އީރާނުގެ ދެކުނުގެ ސްކޫލަކަށް ދިން ހަމަލާގައި މަރުވި ކުދިންގެ އަދަދު ބޮޑެތި މީހުންނާ އެކު 153 އަށް އަރާފައިވާ ކަމަށް އީރާނުން ބުނެފި އެވެ.
އީރާނުން ތުހުމަތު ކުރަނީ އެ ހަމަލާއަކީ އެމެރިކާ އާއި އިޒްރޭލުން ދިން ހަމަލާއެއް ކަމަށެވެ. ނަމަވެސް އެމެރިކާގެ އަސްކަރިއްޔާގެ ސެންޓްރަލް ކޮމާންޑުން ބުނީ އެ ހާދިސާގެ ރިޕޯޓުތައް ތަހުގީގު ކުރަމުން އަންނަ ކަމަށެވެ. އަދި އިޒުރޭލުގެ އަސްކަރިއްޔާ އިން ބުނީ އެ އެ މީހުންގެ އޮޕަރޭޝަނެއް އެ ސަރަހައްދުގައި ހިންގިކަން އެނގިފައި ނުވާ ކަމަށެވެ.
އަންހެން ކުދިންގެ ސްކޫލް ހުންނަނީ މިނާބްގަ އެވެ. އެތަން ހުންނަނީ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ)ގެ މަރުކަޒެއް ކައިރީގަ އެވެ.
އީރާނުގެ ރެޑް ކްރެސެންޓުން ބުނީ ހޮނިހިރު ދުވަހުން ފެށިގެން މިހާތަނަށް އީރާނަށް ދިން ވައިގެ ހަމަލާތަކުގައި 201 މީހުން މަރުވެ، 747 މީހުން ޒަހަމްވެފައިވާ ކަމަށެވެ.
އީރާނުގެ ރައީސް މަސްއޫދު ޕެޒެޝްކިއަން ވިދާޅުވީ އެއީ ވަރަށް "ނާތަހުޒީބު އަމަލެއް" ކަމަށެވެ. އަދި މިއީ އެ މީހުން ކުރި އެތައް ޖަރީމާއެއްގެ ރެކޯޑުގައި ހިމެނޭ އަނދިރި ސޮފުހާއެއް ކަމަށެވެ.
ސެންޓްކޮމްގެ ތަރުޖަމާން ޓިމް ހޯކިންސް ވިދާޅުވީ އެ ރިޕޯޓުތައް ސީރިއަސްކޮށް ބަލާނެ ކަމަށެވެ.
އެ ހާދިސާއާ ގުޅިގެން ޖެނީވާގައި ހުންނަ ރެޑް ކްރޮސް އާއި ރެޑް ކްރެސެންޓްގެ އޮފިޝަލުން ބުނީ އެ ޖަމާއަތުން އެ ސްކޫލަށް ދިއުމަށް ނިންމާފައިވާ ކަމަށެވެ.
އީރާންގެ އޮފިޝަލަކު ވިދާޅުވީ ހޮރްމޮޒްގަން ޕްރޮވިންސްގެ މިނާބް ޓައުންގައި ހުންނަ އެ ސްކޫލަށް އަމާޒުކޮށް ތިން މިސައިލް ހަމަލާއެއް ދީފައިވާ ކަމަށެވެ.
ބީބީސީން ވަނީ އެ ހާދިސާގެ ވީޑިއޯތައް ކަށަވަރު ކޮށްދީފަ އެވެ. އެ ވީޑިއޯ އިން ފެންނަ ގޮތުގައި އިމާރާތަކުން ދުން އަރަމުން ދާއިރު، އެ ސަރަހައްދުގައި މީހުން އެއްވެ ބިރުން ހަޅޭއްލަވާ އަޑު އިވެ އެވެ.