން ފެށޭނީ ބޮޑުތަކުރުފާނު ޕީއެންސީ ޖަގަހަ ކުރިމަތީންނެވެ.
މިއަދުގެ މި ބޮޑު ހިނގާލުމުގައި ޕީއެންސީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވެވަޑައިގަންނަވާނެއެވެ.
މި ހިނގާލުމުގައި ވީހާވެސް ގިނަ ބަޔަކު ބައިވެރިވުމަށް ކޮންގްރެސް ޕާޓީން ވަނީ އެދިފައެވެ.
މި ހިނގާލުމަކީ މާދަމާ ބޭއްވުމަށް ހަމަޖެހިފައިވާ މުހިންމު އިންތިޚާބުތަކުގެ ކެންޕެއިން ނިންމާލުމުގެ ގޮތުން ބާއްވާ ހަރަކާތެކެވެ. އަދި އިރުއޮއްސި 06:00 ގެ ފަހުން ކެމްޕެއިން ހަރަކާތްތައް ކުރިޔަށް ގެންދިއުން މަނާވާނެ އެވެ.
ހޮނިހިރު ދުވަހު މުހިންމު ތިން ވޯޓެއް ނަގާނެއެވެ.
އެއީ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމެޓީތަކުގެ އިންތިޚާބާއި ރައްޔިތުންގެ ފެންނަނުފެންނަ ވޯޓެވެ. ފެންނަ ނުފެންނަ ވޯޓް ނަގަނީ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވުމާއިމެދުއެވެ.