ކުޑަކުދިންނާ ގުޅޭ މައްސަލަތައް ހުށަހެޅުމާ އެކު، ކުއްޖާގެ ހާލަތު ދެނެގަތުމަށް 24 ގަޑިއިރުތެރޭ ހަދަންޖެހޭ ފުރަތަމަ މަރުހަލާގެ އެސެސްމަންޓް ފޯނުން ގުޅައި މައުލޫމާތު ނަގައިގެން ހެދޭ ގޮތަށް 'ކުޑަކުދިންނާ ގުޅޭ މައްސަލަ ބެލުމުގެ އުސޫލުތައް ކަނޑައެޅުމުގެ ގަވާއިދު' އިސްލާހުކޮށްފި އެވެ.
ވީ ކިހިނެއް؟ - މި ގަވާއިދުގެ ފަސް މާއްދާއަކަށް އިސްލާހު ގެނެސް، މިދިޔަ އާދިއްތަ ދުވަހު ވަނީ އާންމުކޮށްފަ އެވެ. އޭގެ ތެރޭގައި މައްސަލައެއް ހުށަހެޅުމާ އެކު އަމަލުކުރަންޖެހޭ ގޮތާއި މައްސަލައެއް ރަޖިސްޓްރީކުރަންޖެހޭ ގޮތާއި ފުލުހުންނަށް މައްސަލަ ހުށަހެޅުމުގައި އަމަލުކުރަންޖެހޭ ގޮތަށް ވެސް ކުދިކުދި އިސްލާހުތައް ގެނެސްފައިވެ އެވެ.
ތަފްސީލް - މައްސަލަ ރަޖިސްޓްރީކުރުމާއި އެންޓްރީކުރުމުގެ މާއްދާއަށް އަލަށް ގެނައި އިސްލާހުގައިވާ ގޮތުން، މިނިސްޓްރީއަށް މައްސަލައެއް ހުށަހެޅުމާ އެކު، އޮން-ކޯލް ކޭސް ވޯކަރު 'އިނީޝިއަލް ސްކްރީނިން އެސެސްމަންޓެ'އް ހަދަންޖެހޭނެ އެވެ.
މިނިސްޓްރީއަށް ހުށަހެޅޭ މައްސަލަތަކުގެ ތެރެއިން މައްސަލައެއްގެ ގޮތުގައި ރަޖިސްޓްރީކުރާނީ އެ އެސެސްމަންޓް ހެދުމަށް ފަހު، އިތުރަށް މައުލޫމާތު ހޯދަންޖެހޭ މައްސަލަތަކުގަ އާއި ކުއްޖާގެ ރައްކާތެރިކަން ކަށަަވަރުނުވާ ހާލަތުގައި އެކަންޏެވެ. އެފަދަ ހާލަތެއް ނެތްކަން ކަށަވަރުވާ ނަމަ، އެ މައްސަލަ ނިމުނީ ކަމުގައި ބަލަންޖެހެ އެވެ.
އިނީޝިއަލް ސްކްރީނިން އެސެސްމަންޓް ހެދުމުގައި މީގެ ކުރިން އަަމަލުކުރަންޖެހޭ ގޮތަކީ އެ ކުއްޖަކާ ބައްދަލުކޮށް، މައުލޫމާތު ހޯދުމަށް ފަހު 24 ގަޑިއިރު ތެރޭ އެ އެސެސްމަންޓް ހެދުމެވެ.
އެ މާއްދާއަށް އަލަށް ގެނައި އިސްލާހުގައިވާ ގޮތުން، މައްސަލައެއް ހުށަހެޅުމުން، ފޯން މެދުވެރިކޮށް އެ މައްސަލައިގެ މައުލޫމާތު ހޯދައި 24 ގަޑިއިރުގެ ތެރޭގައި ކުއްޖާގެ އެސެސްމަންޓް ހަދަންޖެހެ އެވެ. މި އެސެސްމަންޓް ހެދުމަށް ކޮންމެހެން ކުއްޖާއާ ބައްދަލުކުރާކަށް ނުޖެހެ އެވެ.
ކުއްޖާއާ ބައްދަލުކޮށް އެ އެސެސްމަންޓް ހަދަންޖެހެނީ ފޯނުން ގުޅައިގެން މައުލޫމާތު ނުލިބިއްޖެ ހާލަތެއްގައި ކަމަށް އެ އިސްލާހުގައިވެ އެވެ. މި ހާލަތުގައި ކުއްޖާއާ ބައްދަލުކުރަން ދާންޖެހެނީ އެ ކުއްޖާ ހުރި ރަށަކަށް ނަމަ އަދި އެކަށީގެންވާ ސަބަބަކާ ހުރެ 24 ގަޑިއިރު ތެރޭ އެ އެސެސްމަންޓް ހަދަން އެ ރަށަކަށް ނުދެވޭ ނަމަ 72 ގަޑިއިރު ތެރޭގައި އެ އެސެސްމަންޓް ހެދިދާނެ ކަމަށް ވެސް އިސްލާހުގައިވެ އެވެ.
ފުރަތަމަ މަރުހަލާގައި ހަދާ މި އެސެސްމަންޓް ހަދާތާ ގިނަވެގެން 14 ދުވަހުގެ ތެރޭގައި 'ކޮމްޕްރިހެންސިވް އެސެސްމަންޓް' ހަދައި ފުރިހަމަ ކުރަންވާނެ ކަމަށް ވެސް އިސްލާހުގައިވެ އެވެ. ކުރިން މިކަމަށް އޮންނަނީ ހަތް ދުވަހުގެ މުއްދަތެކެވެ.
ދެން މި ގައިވާދަށް ގެނެސްފައިވާ އަނެއް މައިގަނޑު އިސްލާހަކީ ފުލުހުންނަށް ވަގުތުން އަންގަންޖެހޭ މައްސަލަތަކުގައި، ސަރުކާރު ބަންދު ދުވަސް ދުވަހު މައްސަލައެއްގެ ރިފަރަލް ހަދާ ފުލުހުންނަށް ހުށަހަޅަން ޖެހޭ ހާލަތުގައި އަމަލުކުރާނެ ގޮތަށް ގެނެއި އިސްލާހެކެވެ.
އެ މާއްދާގެ (ނ) ފަހަތަށް އަކުރެއް އިތުރުކޮށް، ގެނެސްފައިވާ އިސްލާހުގައިވާ ގޮތުން ސަރުކާރު ބަންދު ދުވަހެއްގައި މައްސަލައެއް ހުށަހެޅި ރިފަރަލް ހަދަން ޖެހިއްޖެ ނަމަ، ފޯނުން ގުޅައިގެން ފުލުހުންނަށް އެ މައްސަލަ ވަގުތުން އެންގުމަށް ފަހު 72 ގަޑިއިރު ތެރޭ އެ ރިފަރަލް ހަދައި ފޮނުވަންޖެހޭނެ އެވެ. ކުރިން އޮންނަނީ މައްސަލައެއް ހުށަހަޅާތާ 24 ގަޑިއިރު ތެރޭ ރިފަރަލް ފޮނުވަންޖެހޭ ގޮތަށެވެ.
އެނގުން މުހިންމު - ޖެންޑާ މިނިސްޓްރީއަށް ހުށަހަޅާ ކުޑަކުދިންނާ ގުޅޭ މައްސަލަތަކުގެ މައްސަލަތަކުގެ ތެރޭގައި އާއިލީ މައްސަލަ، އަހުލާގީ މައްސަލަ، ގެވެށި އަނިޔާގެ މައްސަލަ، ޖިންސީ ގޯނާއާ އިހުމާލުވުމުގެ މަައްސަލަތަކުގެ އިތުރުން އަދި އަމިއްލަ ނަފްސަށް ގެއްލުންދޭން މަސައްކަތް ކުރުމުގެ މައްސަލަތައް ވެސް ހިމެނެ އެވެ.
މީގެ ތެރެއިން އެންމެ ގިނައިން ރިޕޯޓުކުރާ ކަމަށް ފާހަގަ ކުރެވެނީ ކުޑަކުދިންނަށް ކުރާ ޖިންސީ ގޯނާއާ އިހުމާލުވުމުގެ މައްސަލަތަކެވެ. އެގޮތުން މިދިޔަ މަހު އެކަނި ވެސް ކުޑަކުދިންނާ ގުޅޭ 200އަށް ވުރެ ގިނަ މައްސަލަ އެ މިނިސްޓްރީއަށް ރިޕޯޓުކޮށްފައިވާ ކަމަށް މިނިސްޓްރީގެ ތަފާސްހިސާބުތަކުން ދައްކަ އެވެ. އޭގެ ތެރޭގައި ވެސް އެންމެ ގިނައީ ޖިންސީ ގޯނާގެ މައްސަލަތަކާއި އިހުމާލުވުމުގެ މައްސަލަތެކެވެ.