އިރާނުގެ ޑްރޯން ހަމަލާއެއް އަމާޒުވެ ސައުދީ އަރަމްކޯގެ އެންމެ ބޮޑު އެއް ތެޔޮ ސާފުކުރާ ކާރުހާނާ ކަމަށްވާ ރަސް ޓަނޫރާގެ މަސައްކަތް ހުއްޓާލައިފި އެވެ.
ސައުދީ އަރަބިއްޔާގެ ޑިފެންސް މިނިސްޓްރީގެ ތަރުޖަމާނު އަލް އަރަބިޔާ ޓީވީއަށް މައުލޫމާތު ދިން ގޮތުގައި ދެ ޑްރޯނެއް ވަނީ މި ކާރުހަނާ ކައިރިން ވައްޓާލާފަ އެވެ.
ޑްރޯންތައް ވައްޓާލުމުން އަލިފާންގަނޑެއް ރޯވި ކަމަށާއި ނަމަވެސް އެ އަލިފާންގަނޑު އެއްކޮށް ނިއްވާލާފައިވާ ކަމަށް ސައުދީގެ އިދާރާތަކުން ބުނެ އެވެ. އަރަމްކޯއިން މިހާތަނަށް މިކަމުގައި ރަސްމީ ބަހެއް ބުނެފައި ނުވެ އެވެ.
ކާރުހާނާގެ މަސައްކަތް ހުއްޓާލައި ވަގުތީ ގޮތުން ބަންދުކުރީ ލިބުނު ގެއްލުންތައް ދެނެގަތުމުގެ ގޮތުންނެވެ.
އެމެރިކާ އާއި އިޒްރޭލުން އިސްވެ އިރާނަށް ހަމަލާދީ ހަނގުރާމައެއް ފެށުމާ ގުޅިގެން ދުނިޔޭގެ ތެލުގެ ބާޒާރަށް ލޮޅުންތަކެއް ވަނީ އަރާފަ އެވެ. މާކެޓުތައް ހުޅުވި ފުރަތަމަ ދުވަހު ވެސް 10 ޕަސެންޓުން ތެލުގެ އަގު ވަނީ ބޮޑުވެފަ އެވެ.
ރަސް ޓަނޫރާ ކާރުހަނާއަކީ ދުވާލެއްގެ މައްޗަށް 550،000 ފީފާގެ ތެޔޮ ސާފުކުރުމުގެ ގާބިލުކަން ލިބިފައިވާ ކާރުހާނާއެކެވެ. މިއީ ތެޔޮ ސާފުކުރާ ދުނިޔޭގެ އެންމެ ބޮޑެތި ކާރުހާނާތަކުގެ ތެރޭގައި ހިމެނޭ ތަނެކެވެ.