އާބާދީ ކުޑަ މ. ރަތްމަންދޫގައި ދިރިއުޅޭ މީހުން، ކ. ތުލުސްދޫއަށް ބަދަލުވުމަށް ބޭނުންވާ 44 ބިން އެ ރަށުގެ ކައުންސިލުން ހަމަޖައްސައިދީފިއެވެ. ޕީއެސްއެމް ނިއުސްއަށް ދީފައިވާ އިންޓަވިއުއެއްގައި ހައުސިން މިނިސްޓްރީން ބުނެފައިވަނީ، ރަތްމަންދޫ ރައްޔިތުން ބަދަލު ކުރުމަށް ނިންމައިފަވަނީ ތުލުސްދޫއަށް ކަމަށެވެ. އެގޮތުން ރައްޔިތުން ތުލުސްދޫއަށް ބަދަލު ކުރުމުގެ މަސައްކަތް ކުރިއަށް ގެންދިއުމަށް 44 ގޯތި ހަމަޖައްސައި، އެކަން ތުލުސްދޫ ކައުންސިލުން މިނިސްޓްރީއަށް އަންގާފައި ވާކަމަށް ވަނީ މައުލޫމާތު ދީފައެވެ. އެ މަޝްރޫޢު ކުރިއަށް ގެންދިއުމަށްޓަކައި ކުރަންޖެހޭ މަސައްކަތްތައް މިނިސްޓްރީން މިހާރު ފަށާފައިވާކަން، ރަތްމަންދޫ ކައުންސިލަށް އަންގާފައި ވާކަމަށް ވެސް އެ މިނިސްޓްރީން ވަނީ ބުނެފައެވެ. ރަތްމަންދޫ ކައުންސިލުގެ ނައިބު ރައީސް ހުސައިން ޚަލީލް މިދިޔަ އޮކްޓޫބަރު މަހު 'ސަން'އަށް ވިދާޅުވީ، ރަތްމަންދޫގެ ޖުމްލަ އާބާދީއަކީ 240 ކަމަށެވެ. އެކަމަކު، އެ ވަގުތު ރަށުގައި ދިރިއުޅެނީ 80 މީހުން ކަމަށް އޭނާ ވިދާޅުވެފައިވެއެވެ. https://sun.mv/212897 ކުޑަ އާބާދީގެ ސަބަބުން ދިމާވާ ގޮންޖެހުންތަކުގެ ވާހަކަ ރަތްމަންދޫ ރައްޔިތުން ދައްކާތާ އެތައް ދުވަހެއްވެއްޖެއެވެ. އަސާސީ ހައްގުތަކުން މަހުރޫމްވެ، ރަށުގައި ދިރިއުޅެވޭނެ ދެމެހެއްޓެނިވި ގޮތެއް ނެތް ކަމަށް ބުނެ، އެ ރަށުން ވަނީ ކެމްޕޭނެއް ފަށައިފައެވެ. އަދި ރައީސް ޑރ. މުޙައްމަދު މުއިއްޒު މިދިޔަ ސެޕްޓެންބަރު މަހުގެ 22ގައި ރަތްމަންދުއަށް ވަޑައިގަތުމުން ވެސް ރައްޔިތުން ވަނީ އެ ކަންބޮޑުވުންތައް ހިއްސާކޮށްފައެވެ. ރައީސް އޭރު ވިދާޅުވީ އެ މައްސަލައަށް ދާއިމީ ހައްލެއް ހޯއްދަވައިދެއްވަން ބޭނުންވާ ކަމަށާއި، ރައްޔިތުން ބޭނުންވަނީ އެހެން ރަށަކަށް ހިޖުރަކުރަން ކަމަށްވާނަމަ ހައުސިން މަޝްރޫއެއް ފެށޭތޯ ބައްލަވައިދެއްވާނެ ކަމަށެވެ. އެއާއެކު އެ މަނިކުފާނު ވަނީ، ރަށުގެ އާބާދީގެ 80 އިންސައްތަ ބަދަލުވާން ބޭނުންވާކަން އަންގައިދިނުމަށް އެދިވަޑައިގެންފައެވެ. ރަތްމަންދޫ މީހުން އެދިފައިވަނީ މާލޭ ސަރަހައްދުގެ ރަށަކަށް ބަދަލުވުމަށެވެ. ރައީސް ވަނީ، ރަތްމަންދޫގެ ރައްޔިތުން އެހެން ރަަށަކަށް ހިޖުރަކުރަން ނިންމައިފިނަމަ، ގެދޮރު ބިނާކުރަން ފަށާތާ އެއްއަހަރުގެ ތެރޭގައި ރަތްމަންދޫ ރައްޔިތުން ބަދަލު ކޮށްދެއްވާނެ ކަމަށް ވިދާޅުވެފައެވެ. އެއްފަސްކުރުމުގެ މަސައްކަތުގެ ދަށުން ރައީސްގެ ތަަސައްވުރަކީ ރަށުގައި ރަޖިސްޓާކޮށްފައިވާ ކޮންމެ ގެއަކަށް، ބަދަލުވާ ރަށުގައި ތިން ކޮޓަރީގެ ގެއެއް އަޅައިދިނުން ކަމަށާއި ހިޖުރަކުރާ އާއިލާތަކަށް މިހާރު ދެމުންދާ 50،000ގެ އިނާޔަތް ރިވައިޒްކޮށް އަދަދު ބޮޑުކުރައްވާނެ ކަމަށް ވެސް އެމަނިކުފާނު ވިދާޅުވެފައިވެއެވެ. https://sun.mv/208032 ރަތްމަންދޫން މިގޮތަށް އެދިފައިވާއިރު އެ ރަށުގެ އާބާދީހާ ކުޑަ އާބާދީއެއް އޮންނަ އެހެން ބައެއް ރަށްރަށުން ވެސް ވަނީ އެހެން ރަށްތަކަށް ބަދަލުކުރުމަށް ސަރުކާރުގައި އެދިފައެވެ. އަދި މީގެ ކުރިން ބައެއް ރަށްރަށުގެ މީހުން ބަދަލުކޮށްފައި ވެސްވެއެވެ. މިދިޔަ 2022 ވަނަ އަހަރުގެ ބޯހިމެނުމުގެ ތަފާސްހިސާބުތަކަށް ބަލާއިރު, ދިރިއުޅޭ މީހުންގެ އަދަދު 500 އަށް ނާރާ 32 ރަށް ރާއްޖޭގައި އެބައޮތެވެ. އޭގެ ތެރެއިން ފަސް ރަށަކީ ދިރިއުޅޭ އާބާދީގައި 200 މީހުން ވެސް ހަމަ ނުވާ ރަށްތަކެވެ. އެއީ ރަތްމަންދޫގެ އިތުރުން ވ. ރަކީދޫ އާއި އދ. ދިއްދޫ އާއި ލ. މުންޑޫ އާއި ބ. ފެހެންދުއެވެ.