ބ. އޭދަފުށީ ފަޅުތެރޭގައި ނިޔާވެފައި އޮތް މީހަކު ފެނިއްޖެއެވެ. އުމުރުން ދުވަސްވީ މީހަކީ އެ ރަށު މީހެއް ކަމަށް ކަމާބެހޭ އިދާރާތަކުން ވަނީ ކަށަވަރުކޮށްދީފައެވެ.
ނިޔާވެފައިވަނީ އުމުރުން 82 އަހަރުގެ އަލީ އަބްދުﷲ އެވެ. އޭނާގެ ހަށިގަނޑު ފެނިފައިވަނީ ފަޅުތެރޭގައި އަޅާފައި އޮތް ލޯންޗެއްގައި ތިބި ބަޔަކަށެވެ.
އޭދަފުށީ ކައުންސިލްގެ ނައިބު ރައީސް އަލީ ޝަފީގު މީޑިއާތަކަށް މައުލޫމާތު ދެއްވަމުން ވިދާޅުވީ، ބެލެވޭ ގޮތުގައި އަލީ އަބްދުﷲ މޫދަށް އެރިފައިވަނީ ރޭގެ ވަގުތެއްގައެވެ. "ރޭގަނޑު 10 ޖަހާކަންހާއިރު ބަނދަރު ސަރަހައްދުން އޭނާ ފެނުނު ކަމަށް ރަށު މީހުން ބުނޭ. ފުލުހުން މިހާރު ދަނީ އެ ސަރަހައްދުގެ ސީސީޓީވީ ފުޓޭޖްތައް ބަލައި، ކަން ހިނގާދިޔަ ގޮތް ތަހުގީގު ކުރަމުން،" ޝަފީގު ވިދާޅުވިއެވެ.
ޝަފީގު އިތުރަށް ވިދާޅުވީ، އޭނާގެ ހަށިގަނޑުން ބޭރުފުށުގެ އެއްވެސް އަނިޔާއެއް ފެންނަން ނެތް ކަމަށެވެ. ނަމަވެސް، އިތުރު ތަހުލީލުތައް ކުރުމަށްޓަކައި ހަށިގަނޑު މިހާރު ވަނީ ރ. އުނގޫފާރު ރީޖަނަލް ހޮސްޕިޓަލަށް ގެންދިއުމުގެ މަސައްކަތް ފަށާފައެވެ.
ފުލުހުން ވިދާޅުވީ މި ހާދިސާއާ ގުޅިގެން ބަލަންޖެހޭ ކަންކަން އިތުރަށް ތަހުގީގު ކުރަމުންދާ ކަމަށެވެ.