ބ. ފުޅަދޫގައި ނިވާކަން ކުޑަކޮށް ހެދުން އަޅައިގެން އާންމު ތަންތަނުގައި ފަތުރުވެރިން އުޅޭނަމަ، އެ ފަތުރުވެރިޔާއަށް ޚިދުމަތްދޭ ގެސްޓްހައުސްއެއް 750 ރުފިޔާއިން ޖޫރިމަނާކުރުމަށް އެ ރަށު ކައުންސިލުން ނިންމައިފިއެވެ. މިއަދު ފުޅަދޫ ކައުންސިލުން ނެރުނު އިއުލާނެއްގައި ވަނީ، އާންމު ތަންތަނުގައި ފަތުރުވެރިން ނިވާކަން ކުޑަ ހެދުން އަޅައިގެން އުޅޭ ކަމުގެ ޝަކުވާތައް ލިބެމުން އަންނަ ކަމަށެވެ. ތަކުރާރުކޮށް، އެ މައްސަލަ ހައްލުކުރުމަށް ކައުންސިލުން އެކި ފަހަރު މަތިން މަސައްކަތްކޮށްފައިވާ ކަމަށް ފުޅަދޫ ކައުންސިލުން ބުންޏެވެ. އެހެންވެ ކައުންސިލުން މިހާރު ވަނީ، އާންމު ތަންތަނުގައި ނިވާކަން ކުޑަ ހެދުން އަޅައިގެން ފަތުރުވެރިން އުޅޭނަމަ، އެ ފަތުރުވެރިޔާ ރަށަށް ގެނައި ގެސްޓްހައުސް 750 ރުފިޔާއިން ޖޫރިމަނާކުރުމަށް ނިންމައިފައެވެ. އެ ނިންމުމަށް މިއަދުން ފެށިގެން އަމަލުކުރަން ފަށާނެ ކަމަށް ފުޅަދޫ ކައުންސިލުން ބުނެފައިވެއެވެ. ތިން ސަތޭކަ ސާޅީހެއްހާ މީހުން ދިރިއުޅޭ ފުޅަދޫގައި ދިރިއުޅޭއިރު، އެ ރަށުގައި ގެސްޓްހައުސްގެ ވިޔަފާރި ފުޅާދާއިރާއެއްގައި ކުރެއެވެ. ފާހަގަކުރެވޭ ގޮތުގައި، އާންމު ތަންތަނުގައި ބިކިނީގައި އުޅުން ފަދަ ނިވާކަން ކުޑަކޮށް ހެދުން އަޅައިގެން އުޅޭނަމަ ފިޔަވަޅު އަޅައިދިނުމަށް އެދި، ރައްޔިތުންގެ މަޖިލީހުގެ އޮންލައިން ޕޯޓަލްއަށް ޕެޓިޝަނެއް ވަނީ ހުށަހަޅާފައެވެ.