އިންޑިއާ ކަނޑުގެ މެދުގައި އޮތް އައްޑޫ ސިޓީގެ ގުދުރަތީ މަގާމުގެ ފައިދާ ހޯދުމަށްޓަކައި، ކެންޔާގެ މުމްބާސާ އާއި އިންޑޮނީޝިއާގެ ޖަކާޓާއާ ދެމެދު “އިކޮނޮމިކް ކޮރިޑޯ” އެއް ގާއިމްކުރުމުގެ އަމަލީ މަސައްކަތް ކުރީގެ ރައީސް މުހައްމަދު ނަޝީދު ފައްޓަވައިފިއެވެ.
ރައީސް ނަޝީދު އެކްސްގައި އާންމުކުރެއްވި ވީޑިއޯއެއްގައި ވިދާޅުވީ، އައްޑޫ އޮތީ ދުނިޔޭގެ މުދާ އުފުލާ މައި މަގުތަކުގެ ސީދާ މެދުގައި ކަމަށެވެ. އެފްރިކާ ބައްރާއި ފާ-އީސްޓްގެ ގައުމުތައް ކަމަށްވާ އިންޑޮނީޝިއާ، މެލޭޝިއާ އަދި ސިންގަޕޫރާ ދެމެދު ކުރާ ދަތުރުތަކުގައި އައްޑޫއަކީ އިގްތިސާދީ ގޮތުން ނުހަނު މުހިންމު މަރުކަޒަކަށް ހެދިދާނެ ކަމަށް އެމަނިކުފާނު ފާހަގަކުރެއްވިއެވެ.
“މި ކޮރިޑޯ ފަށަން އެންމެ ރަނގަޅު ތަނެއް ކަމަށް އަޅުގަނޑަށް ފެންނަނީ ކެންޔާގެ މުމްބާސާ، ދެން އައިސް އައްޑޫ، ގޮސް ނިންމަން އިންޑޮނޭޝިއާގެ ޖަކާޓާ. ތިޔަ ބޭފުޅުން އިންޑިއާ ކަނޑުގެ ޗާޓު ބައްލައްވާލެއްވީމަ އަޅުގަނޑު މި ދަންނަވާ ވާހަކަ ބޮޑަށް ސާފު ވާނެ،” ރައީސް ނަޝީދު ވިދާޅުވިއެވެ.
މި މަޝްރޫއާ ގުޅޭގޮތުން ކުރިއަށްދާ މަސައްކަތްތަކުގެ ތަފްސީލް ދެއްވަމުން ނަޝީދު ވިދާޅުވީ، ދާދި ފަހުން ކެންޔާގެ ރައީސް ވިލިއަމް ރޫޓޯއާ ބައްދަލުކުރައްވައި މިކަމާ ގުޅޭގޮތުން މަޝްވަރާ ކުރައްވާފައިވާ ކަމަށެވެ. އަދި މި “ގްރީން އިކޮނޮމިކް ކޮރިޑޯ” ގާއިމްކުރުމުގެ ފީސިބިލިޓީ ޓެސްޓެއް ހެދުމަށް ކެންޔާގެ ސަރުކާރުން ތައްޔާރަށް އޮތްކަމުގެ ފެހި ސިގްނަލް ލިބިފައިވާ ކަމަށް ވެސް އެމަނިކުފާނު ހާމަކުރެއްވިއެވެ.
އިންޑިއާ ކަނޑަކީ ދުނިޔޭގެ އެކި ކަންކޮޅުތަކުން އެތައް ބޯޓު ފަހަރެއް މުދާ އުފުލަން ބޭނުންކުރާ މަގަކަށް ވާއިރު، މި ކޮރިޑޯގެ ސަބަބުން އައްޑޫގެ އިގްތިސާދަށް ބޮޑު ކުރިއެރުމެއް ލިބި، ރާއްޖޭގެ ދެކުނަކީ ބައިނަލްއަގުވާމީ ވިޔަފާރީގެ މުހިންމު ބައިވެރިއަކަށް ވެގެންދާނެ ކަމަށް ރައީސް ނަޝީދު އުއްމީދު ކުރައްވައެވެ.