ބ. ފުޅަދޫގައި ނިވާކަން ކުޑަކޮށް ހެދުން އަޅައިގެން އާންމު ތަންތަނުގައި ފަތުރުވެރިން އުޅޭނަމަ، އެ ފަތުރުވެރިޔާއަށް ޚިދުމަތްދޭ ގެސްޓްހައުސްއެއް 750 ރުފިޔާއިން ޖޫރިމަނާކުރުމަށް އެ ރަށު ކައުންސިލުން ނިންމައިފިއެވެ.އެ ރަށުގެ އާންމު ތަންތަނުގައި ފަތުރުވެރިން އާންމު މިންގަނޑުތަކާ ހިލާފަށް ހެދުން އަޅައިގެން އުޅޭ ކަމުގެ ޝަކުވާ އެ ރަށު ކައުންސިލަށް ލިބުމާ ގުޅިގެން މިއަދު އިނގިރޭސި ބަހުންނާއި ދިވެހި ބަހުން ވެސް އިއުލާނެއް ނެރެފައިވެ އެވެ.ފުޅަދޫ ކައުންސިލުން މިއަދު ނެރުނު އިއުލާނުގައި ބުނީ ކައުންސިލްގެ ޖަލްސާއިން ނިންމާފައިވަނީ، ކުރިއަށް އޮތް ތަނުގައި އެ ގޮތަށް އާންމު މިންގަނޑުން ބޭރުން ފަތުރުވެރިއަކު ހެދުން އަޅައިގެން އުޅޭ ނަމަ އޭނާ ނިސްބަތްވާ ގެސްޓްހައުސް ބަލައި އެ ގެސްޓްހައުސްއެއް 750ރ. އިން ޖޫރިމަނާކުރުމަށެވެ.އެފަދަ މައްސަލަތައް ފެންމަތިވަނީ ލޯކަލް ޓޫރިޒަމް ކުރިއަރަމުން އަންނަ ރަށްރަށުގަ އެވެ. އަދި އެ ރަށްރަށުގައި ޓޫރިސްޓުންނަށް ހާއްސަ ސަރަހައްދުތައް ކަނޑައަޅާފައި ހުއްޓަސް، ރަށު ތެރޭގައި ވެސް އިޖުތިމާއީ މިންގަނޑާ ހިލާފަށް ހެދުން އަޅައިގެން ޓޫރިސްޓުން އުޅޭ މައްސަލަ ވެސް ފެންމަތިވެ އެވެ.ގެސްޓްހައުސްގެ ވިޔަފާރި ފުޅާވެފައިވާ ރަށްރަށުގައި ފަތުރުވެރިންގެ ހެދުން އެޅުން ހުންނަ ގޮތާ ގުޅޭ ގޮތުން އެ ރަށްރަށުގެ މީހުންގެ ފަރާތުން ޝަކުވާ ލިބެމުންދާ ކަމަށް މި ފަހުން ރައީސް މުހައްމަދު މުއިއްޒު ވެސް ވިދާޅުވެފައިވެ އެވެ. އެހެންވެ މިހާރު އޮތް ގަވާއިދުގެ ތެރެއަށް ފަތުރުވެރިން ހެދުން އެޅުމުގެ މިންގަނޑު ހިމަނައި އިސްލާހުކުރާނެ ކަމަށް އެ މަނިކުފާނު ވިދާޅުވެފައިވެ އެވެ.