އިޒްރޭލާއި އީރާނާ ދެމެދު ހިނގަމުންދާ ހަމަނުޖެހުންތަކާ ގުޅިގެން، ދުނިޔޭގެ ވައިގެ ދަތުރުފަތުރުގެ އެންމެ ބާރުބޮޑު އެއް ސަރަހައްދު ކަމަށްވާ މެދުއިރުމަތީގެ މުހިންމު ވައިގެ ބަނދަރުތައް ބަންދުކުރުމުން، އޭޝިއާ އާއި ޔޫރަޕާ ދެމެދު ދަތުރުކުރާ ފްލައިޓްތަކުގެ ޓިކެޓްތައް ހުސްވެ، އަގުތައް އިންތިހާއަށް ބޮޑުވެއްޖެ އެވެ.
ދުނިޔޭގެ އެންމެ ބާރުބޮޑު އެއް އެއާޕޯޓް ކަމަށްވާ ދުބާއީ އިންޓަނޭޝަނަލް އެއާޕޯޓް ހިމެނޭހެން މެދުއިރުމަތީގެ ބޮޑެތި ހަބްތައް ބަންދުކޮށްފައި އޮންނާތާ މިއަދަށް ހަތަރު ދުވަސް ވެފައިވާއިރު، މީގެ ސަބަބުން ހާއްސަކޮށް އޮސްޓްރޭލިއާ އާއި ޔޫރަޕާ ދެމެދު ދަތުރުކުރާ ފްލައިޓްތަކުގެ ޖާގަ ވަނީ ވަރަށް ބޮޑަށް މަދުވެފަ އެވެ. އާންމު ހާލަތުގައި ދުބާއީ އެއާޕޯޓުން ދުވާލަކު 1،000އަށް ވުރެ ގިނަ ފްލައިޓް ދަތުރުކުރެ އެވެ.
އޮސްޓްރޭލިއާގެ ފްލައިޓް ސެންޓަރު ޓްރެވަލް ގްރޫޕުން ބުނި ގޮތުގައި، މި ދަނޑިވަޅުގައި ކަސްޓަމަރުންގެ ކޯލްތައް ވަނީ %75 އިތުރުވެފަ އެވެ. އެ ގްރޫޕުގެ ގްލޯބަލް މެނޭޖިން ޑައިރެކްޓަރު އެންޑްރޫ ސްޓާކް ވިދާޅުވީ، އޮސްޓްރޭލިއާގެ ރައްޔިތުން މިހާރު ޗައިނާ، ސިންގަޕޫރު އަދި އޭޝިއާގެ އެހެން ސަރަހައްދުތަކާއި އުތުރު އެމެރިކާ މެދުވެރިކޮށް ޔޫރަޕަށް ދިއުމަށް ފްލައިޓްތައް ބަދަލުކުރަމުންދާ ކަމަށެވެ.
މެދުއިރުމަތީގެ ވައިގެ ސަރަހައްދު ދޫކޮށް، އުތުރުން ކޮކޭސަސް ސަރަހައްދުން ނުވަތަ ދެކުނުން މިސްރާއި އޮމާން މަގުން ދަތުރުކުރާ އެއާލައިންތަކުގެ ހިދުމަތް މެދުނުކެނޑި ކުރިއަށްދިޔަ ނަމަވެސް، ދަތުރުގެ ރާސްތާ ދިގުވުމުގެ ސަބަބުން ތެލުގެ ހަރަދު ވަނީ ބޮޑުވެފަ އެވެ.
އެސޯސިއޭޝަން އޮފް އޭޝިއާ ޕެސިފިކް އެއާލައިންސްގެ ސުބާސް މެނަން ވިދާޅުވީ، މުޅި މެދުއިރުމަތީގެ ވައިގެ ސަރަހައްދު ބަންދުވުމަކީ އެއާލައިންތަކަށް ކުރިމަތިވި ވަރަށް ބޮޑު ހަރަދެއް ކަމަށާއި، މީގެ އެންމެ ބޮޑު ނޭދެވޭ އަސަރެއް ކުރާނީ ދަތުރުފަތުރުގެ ގުޅުންތަކަށް ކަމަށެވެ.
އޮންލައިން ޓިކެޓިން ސައިޓްތަކުން ދައްކާ ގޮތުގައި، މި ދުވަސްވަރު ޓިކެޓް ލިބުން ދަތިވެ އަގުތައް ވަނީ އާދަޔާ ހިލާފަށް އުފުލިފަ އެވެ.
އެގޮތުން، ކެތޭ ޕެސިފިކްގެ ހޮންކޮންގް-ލަންޑަން އެއްކޮޅު ޓިކެޓެއްގެ އަގު މިހާރު 21،000 ހޮންކޮންގް ޑޮލަރު (2,705 ޑޮލަރު)އަށް ވުރެ މަތީގައި ހުރިއިރު، ގްވާންޓަސް އެއާލައިނުން ސިޑްނީ އާއި ލަންޑަނާ ދެމެދު ކުރާ ދަތުރުތަކުގެ އިކޮނޮމީ ކްލާސްގެ ހުރިހާ ޖާގައެއް މި މަހުގެ މެދަކާ ހަމައަށް ވަނީ ހުސްވެފަ އެވެ. ތައި އެއާވޭސް އާއި އޭޝިއާގެ އެހެން އެއާލައިންތަކުން ވެސް ވަނީ ޔޫރަޕަށް ކުރާ ދަތުރުތައް ފުރިފައިވާ ކަމަށް ރިޕޯޓްކޮށްފަ އެވެ.
ދާއިރާގެ ތަޖުރިބާކާރުން ލަފާކުރާ ގޮތުގައި، ސިންގަޕޯ އެއާލައިންސް އާއި ޓާކިޝް އެއާލައިންސް ފަދަ ސީދާ ދަތުރުތައް ކުރާ ނުވަތަ އެހެން ހަބްތައް ބޭނުންކުރާ އެއާލައިންތަކަށް ވަގުތީ ކުރިއެރުމެއް ލިބިދާނެ އެވެ. ނަމަވެސް މި ހަމަނުޖެހުންތައް ދިގުލައިގެން ގޮސްފި ނަމަ، މުޅި މާކެޓުގައި ޓިކެޓްގެ އަގުތައް އިތުރަށް އުފުލިގެންދާނެ ކަމަށް ބެލެވެ އެވެ.