ކުވައިތު (2 މާޗް 2026) : އެމެރިކާގެ ގިނަ އަދަދެއްގެ ފައިޓާޖެޓް ކުވައިތައް ވެއްޓެމުންދާކަން ކުވައިތުގެ ސަރުކާރުން ކަށަވަރުކޮށްދީފިއެވެ. ކުވައިތުގެ ދިފާއީ ވުޒާރާ ބުނާގޮތުން އެ ގައުމުގެ އެތެރެއަށް އެމެރިކާގެ ފައިޓާޖެތްތައް ވެއްޓެމުންދާއިރު އެ ޖެޓްތަކުގެ ފަހަތުބައިގައިވަނީ އަލިފާން ހިފާފައެވެ. އެމެރިކާގެ ހަނގުރާމަ މަތީ ޖެޓްތައް ވެއްޓެމުންދަނީ އެނބުރެމުން ސެނބުރެމުން ވެއްޓޭ ގުޑި ނުވަތަ މަޑިފަދަ ތަކެތި ވެއްޓޭ ގޮތަށް ކަމަށާއި ނަމަވެސް މިހާތަނަށް ވެއްޓިފައިވާ ޖެޓްތަކުގެ ޕައިލެޓުން ވަނީ ވައިކުޑާގައި ފުންމާލައިގެން ފުރާނަ ސަލާމަތް ކޮށްފައި ކަމަށް ކުވައިތުން ބުނެއެވެ. އެމެރިކާގެ ޖެޓްތައް ވެއްޓެމުންދާލެއް ގިނަކަމުން މިއީ ކިހިނެތް ވަމުންދާ ކަމެއްތޯ ކުވައިތުގައިވާ އެމެރިކާގެ އަސްކަރީ ބޭސްތަކުގެ ކޮމާންޑް އާ ސުވާލުކުރަމުންދާކަންވެސް ކުވައިތުގެ ދިފާއީ ވުޒާރާއިން ނެރުނު ބަޔާނެއް ބުނެއެވެ. ނަމަވެސް ވެއްޓުނު އެެމެރިކާގެ ފައިޓާޖެޓްތަކުގެ އަދަދެއް ކުވައިތުން ހާމަކޮށްފައެއް ނުވެއެވެ. ކުވައިތުން ވަނީ އެމެރިކާގެ ޖެޓްތައް ވެއްޓެމުންދާ މަންޒަރު ދައްކުވައިދޭ ވީޑިއޯ އެއްވެސް އާންމުކޮށްފައެވެ. އީރާނުން ވަނީ އެމެރިކާގެ ފައިޓާ ޖެޓްތަކަށް މިއަދު ހަމަލާތަކެއް ދިންކަން ހާމަކޮށްފައެވެ. އަދި ރިޕޯޓްތައް ބުނާގޮތުން އީރާން ވަނީ އައުބާވަތެއްގެ އެންޓި ޑިފެންސް ސިސްޓަމެއް އީރާނަށް ބޮންއަޅާ އެމެރިކާގެ ފައިޓާޖެޓް ތަކާ ދެކޮޅަށް ބޭނުންކުރަން ފަށާފައެވެ. އެމެރިކާގެ ޖެޓްތައް ވެއްޓެމުންދާ މައްސަލާގައި އެމެރިކާގެ އަސްކަރީ ކޮމާންޑުން އަދި އެއްވެސް އެއްޗެއް ބުނެފައެއް ނުވެއެވެ.