އަންނަ އެޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ އިންތިހާބުތަކުގައި ވޯޓުލުމަށް ރަޖިސްޓަރީ ކޮށްފައިވާ ފޮށީގެ މަޢުލޫމާތު ހިމެނޭ ރަޖިސްޓަރީއަށް ޝަކުވާ ހުށަހެޅުމުގެ ފުރުސަތު ހުޅުވާލައިފިއެވެ.
އީސީން ބުނީ މިއަދުން ފެށިގެން ޝަކުވާ ހުށަހެޅުމުގެ މުއްދަތު 4 މާރިޗް ވާ ބުދަ ދުވަހުގެ މެންދުރުފަހު 1:30 ގެ ނިޔަލަށް ހުޅުވާލާފައިވާ ކަމަށެވެ.
ވޯޓުލާން ރަޖިސްޓަރީކޮށްފައިވާ ފޮށީގެ މަޢުލޫމާތާއި ގުޅިގެން ޝަކުވާ ހުށަހަޅަން ބޭނުންވާ ފަރާތްތަކުން، ޝަކުވާ ހުށަހަޅަންޖެހޭނީ އޮންލައިންކޮށް، އިލެކްޝަންސް ކޮމިޝަނުގެ މައިޕޯޓަލް މެދުވެރިކޮށެވެ.
ރަޖިސްޓަރީވެފައިވާ ފޮށީގެ މައުލޫމާތު ޗެކްކުރަން ބޭނުންވާ ފަރާތްތަކަށް އެސްއެމްއެސް މެދުވެރިކޮށް އެ މައުލޫމާތު ސާފުކުރެވޭނެ ކަމަށް އީސީން ވަނީ ބުނެފައެވެ. އަދި 1414އަށް މެސެޖު ކުރުމުންވެސް މައުލޫމާތު ލިބޭނެއެވެ. މީގެ އިތުރުން ކޮމިޝަނުގެ ރަޖިސްޓަރޭޝަން ޕޯޓަލް މެދުވެރިކޮށްވެސް މައުލޫމާތު ޗެކްކުރެވޭނެއެވެ.