ގޫގުލް ޓްރާންސްލޭޓްގެ އައިއޯއެސް އަދި އެންޑްރޮއިޑް އެޕްލިކޭޝަންތަކަށް އާ ފީޗާތަކެއް އިތުރުކޮށް، ތަރުޖަމާ ކުރުމުގެ ފެންވަރު އެ ކުންފުނިން މަތިކޮށްފިއެވެ. މި އާ ބަދަލުތަކުގެ ސަބަބުން، ބަސްބަހުގެ ސީދާ ލަފުޒީ މާނައިގެ ބަދަލުގައި، އެ ބަހެއްގެ އަސްލު ރޫހާއި ބަސްމަގު ހުންނަ ގޮތް ދެނެގަތުމަށް ބޮޑެތި ލުއިތަކެއް ލިބި، ތަރުޖަމާ ކުރުމުގެ ތަޖުރިބާ އިތުރަށް ފުރިހަމަވެގެންދާނެއެވެ. މި އަޕްޑޭޓާއެކު ތައާރަފުކުރި އެންމެ މުހިންމު އެއް ފީޗާއަކީ "ބަސްމަގު ތަފާތުކުރުމުގެ އިތުރު ގޮތްތައް" (އޯލްޓަނޭޓިވް ވޭސް ޓޫ ކޮންވޭ ފްރޭޒަސް) ދައްކައިދިނުމެވެ. މީގެ ފަހުން ކޮންމެ ޖުމްލައެއް ތަރުޖަމާ ކުރާއިރުވެސް، އެ ޖުމްލައެއް އެކި ހާލަތްތަކުގައި ބޭނުންކުރެވޭނެ ތަފާތު ގޮތްތައް ގޫގުލްއިން ބަޔާންކޮށްދޭނެއެވެ. މިސާލަކަށް، އިނގިރޭސި ބަހުގެ "It’s raining cats and dogs" ފަދަ އިސްތިލާހީ ބަސްތައް ތަރުޖަމާކުރާއިރު، އޭގެ ހަގީގީ މާނައާއި އެހެން ބަސްބަހުގައި އެފަދަ މާނައެއް ދޭހަކޮށްދޭން ބޭނުންކުރާނެ އުސޫލުތައް އޮޅުންފިލުވައިދޭނެއެވެ. https://sun.mv/164802 މީގެ އިތުރުން، އާޓިފިޝަލް އިންޓެލިޖެންސް (އޭއައި) ގެ އެހީގައި "އަންޑަސްޓޭންޑް" އަދި "އާސްކް" ފީޗާ ވެސް ވަނީ އެޕްލިކޭޝަނަށް އިތުރުކޮށްފައެވެ. "އަންޑަސްޓޭންޑް" ބަޓަނަށް ފިތާލުމުން ކުރެވުނު ތަރުޖަމާއާ ގުޅޭ ކުރު މައުލޫމާތެއް ލިބޭއިރު، "އާސްކް" ފީޗާ މެދުވެރިކޮށް އެ ތަރުޖަމާއާ ގުޅޭ އިތުރު ސުވާލުތައް ކުރެވޭނެއެވެ. މިސާލަކަށް، ވަކި ގައުމެއްގެ ބަހުރުވައިން އެ ޖުމްލައެއް ބުނާނެ އެންމެ އާންމު ގޮތަކީ ކޮބައިތޯ ސުވާލުކުރުމުން އެއަށް ޖަވާބު ލިބިގެންދާނެއެވެ. މި އާ ފީޗާތައް މިހާރު އެމެރިކާ އާއި އިންޑިއާގައި ބޭނުންކުރާ ފަރާތްތަކަށް ލިބެން ހުރިއިރު، ކުރިއަށް އޮތް ތަނުގައި ޑެސްކްޓޮޕް ވާޝަންއަށްވެސް މި ހިދުމަތް ލިބިގެންދާނެއެވެ. މި ބަދަލަކީ ގޫގުލް ޓްރާންސްލޭޓްގެ ތަރުޖަމާތައް މިހާރަށްވުރެ ގުދުރަތީ އަދި ސައްހަ ކުރުމަށް އެޅުނު މުހިންމު ފިޔަވަޅެކެވެ. ދުނިޔޭގައި އެންމެ ގިނަ ބަޔަކު ބޭނުންކުރާ ތަރުޖަމާކުރާ ވަސީލަތް ކަމަށްވާ ގޫގުލް ޓްރާންސްލޭޓް ފުރަތަމަ ތައާރަފުކުރީ 2006 ވަނަ އަހަރުއެވެ. ފެށުނުއިރު ލަފުޒުން ލަފުޒަށް ތަރުޖަމާކުރުމަށް އިސްކަންދިން ނަމަވެސް، 2016 ވަނަ އަހަރުން ފެށިގެން 'ނިއުރަލް މެޝިން ޓްރާންސްލޭޝަން' ބޭނުންކުރަން ފެށުމާއެކު، މުޅި ޖުމްލައިގެ މާނަ ދެނެގަތުމުގެ ގާބިލިއްޔަތު އެ އެޕްލިކޭޝަނަށް ވަނީ ލިބިފައެވެ. މިހާރު ގޫގުލްއިން އަމާޒު ހިފާފައިވަނީ ޖެނެރޭޓިވް އޭއައި ބޭނުންކޮށްގެން، ބަސްބަހުގެ ތަފާތު ބަހުރުވަތަކާއި، ސަގާފީ ގޮތުން ހުންނަ ހާއްސަ މާނަތައް ނުވަތަ އިސްތިލާހީ ބަސްތައް ދެނެގަނެ، އިންސާނުން ވާހަކަދައްކާ ފަދަ ގުދުރަތީ ބަސްމަގަކަށް ތަރުޖަމާކުރުމުގެ ހިދުމަތް ފުޅާކުރުމަށެވެ. މީގެ އިތުރުން، 2022 ވަނަ އަހަރުން ފެށިގެން ދިވެހިބަސް ވެސް ވަނީ މި ހިދުމަތުގައި ހިމަނާފައެވެ.