ސައުދީ އަރަބިއާގެ ދައުލަތުގެ ތެޔޮ އުފައްދާ ކުންފުނި، އަރަމްކޯގެ ތެޔޮ ކާރުޚާނާއެއް ކަމަށްވާ، ރާސް ތަނޫރާއަށް ޑްރޯން ހަމަލާއެއް އަމާޒުވުމުން އެ ތަން ބަންދުކޮށްފައިވާ ކަމަށް ރޮއިޓާސް ނޫހުން ރިޕޯޓުކޮށްފިއެވެ. މަސްދަރުތަކާ ހަވާލާދީ ރޮއިޓާސް އިން ރިޕޯޓްކޮށްފައިވާ ގޮތުގައި މިއަދު ހެނދުނު އަމާޒުވި އެ ހަމަލާގެ ސަބަބުން ދުވާލަކު 550،000 ފީފާ އުފައްދާ އެ ކާރުޚާނާގެ މަސައްކަތްތައް ވަގުތީ ގޮތުން ހުއްޓިފައިވާއިރު، މިއީ ފާއިތުވެދިޔަ ދުވަސްތަކުގައި އެ ކާރުޚާނާއަށް ކުރިމަތިވި މިފަދަ ދެވަނަ ހާދިސާއެވެ. ކާރުޚާނާ ބަންދުކުރީ މެދުއިރުމަތީގައި މިހާރު ހިނގަމުންދާ ހަނގުރާމައިގެ ތެރޭގައި އެ ކާރުޚާނާއަށް އަމާޒުވި ހަމަލާއެއްގެ ސަބަބުން ކަމަށް ބުލޫމްބާގް އާއި ރޮއިޓާސްއިން ވެސް ރިޕޯޓުކޮށްފައިވެއެވެ. އެ ހާދިސާއާ ގުޅޭ ގޮތުން އަރަމްކޯގެ ބަހެއް އަދި ނުލިބޭ ކަމަށް ބްލޫމްބާގް އާއި ރޮއިޓާސްއިން ރިޕޯޓްކޮށްފައިވެއެވެ. އެ ހަމަލާ އަމާޒުވުމުގެ ކުރިން ހުއްޓުވައި ނައްތާލާފައިވާ ކަމަށް ސައުދީގެ ދައުލަތުގެ ނޫހެއް ކަމަށްވާ، އެސްޕީއޭ ނޫހާއި އަލް ޖަޒީރާއިން ރިޕޯޓުކޮށްފައިވެއެވެ. އަދި ޑްރޯން ވައްޓާލުމުގެ ތެރޭގައި ކޮންމެވެސް ވަރެއްގެ އަލިފާނުގެ ހާދިސާއެއް ހިނގާފައިވާ ކަމަށާއި އާންމުންގެ އެއްވެސް މީހަކަށް އަނިޔާ ލިބިފައި ނުވާ ކަމަށް އެ ނޫހާ ހަވާލާދީ އަލް ޖަޒީރާއިން ރިޕޯޓުކޮށްފައިވެއެވެ. ގަލްފް ކަނޑުގެ އައްސޭރީގައި އޮންނަ ރާސް ތަނޫރާގައި ދުނިޔޭގެ އެންމެ ބޮޑު އެއް ތެޔޮ އެކްސްޕޯޓް ޓާމިނަލް އާއި ބޮޑު ރިފައިނިން ފެސިލިޓީއެއް ހުރެއެވެ. ސައުދީ ކްރޫޑް އެކްސްޕޯޓްގެ ބޮޑު ބައެއް މި ބަނދަރުން ކުރާއިރު، އާންމުކޮށް މުދާ ދަތުރުކުރަނީ ޗައިނާ، ޖަޕާން އަދި ދެކުނު ކޮރެއާ އާއި ޔޫރަޕާއި އޭޝިއާގެ މުހިންމު މާކެޓްތަކަށެވެ.