މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން މި އަހަރަށް، ގިނަ ހަރަކާތްތަކެއް ރާވައި، 14 މިލިއަން ރުފިޔާގެ ބަޖެޓެއް ފާސްކޮށްފި އެވެ.
ދާދި ފަހުން ބޭއްވި އެމްބީބީއޭގެ އަހަރީ އާންމު ޖަލްސާ، އެ އެސޯސިއޭޝަނުން ވޯޓުލެވޭ ޖުމްލަ، 13 މެންބަރުންނާ އެކު ވަނީ ކުރިއަށްގެންގޮސްފަ އެވެ. މި ޖަލްސާގައި އެމްބީބީއޭ އިން މި އަހަރަށް ލަފާކޮށްފައިވާ ބަޖެޓް ކަމަށްވާ 14،360،121.33 ވަނީ ހުރިހާ މެމްބަރުންގެ އިއްތިފާގުން ފާސްކޮށްފަ އެވެ.
މި އަހަރަށް އެސޯސިއޭޝަނުން އެންމެ ބޮޑު ހަރަދެއްގެ ގޮތުގައި ހިނގާނެ ކަމަށް ބަޖެޓްގައި ހިމަނާފައިވަނީ މޯލްޑިވްސް ޕްރޯ އަށެވެ. ދުނިޔޭގެ ބޮޑީބޯޑިން އިދާރާ، އަައިބީސީއާ އެކު، މީގެ ކުރިން ރާއްޖޭގައި މޯލްޑިވްސް ޕްރޯގެ ކާމިޔާބު މުބާރާތްތަކެއް ބާއްވާފައިވާއިރު، މި އަހަރު އެ މުބާރާތް ހޯސްޓްކުރުމަށް އެމްބީބީއޭ އިން އަންނަނީ ސަރުކާރާ އެކު މަޝްވަރާކުރަމުންނެވެ.
މިދިޔަ އަހަރެކޭ އެއްގޮތަށް މި އަހަރު ވެސް، ގައުމީ ބޮޑީބޯޑިން ލީގުގެ އިތުރުން، ޒުވާން ބޮޑީބޯޑަރުން އުފެއްދުމަށްޓަކައި، ކުރިއަށްގެންދާ "ހުދުފޮނު" ޕްރޮގްރާމްގެ ހަރަކާތްތައް އޮންނާނެ އެވެ. މިދިޔަ އަހަރުތަކުގެ މި ޕްރޮގްރާމްގެ ސަބަބުން ގައުމީ ލެވަލަށް އަންނަން ބޮޑީބޯޑަރުންނަށް މަގުކޮށިގެންދިޔަ އެވެ.
އަހަރީ އާންމު ޖަލްސާގައި ވާހަަކަ ދައްކަވަމުން، އެމްބީބީއޭގެ ރައީސް، ހުސެއިން ނިޒާމް (ނިޒޯ)، ވަނީ އެސޯސިއޭޝަނަށް ލިބެމުން އަންނަ ކާމިޔާބީތައް އިތުރަށް ކުރިއަށްގެންދިއުމަށް މަސައްކަތް ކުރަމުން އަންނަ ކަމަށް ވިދާޅުވެފަ އެވެ.