ޗައިނާގެ ޓެކް ކުންފުނި ޝައޯމީންގެ  ސީއީއޯ ލެއި ޖުން ބުރާސްފަތި ދުވަހު ލައިވް ސްޓްރީމް އިވެންޓެއްގައި އެޕަލްގެ އައިފޯން 17އާ ސީދާ ވާދަކުރަން ޝައޯމީ 17 ސީރީޒް ތައާރަފުކޮށްފި އެވެ. އެޕަލް އަދި ޓެސްލާއާ ސީދާ އަޅާކިޔުންތަކާއެކު ބޭއްވި މި އިވެންޓަކީ ސްމާޓްފޯން އަދި އިލެކްޓްރިކް ވެހިކަލްތަކުގައި އެމެރިކާގެ  ބާރުވެރިކަމަށް ޗެލެންޖުކުރަން ކުންފުނިން ކުރި އެންމެ ފަހުގެ މަސައްކަތެވެ.
ޝައޯމީ 17 ސީރީޒްގައި ތިން މޮޑެލް، ސްޓޭންޑަޑް 17، 17 ޕްރޯ އަދި 17 ޕްރޯ މެކްސް، ހިމެނޭއިރު، އަގުތައް ފެށެނީ 4,499 ޔުއާން (ގާތްގަނޑަކަށް 630 ޑޮލަރު) ކަމަށްވާތީ، އެޕަލްގެ ބޭސް އައިފޯން 17އަށްވުރެ 100 ޑޮލަރު އަގު ދަށެވެ. އެންމެ ޕްރީމިއަމް މޮޑެލް ކަމަށްވާ 17 ޕްރޯ މެކްސްގެ އަގަކީ 5,999 ޔުއާން (ގާތްގަނޑަކަށް 840 ޑޮލަރު) އެވެ.
"ތިން މޮޑެލް ވެސް މިހާރު ޗައިނާގައި ޕްރީ-އޯޑަރު ކުރެވޭނެ، ރަސްމީކޮށް ވިއްކަން ފަށާނީ ސެޕްޓެންބަރު 27ގައި،" ދެ ގަޑިއިރުގެ އިވެންޓުގައި ލެއި ބުންޏެވެ. "ފާއިތުވި ފަސް އަހަރުގައި އަހަރެމެން ވަރަށް ބޮޑު ބަދަލުތަކެއް ގެނެސްފިން، މިއަދު މުޅިން އާ ޝައޯމީއެއް ކުރިމަތިމިލީ އާ ޒަމާނަކާ."
ސްޕެކްތަކުގެ ވާދަވެރިކަން
ޝައޯމީން 17 ޕްރޯ އަދި ޕްރޯ މެކްސް ދައްކާލީ އެޕަލްގެ ފްލެގްޝިޕް ފޯނުތަކަށް ސީދާ ވާދަވެރިންގެ ގޮތުގައި، ބެޓަރީ ލައިފް، ޑިސްޕްލޭ އަދި ކެމެރާ ޕާފޯމަންސްގައި ތަފްސީލީ އަޅާކިޔުންތައް ހިންގައިގެންނެވެ. ދެ ޕްރޯ މޮޑެލްގައި ވެސް ފަހަތުގައި ދެވަނަ ޑިސްޕްލޭއެއް ހިމެނޭއިރު، މިއީ ވިއުފައިންޑާ، ވިޖެޓް ހަބް ނުވަތަ މީޑިއާ ކޮންޓްރޯލަރެއްގެ ގޮތުގައި ބޭނުންކުރަން ޑިޒައިންކޮށްފައިވާ އެއްޗެކެވެ.
ފޯނުތަކުގައި އެންމެ ފަހުން ނެރުނު ސްނެޕްޑްރެގަން 8 އެލީޓް ޖެން 5 ޗިޕްސެޓް ބޭނުންކޮށްފައިވާއިރު، ބޮޑު ބެޓަރީތައް، ޕްރޯގައި 6,300 މިލިއެމްޕިއަރު އަދި ޕްރޯ މެކްސްގައި 7,500 މިލިއެމްޕިއަރު އަދި 100 ވޮޓް ވަޔާރްޑް އަދި 50 ވޮޓް ވަޔާލެސް ޗާޖިން ހިމެނެ އެވެ. ވީޑިއޯ ޕްލޭބެކް އެންޑިއުރަންސް ޓެސްޓެއް މެދުވެރިކޮށް ދައްކާލި ގޮތުގައި ޝައޯމީން ބުނަނީ އައިފޯން 17އަށްވުރެ ބެޓަރީ ލައިފު ދިގު ކަމަށެވެ.
ކޮންމެ މޮޑެލެއްގައި ވެސް ޓްރިޕްލް 50 މެގަޕިކްސަލް ކެމެރާ ސެޓަޕެއް ހިމެނޭއިރު، ޕްރޯ މެކްސް ފާހަގަވަނީ ބޮޑު ސެންސަރަކާއި ޓެލެފޮޓޯ ލެންސްގައި އަވަސް އެޕަޗަރަކާއެކު، ފަނޑު އަލީގައި ފޮޓޯގްރަފީ ރަނގަޅުކޮށްދޭ ގޮތަށެވެ.
ޝައޯމީން ބަރުދަން އަދި ބޯމިން ވެސް އަޅާކިޔައި، ޕްރޯ މެކްސް އަކީ "އައިފޯން 17 ޕްރޯ މެކްސްއަށްވުރެ ހަނި އަދި ހަލުވި" ފޯނެއް ކަމަށް ބުނެ އެވެ.
ބްރޭންޑިން ސްޓްރެޓެޖީ
ޝައޯމީން 15 ސީރީޒުން ސީދާ 17އަށް ދިއުމަކީ ބޭކާރު ކަމެއް ނޫނެވެ. މި ނަންދިނުމަކީ އެޕްލްއާ ސީދާ ވާދަކުރާ ވާދަވެރިންގެ ގޮތުގައި ފޯނުތައް ބެހެއްޓުމަށް ރާވާފައިވާ ސްޓްރެޓީޖިކް ބްރޭންޑިން މަސައްކަތުގެ ބައެކެވެ.
"މޮޑެލް ނަންތަކުން ފެށިގެން ސައިޑް-ބައި-ސައިޑް ޓެކްނިކަލް އަޅާކިޔުންތަކަށް، މި ލޯންޗަކީ ސީދާ އެޕްލްއަށް އަމާޒުކޮށްގެން ކުރިކަމެއް،" ލެއި ބުންޏެވެ.
އެޕްލްގެ ބްރޭންޑިން އަދި ލޯންޗް ފޯމެޓުން އިންސްޕިރޭޝަން ނެގިނަމަވެސް، ޝައޯމީގެ ހާޑްވެއާ އަމިއްލައަށް ފެންނަން އޮންނައިރު، ފަހަތު ޑިސްޕްލޭ އަދި ފޯން ފަންކްޝަނަލް ގޭމިން ކޮންސޯލަކަށް ބަދަލުކޮށްދޭ ގޭމް ބޯއި ސްޓައިލް އެކްސެސަރީ ކޭސް ފަދަ އިނޮވޭޝަންތައް ހިމެނެ އެވެ.
އާ ސަރަހައްދެއް: ކާރު، ޗިޕްސް އަދި އިތުރު ކަންތައްތައް
ސްމާޓްފޯނުތަކުގެ އިތުރުން، ލެއި މި އިވެންޓް ބޭނުންކޮށްފައިވަނީ ޝައޯމީގެ ފުޅާ އަމާޒުތައް ފާހަގަކުރާށެވެ. ކުންފުނީގެ ދެވަނަ އީވީ މޮޑެލް، YU7 އެސްޔޫވީ، ފަހުން ޗައިނާގައި ލޯންޗުކޮށް ވަގުތުން ޓެސްލާގެ މޮޑެލް 3 ލޯކަލް ވިއްކުމުގައި ކުރިއަށް ދިޔަ އެވެ. 2024ގެ ކުރީކޮޅު SU7 ސެޑާން ތައާރަފުކުރިފަހުން 40,000އަށްވުރެ ގިނަ ޝައޯމީ އީވީތައް ޑެލިވަރީކޮށްފައިވެ އެވެ.
މުސްތަގްބަލަށް އިންވެސްޓްކުރުން: ޗިޕްސްއަށް 7 ބިލިއަން ޑޮލަރު
ޝައޯމީ ސެމިކޮންޑަކްޓާ ތަރައްގީކުރުމުގައި ވެސް ބޮޑަށް އިންވެސްޓްކުރަމުންދެ އެވެ. ލެއި ބުނިގޮތުގައި އަމިއްލަ މޮބައިލް ޕްރޮސެސާތައް އުފައްދަން 7 ބިލިއަން ޑޮލަރު އިންވެސްޓްކުރަން ވަނީ ރާވާފަ އެވެ. މި މަޝްރޫއަށް 2,500 އިންޖިނިއަރުންގެ ޚާއްސަ ޓީމެއް ސަޕޯޓުކުރާ ކަމަށެވެ.
ޝައޯމީ 17 ސީރީޒްގެ އިންޓަނޭޝަނަލް ރިލީޒް ތާރީޚުތައް ޔަގީންވެފައިނެތް ނަމަވެސް، 2026ގެ ކުރީކޮޅު ޔޫރަޕުގައި ލޯންޗެއް، ބާސެލޯނާގައި ބާއްވާ މޮބައިލް ވާލްޑް ކޮންގްރެސްއާ ގުޅިގެން އައުން އެކަށީގެންވެ އެވެ.