ސަރަހައްދީ ހަމަނުޖެހުންތައް އިތުރަށް ވަރުގަދަވަމުންދާ ދަނޑިވަޅެއްގައި، ރޭ ފަތިހުގެ ވަގުތެއްގައި އެމެރިކާގެ އަސްކަރީ މަތިންދާބޯޓުތަކެއް ކުވެއިތަށް ވެއްޓިފައިވާ ކަމަށް އެ ގައުމުގެ ޑިފެންސް މިނިސްޓްރީން ހާމަކޮށްފި އެވެ.
މި ހާދިސާގައި ބޯޓުތަކުން ދަތުރުކުރި އެންމެން ސަލާމަތްވެފައިވާއިރު، އެ މީހުންގެ ހާލު ރަނގަޅު ކަމަށް ވެސް އެ މިނިސްޓްރީން ބުނެފައިވެ އެވެ.
ކުވެއިތުގެ ޑިފެންސް މިނިސްޓްރީން ބުނި ގޮތުގައި، އެމެރިކާގެ ސިފައިންނާ ގުޅިގެން ހިންގި ހާއްސަ އޮޕަރޭޝަނެއްގައި ބޯޓުގެ ފަޅުވެރިން ވަނީ ސަލާމަތްކޮށް ހޮސްޕިޓަލަށް ގެންގޮސްފަ އެވެ. ނަމަވެސް، ވެއްޓުނީ ކިތައް ބޯޓު ކަމެއް އެ ގައުމަކުން ހާމައެއް ނުކުރެ އެވެ.
އީރާނުގެ ރިވޮލިއުޝަނަރީ ގާޑްސްއާ ހަވާލާދީ އެ ގައުމުގެ ދައުލަތުގެ މީޑިއާއިން ބުނެފައިވަނީ، ކުވެއިތަށް ވެއްޓުނު އެމެރިކާގެ ބޯޓުތަކަށް ހަމަލާދިނީ އީރާނުގެ ސިފައިން ކަމަށެވެ. ނަމަވެސް، އެމެރިކާ ނުވަތަ ކުވެއިތުގެ ކަމާ ބެހޭ އިދާރާތަކުން މިކަން ކަށަވަރުކޮށްދީފައެއް ނުވެ އެވެ.
މީގެ އިތުރުން، ކުވެއިތު ސިޓީގައި ހުންނަ އެމެރިކާ އެމްބަސީ ކައިރިން ދުން އަރަމުންދާ މަންޒަރު ފެނިފައިވާ ކަމަށާއި އެ ސަރަހައްދުގައި ފަޔަ ފައިޓަރުންނާއި އެމްބިއުލާންސްތައް ހަރަކާތްތެރިވަމުންދާ ކަމަށް ރޮއިޓާސްގެ މަންދޫބަކު ރިޕޯޓުކޮށްފައިވެ އެވެ.
މި ހާދިސާއާ ގުޅޭ ގޮތުން އެމެރިކާގެ އޮފިޝަލުން އަދި ވަކި އެއްޗެއް ބުނެފައެއް ނުވެ އެވެ.
އީރާނަށް އެމެރިކާ އާއި އިޒްރޭލުން ދިން ހަމަލާތަކުގެ ބަދަލުހިފުމުގެ ގޮތުން ގަލްފުގެ ގައުމުތަކަށް އަމާޒުކޮށް އީރާނުން ދެމުންދާ ހަމަލާތަކުގެ ތިންވަނަ ދުވަހު، ކުވެއިތުން ވަނީ އެ ގައުމަށް ފޮނުވާލި ޑްރޯންތަކެއް ވައްޓާލާފަ އެވެ. ކުވެއިތުގެ ނޭޝަނަލް ޕެޓްރޯލިއަމް ކޮމްޕެނީން ބުނި ގޮތުގައި، މީނާ އަލް-އަހުމަދީ ރިފައިނަރީ ސަރަހައްދަށް ވެއްޓުނު ބައިތަކުގެ ސަބަބުން ދެ މަސައްކަތްތެރިއަކަށް ކުދި އަނިޔާތަކެއް ލިބިފައިވެ އެވެ.
އެމެރިކާ އެމްބަސީން ވަނީ މިސައިލާއި ޑްރޯން ހަމަލާތަކުގެ ނުރައްކާ އޮތްކަމުގެ އިންޒާރު ދީ، އެމެރިކާގެ ރައްޔިތުން ރައްކާތެރި ތަންތަނުގައި މަޑުކުރުމަށް އިލްތިމާސްކޮށްފަ އެވެ.
ދުބާއީ އާއި ދޯހާއިން ވެސް ބާރުގަދަ ގޮވުންތަކެއްގެ އަޑު އިވިފައިވާ ކަމަށް ރިޕޯޓުތައް ބުނާއިރު، މިއީ އީރާނުގެ ހަމަލާތަކުގެ ސަބަބުން މެދުއިރުމަތީގެ ވައިގެ ދަތުރުފަތުރާއި ވިޔަފާރީގެ މައި މަރުކަޒުތަކަށް ކުރިމަތިވަމުންދާ ނުރައްކާ ބޮޑުވަމުންދާ ކަމުގެ ހެއްކެކެވެ.