އޭލެވެލްއަށް ދަރިވަރުން ވައްދާ ކްރައިޓީރިއާއަށް ބަދަލު ގެނައުމާއެކު މި އަހަރު މަތީ ސާނަވީއަށް ކިޔަވަން ޝައުގުވެރިވި ދަރިވަރުންގެ އަދަދު އިތުރުވެއްޖެ އެވެ.
ވީ ކިހިނެއް؟- މި އަހަރުގެ އޭލެވެލްގެ ކިޔެވުން މިއަދު ވަނީ ފަށާފަ އެވެ. އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވި ގޮތުގައި މި އަހަރު 3،000އަށް ވުރެ ގިނަ ދަރިވަރުން އޭލެވެލް ކިޔަވަ އެވެ. މިއީ މިދިޔަ އަހަރާ ބަލާއިރު، %49 ގިނަަ އަދަދެކެވެ.
މީގެ ކުރިން އާއްމުކޮށް، ކޮންމެ އަހަރަކު ވެސް 7،000އަށް ވުރެ ގިނަ ދަރިވަރުން އޯލެވެލް ނިންމާއިރު އޭގެ ތެރެއިން މަތީ ސާނަވީއަށް ކިޔަވަން ޝައުގުވެރިވަނީ 2،000އެއްހާ ދަރިވަރުންނެވެ.
ވީހާވެސް ގިނަ ދަރިވަރުންނަށް އޭލެވެލްއަށް ކިޔެވުމުގެ ފުރުސަތު ދިނުމުގެ ގޮތުން، މިދިޔަ މަހުގެ ތެރޭގައި އެޑިއުކޭޝަން މިނިސްޓްރީން ވަނީ މަތީ ސާނަވީއިން ޖާގަދޭ ކްރައިޓީރިއާ ދަށްކޮށްފަ އެވެ.
އެގޮތުން އާ އުސޫލުގެ ދަށުން، އޭލެވެލް ކިޔެވޭނެ ތިން މަގެއް ވަނީ ފަހިކޮށްފަ އެވެ. އެއީ:
އެކަޑަމިކް ސްޓްރީމް؛ އެއީ އޯލެވެލްގައި ވަކި އަދަދެއްގެ މާއްދާތަކުން ސީ ގްރޭޑަށް ވުރެ މަތި ލިބިފައިވުން. މި ގޮތަށް ބަލާއިރު ވެސް ކުރިއަށް ވުރެ ދަރިވަރުންނަށް ލުއިކޮށްދީފައިވޭ
ސްކޫލުގައި ކުރިއަށް ގެންދާ ވޮކޭޝަނަލް އެޑިއުކޭޝަން ކިޔެވުން
މަސައްކަތުގެ މާހައުލުގައި ކިޔެވުމުގެ އެޕްރެންޓިޝިޕް ޕްރޮގްރާމް ފުރިހަމަކުރުން
އޭގެ އިތުރުން، އޭލެވެލްއަށް ކިޔަވައިދޭ ރަށްރަށުގެ ސްކޫލުތަކުގައި ޖާގައޮތް ނަމަ، ޝަރުތު ހަމަނުވާ ނަމަ، މިނިސްޓްރީގެ ހުއްދައާ އެކު ކިޔެވުމުގެ ފުރުސަތު ވަނީ ދީފަ އެވެ.
މި ޝަރުތުތަކާ މި އަހަރު އޭލެވެލްއަށް ކިޔަވާ ދަރިވަރުންގެ އަދަދު، މި އަހަރު ވަރަށް ބޮޑަށް އިތުރުވި އެވެ. އެއާއެކު، އިތުރު ރަށްރަށުގައި އޭލެވެލްއަށް ކިޔަވައިދޭން ފެށުމާއި ސީއެޗްއެސްއީގެ އާ އިމާރާތުގައި ކިޔަވައިދޭން ފެށުން ވެސް، ދަރިވަރުން އިތުރުވި ސަބަބުތަކުގެ ތެރޭގައި ހިމެނެ އެވެ.
ޝަފީއު ވިދާޅުވީ އޭލެވެލްގެ މަގްސަދަކީ ހަމައެކަނި ދެލިގަނޑުން ދަސްކުރުން އެކަނި ނޫންކަމަށާއި އެއީ ވަޒީފާގެ މާހައުލަށް ކުދިން ތައްޔާރުކުރުމާއި މުއާމަލާތްކުރުމުގެ ހުނަރުތައް ތަރައްގީ ކުރުމަށް ވަރަށް މުހިއްމު ދެ އަހަރު ކަމަށެވެ.