ކުރިއަށް އޮތް ކައުންސިލް އިންތިހާބާ އެކު ބާއްވާ ރައްޔިތުންގެ ހިޔާލު ހޯދުމުގެ ވޯޓަކީ ގާނޫނުއަސާސީއަށް ގެންނަން އުޅޭ ބަގާވާތެއްގެ ގޮތުގައި ކުރީގެ ރައީސް އިބްރާހިމް މުހައްމަދު ސޯލިހް ރޭ ސިފަ ކުރައްވައިފި އެވެ.
ވީ ކިހިނެއް؟ - މިހާރު އޮތް 20 ވަނަ މަޖިލީހުގެ ދައުރު ކުރުކޮށް، ރިޔާސީ އިންތިހާބާއި މަޖިލިސް އިންތިހާބު އެއް ދުވަހެއްގައި ބޭއްވުމަށް ފެނޭތޯ ނެގުމަށް ބާއްވާ ހިޔާލު ހޯދުމުގެ ވޯޓާ ގުޅޭ ގޮތުން ކަންބޮޑުވުން ފާޅުކުރައްވައި ސޯލިހް ވާހަކަ ދެއްކެވީ ރޭ އެމްޑީޕީން ބޭއްވި ހަރުގެ ޖަލްސާގަ އެވެ.
ތަފްސީލު - ޖަލްސާގައި ވާހަކަ ފައްޓަމުން ސޯލިހް ވިދާޅުވީ، ދެ އިންތިހާބު އެއްކޮށްލުމަށް ފެނޭތޯ ބެލުމަށް ނަގާ މި ވޯޓަކީ މާ ބޮޑެތި މަޝްވަރާތަކެއް ނެތި، "ސިއްރު ސިއްރުން" ގާނޫނުއަސާސީ އަވަސް އަރުވާލައިގެން އިސްލާހުކޮށްގެން ކުރަން އުޅޭ ކަމެއް ކަމަށެވެ. އަދި އެ ވޯޓުގައި ރައްޔިތުން ބޮޑުތަނުން ނޫނެކޭ ބުނަން ޖެހޭ ކަމަށް އެ މަނިކުފާނު ވިދާޅުވި އެވެ.
"[މިއީ] ގާނޫނުއަސާސީއަށް ގެންނަ ބޮޑު ބަގާވާތެއްގެ ވާހަކަ. އެހެން ނޫން ނަމަ، މި [ކައުންސިލް] އިންތިހާބުގެ ފަހަތުގައި ސިއްރުން މި ވޯޓާ ހިސާބަށް ގެންދާކަށް ނުޖެހޭނެ،" ސޯލިހް ވިދާޅުވި އެވެ.
ދެ އިންތިހާބު އެއް ތާރީހެއްގައި ބޭއްވުމަކީ ރައްޔިތުންގެ އަޑާއި ބާރުވެރިކަން ކަނޑުވާލުން ކަމަށް ސޯލިހް ވިދާޅުވި އެވެ. އަދި ސަރުކާރުން އުޅެނީ ބާރުތައް ޖަމާކޮށް، ހުދުމުހުތާރު ވެރިކަމަކާ ދިމާލަށް ރާއްޖެ ގެންދަން ކަމަށް އެ މަނިކުފާނު ވިދާޅުވި އެވެ.
މި ވޯޓަށް ނުނެކޭ ބުނަން ޖެހޭ ސަބަބުތަކުގެ ގޮތުގައި ސޯލިހް ފާހަގަ ކުރެއްވި ކަންކަމަކީ:
ހާމަކަން ބޮޑު ކަމެއް ނެތި، ފުޅާ ދާއިރާއެއްގައި މަޝްވަރާ ނުކޮށް، ގާނޫނުއަސާސީއަށް އެ އިސްލާހު ގެނައުމަށް މަޖިލީހުން ފާސް ކުރުން
މި މާއްދާއަށް އިސްލާހު ގެންނަނީ ކީއްވެގެންކަން އަދި މިކަމުގެ މައުލޫމާތުތައް ރައްޔިތުންނަށް އެ އިސްލާހު ހުށަހަޅާއިރު ސާފު ވާން ޖެހޭ؛ ހަރަދު ކުޑަ ކުރުމަށް ކަމަށް ސަރުކާރުން ބުނި ނަމަވެސް، އިންތިހާބަށް ކުރާ ހަރަދަކީ ނިސްބަތުން ބަލާއިރު ބޮޑު ހަރަދެއް ނޫން
"ހަރަދު ކުޑަ ކުރަންށޭ ކިޔާފައި މި ދެ އިންތިހާބު އެއްކޮށްލުމަކީ އެއްވެސް ހާލެއްގައި ކޮށްގެން ވާނެ ކަމެއް ނޫން. މީގެ ފަހަތުގައި ދެން އަންނަ ކަންތައްތައް [ނުވަތަ] މުޅި ނިޒާމަށް އެ އަރާ ލޮޅުން، ދެނެގަންނަން ޖެހޭ،" ސޯލިހް ވިދާޅުވި އެވެ.
އޭގެ އިތުރުން މި ވޯޓާ ގުޅިގެން ވިސްނަން ޖެހޭ ކަމެއްގެ ގޮތުގައި ސޯލިހް ފާހަގަ ކުރެއްވީ:
2013ގެ ފަހުން ބޭއްވި ކޮންމެ މަޖިލިސް އިންތިހާބެއްގައި ވެސް މަޖިލިސް އިންތިހާބު ކާމިޔާބުކޮށްފައި ވަނީ އޭރަކު ވެރިކަމުގައި ތިބޭ ބަޔަކު
އެހެން އެގޮތަށް ވަނީ، ވެރިކަމުގެ ނުފޫޒާއި ބާރު އެހާ ކައިރީގައި އޮތީ މަޖިލިސް އިންތިހާބު ކާމިޔާބު ކުުރުމަށް އޭރަކު ވެރިކަމުގައި ތިބޭ ބަޔަކަށް ފަސޭހަކަން
"އެހެންވީމަ ތިބޭފުޅުން ވިސްނަވާ ވެރިކަމުގައި ދެ އިންތިހާބު އެއްކޮލީމާ ދެން ވެގެންދާނެ ގޮތް. ވެރިކަމުގެ ބާރާއި ފައިސާ އާއި ވަޒީފާއާ އެކީގައި ނުކުމެވަޑައިގެން އެއްކޮށް މި އިންތިހާބު ބާއްވާފިއްޔާ އަޅުގަނޑު ދަންނަވާނީ، ވެރިކަމުގައި ހުންނަ މީހަކު މުޅި މަޖިލިސް އެކީގައި ނަންގަވާނެ،" ސޯލިހް ވިދާޅުވި އެވެ.
"ނަތީޖާއަކަށް ވެގެންދާނީ ސަރުކާރު ޖަވާބުދާރީކުރުވުމަށް އޮތް ފުރުސަތު މުޅިން ގެއްލިގެން ދާނީ. މަޖިލީހުގައި ތިއްބަވާނީ މުޅިން ވެސް ސަރުކާރު މެންބަރުން."
އޭގެ އިތުރުން ސޯލިހް ވިދާޅުވީ މިހާތަނަށް މި ގާނޫނުއަސާސީގެ ދަށުން ބޭއްވި އެއްވެސް އިންތިހާބެއްގައި އެއްވެސް ވެރިއަކު ދެވަނަ ދައުރެއް ހޯދުމަށް ނާކާމިޔާބުވެފައިވާ ކަމަށެވެ. އެހެންކަމުން މިއީ ރައީސް މުހައްމަދު މުއިއްޒަށް ލިބިވަޑައިގެންފާނެ "ލަނޑެއް"ގެ ގޮތުގައި ވެސް ވެދާނެ ކަމަށް ސޯލިހް ފާހަގަ ކުރެއްވި އެވެ.
މިކަމުގައި ދެވަނަ ވިސްނުމަކަށް ވަޑައިގެން، އިސްލާހު އަނބުރާ ގެންދެވުމަށް ރައީސް މުއިއްޒަށް ދަންނަވާ ކަމަށް ވެސް ސޯލިހް ވިދާޅުވި އެވެ.