ރޮބަޓް ރީޗްއަކީ ބިލް ކްލިންޓަންގެ ސަރުކާރުގައި ލޭބަ މިނިސްޓަރުކަން ކުރެއްވި، އިގުތިސާދީ ދާއިރާގެ ޕްރޮފެސަރެކެވެ. އޭނާއަކީ އާމްދަނީގެ ފަރަގު ބޮޑުވުމާ ދެކޮޅަށް ވަރަށް ގިނަ ލިއުންތަކެއް ލިއުއްވާ އަދި އެމެރިކާގެ ބޮޑެތި ބައެއް ޔުނިވަސިޓީތަކުގައި އިގުތިސާދީ މާއްދާ ކިޔަވައިދެއްވި ޕްރޮފެސަރެކެވެ. ނެޓްފްލިކްސްއަށް ޑޮކިއުމެންޓްރީ ހަދައިދެއްވަ އެވެ. އެމެރިކާގެ ސަރުކާރުގެ ސިޔާސަތުތަކަށް އިލްމީ ނަޒަރުން ބައްލަވައި، ފާޑުކިއުއްވަ އެވެ. ހާއްސަކޮށް ރައީސް ޑޮނަލްޑް ޓްރަމްޕްއާ މެދު އޭނާ ދެކެވަޑައިގަންނަވަނީ ވަރަށް ނުރުހުންތެރި ނަޒަރަކުންނެވެ.
ރީޗް މިއަދު ލިއުއްވި ލިއުއްވުމުގެ ކުރު ހުލާސާއެއް މި ގެނެސްދެނީ މެދުއިރުމަތީގެ ހަނގުރާމައާ ގުޅޭ ގޮތުން އާންމުންގެ މެދުގައި ވަރަށް ތަފާތު ބަހުސްތައް ހިނގަމުން ދާތީ، އެމެރިކާގެ އެތެރޭގައި، ބައެއް އިލްމުވެރިންގެ ވިސްނުން ހުރި ގޮތް ވެސް އަންގައިދެވޭތޯ އެވެ. ތަފާތު އެކި މީހުންގެ ހިޔާލު ހުރި ގޮތް ދެނެގަތުމަކީ މިކަހަލަ ދަނޑިވަޅެއްގައި ތިމާގެ އަމިއްލަ މައުލޫމާތު ވެސް މުއްސަނދިވާނެ ކަމެކެވެ.
ރޮބަޓް ރީޗު
އީރާނާ ދެކޮޅަށް އެމެރިކާއިން ފެށި ހަނގުރާމައާ ބެހޭ ގޮތުން ރައީސް ޓްރަމްޕް އެކި ފަހަރު ދައްކަވަނީ އެކި ވާހަކަ އެވެ.
ޓްރަމްޕް ވިދާޅުވި ބައެއް ވާހަކަތަކަކީ މި އެވެ:
އީރާނުގެ މިސައިލް ގާބިލްކަން ފުނޑުކޮށްލާނަން
އީރާނުގެ ކަނޑުގެ ލަޝްކަރު ނައްތާލާނަން
އީރާނުގައި އޮތީ މޮޔަ އަދި އަނިޔާވެރި ވެރިކަމެއް
އީރާނަށް ދުވަހަކު ވެސް ނިއުކްލިއަ ހަތިޔާރެއް ހެދިޔަކަ ނުދޭނަން
ސުވާލަކީ މިއިން އެއްވެސް ކަމެއް ހާސިލްކުރެވޭކަން އަހަރެމެންނަށް އެނގޭނީ ކިހިނެއް ހެއްޔެވެ؟
އެމެރިކާގެ ޖާސޫސީ އިދާރާގެ އިސް ވެރިން ވިދާޅުވާ ގޮތުގައި ނިއުކްލިއަ ބޮޑެތި މަރުކަޒުތަކަށް މިދއަ ޖޫން މަހު އެމެރިކާއިން ދިން ހަމަލާތަކުގެ ފަހުން އީރާނުން ނިއުކްލިއަ ބޮން އުފައްދާކަށް ނޫޅެ އެވެ. މުއްސަނދިކޮށްފައި ހުރި ޔޫރޭނިއަމް ވަނީ ގޮއްވާލި މަރުކަޒުތަކުގެ ފުނުގައި، ވަަޅުލެވިފަ އެވެ.
އިންޓަނޭޝަނަލް އެޓޮމިކް އެނާޖީ އެޖެންސީން ބުނަނީ ޖޫންގެ ފަހުން ޔޫރޭނިއަމް މުއްސަނދިކުރަން އީރާނުން ފެށިކަމުގެ އެއްވެސް ހެއްކެއް ނެތް ކަމަށެވެ.
އެކަމަކު ވެސް އެމެރިކާއިން އަދިވެސް އެދަނީ މެދުއިރުމައްޗަށް އަސްކަރީ ލަޝްކަރުތައް ފޮނުވަމުންނެވެ. ވައިގެ މަގުން ބޮޑެތި ހަމަލާތައް ކުރިއަށް އޮތީ ކަމަށް ޓްރަމްޕް ވިދާޅުވެ އެވެ. އަނެއްކޮޅުން އެއްގަމު ސިފައިން ނުފޮނުވާނެ ކަމަކަށް ވެސް ވިދާޅެއްނުވެ އެވެ.
މި ހަނގުރާމަ އެމެރިކާއަށް ކާމިޔާބުކުރެވިދާނެކަމުގެ ސާފު އެއްވެސް ވާހަކައެއް ޓްރަމްޕް އާއި އޭނާގެ ސަރުކާރުގެ އެއްވެސް ވެރިޔަކު ނުދައްކަވަ އެވެ.
މިކަން ނިންމާނެ ގޮތުގެ އެއްވެސް ރޭވުމެއް ޓްރަމްޕްގެ ނެތެވެ. އެކި ފަހަރު ދެއްވަނީ އެކި މުއްދަތެވެ. އެކި ލަނޑުދަނޑިތަކެވެ. އެހާ އަވަހަށް ވާހަކަ ވެސް ބަދަލުކުރައްވަ އެވެ. މިސާލަކަށް:
ހާސިލްކުރަން ބޭނުންވަނީ ކޮން ކަންތައްތަކެއްތޯ އެންބީސީން ސުވާލުކުރުމުން ވިދާޅުވި އެވެ: "ފުރަތަމަ ކަމަކީ ގާތިލުންގެ އެ ގްރޫޕް [އީރާން ސަރުކާރު] ފުނޑާލުމާއި އެ އެންމެން ބޭރުކުރުން"
ވޮޝިންޓަން ޕޯސްޓްއަށް ވިދާޅުވި އެވެ: "އަހަރެން ހަމައެކަނި ބޭނުންވަނީ އީރާނުގެ ރައްޔިތުންނަށް މިނިވަންކަން ހޯދައިދޭން."
އޭބީސީ ނިއުސްއަށް ވިދާޅުވި އެވެ: އީރާނުގެ ކުރިމަގަށް އަހަރެންގެ އޮތީ "ވަރަށް ހިތްގައިމު ޕްލޭންއެއް"
އެހެން މީޑިއާތަކުގައި ވާހަކަ ދައްކަވަމުން ވިދާޅުވީ އީރާނުގެ ސަރުކާރާ ހަވާލުވާނެ ރަނގަޅު ކެންޑިޑޭޓުން އެބަ ތިބި ކަމަށް. ނަމަވެސް އޭބީސީގައި ވާހަކަ ދައްކަވަމުން ފަހުން ވިދާޅުވީ އޭނާގެ ވިސްނުމުގައި އޮތް އެންމެން މަރުވެފައިވާ ކަމަށް
މި ހަނގުރާމައަކީ އެމެރިކާއަށް ހައްގު ހަނގުރާމައެއްތޯ ރައްޔިތުންނަށް ވިސްނައިދެއްވުމުގެ އެއްވެސް ނިޔަތެއް ޓްރަމްޕްގެ ނެތެވެ. އީރާނަށް އޭނާ އެ ހައްދަވަނީ ކިހިނެއްކަން ހަގީގަތުގައި އެނގިވަޑައެއް ނުގަންނަވަ އެވެ. އެހެންކަމުން މި ހަނގުރާމަ ފެށީ ތިމާއަކީ އެހެން ބަޔަކަށް އަތްލެވޭނެ މީހެއް ނޫން ކަމަށް ގަބޫލުކުރައްވާ ބޮޑާކަމުގެ ސަބަބުންނެވެ.
ޓްރަމްޕް އަބަދުވެސް ކަން ކުރައްވަނީ އެގޮތަށެވެ. އަބަދުވެސް ހަމަނުޖެހުމެއް އުފެއްދުމަކީ އޭނާގެ ލޯތްބެވެ. ކޮންމެ ކަމެއްގައި ވެސް އޭނާގެ އަމިއްލަ ވިސްނުން މާ މަތިކަން ދައްކަވަން ބޭނުންވަނީ އެވެ. ނާކާމިޔާބީތަކުގެ ޒިންމާ ނުނަންގަވައި ފޮރުވިގަންނަނީ އެވެ. އެހެން މީހުންނަށް ދައްކަވަނީ ހުވަފެނީ އުފާތަކާއި ކާމިޔާބީތަކެކެވެ.
އެކަމަކު މެދުއިރުމަތީގައި ޓްރަމްޕް ރޯކުރެއްވި ހުޅު މާ ބޮޑެވެ. އޭނާއަށް ވެސް އޭގެ ކޮންޓްެރޯލެއް ނެތެވެ. ހަމަނުޖެހުން ބޮޑުވެ ފެތުރި އެ ގަންނަނީ މާ އަވަހަށެވެ. އެންމެ ތިން ދުވަސް ވީ އިރު ޓްރަމްޕްއަށް ދެއްކެވޭ ވާހަކަތަކުގައި މިސްރާބު ގެއްލިއްޖެ އެވެ. އެ ވާހަކަތައް ހަމައެއް ނުޖެހެ އެވެ.
އޭނާ ހީކުރެއްވީ މި ހަނގުރާމައަކީ އޭނާއަށް އެހީއެއް ކަމަށެވެ. އޭނާގެ ހައިސިއްޔަތު މާ ބޮޑުކޮށް ދައްކާލެއްވޭނެ ކަމަށެވެ. އަމިއްލަ ގައުމުގައި ފެއިލްވެފައި ހުރި ކަންކަމުގެ މަތިން ސަމާލުކަން ދުރުކޮށްލެވޭނެ ކަމަށެވެ.
ނަމަވެސް މި ހަނގުރާމައިން ޓްރަމްްޕް ވަމުން އެދަނީ ކުޑަ އެވެ. ނަތަންޔާހޫގެ އަތްދަށުގައި ތާށިވަނީ އެވެ. މެދުއިރުމަތީގެ ބިޔަ ގޮހޮރުގެ ތެރެއަށް ދަމައިގަތް އެމެރިކާގެ އިތުރު ރައީސަކަށް ވެވަޑައިގަންނަވަނީ އެވެ.
އެމެރިކާ މީހުންނަކީ ހަނދާން ބަލި ބައެކެވެ. އެކަމަކު ޓްރަޕް އަލުން އިންތިހާބުކުރީ ތިން ވައުދެއް ހާސިލްކުރަންކަން، އެމީހުންގެ ހަނދާނަށް އަންނާނެ އެވެ. އެއީ:
އެއްޗެހީގެ އަގު ތިރިކުރުން: ޓްރަމްޕަށް އެކަމެއް ނުވި އެވެ. އިންފްލޭޝަން މައްޗަށް އެދަނީ އަހަރަކު ގާތްގަނޑަކަށް ތިން ޕަސެންޓްގަ އެވެ. މެދުއިރުމަތީގައި އޭނާ ފެއްޓެވި ހަނގުރާމައިގެ ސަބަބުން ތެލުގެ އަގު ވެސް ދާނީ މައްޗަށެވެ.
ގައުމުގެ ދެކުނު ސަރަހައްދީ ރޮނގުގެ ކޮންޓްރޯލް ހޯދުން: ގަވާއިދާ ހިލާފަށް އެމެރިކާއަށް ވަންނަ މީހުން ހުއްޓުވުމުގެ ބަދަލުގައި އޭނާ ނެރުނު އިމިގްރޭޝަން އެޖެންޓުން ހައްޔަރުކުރަނީ ގާނޫނީ ހައިސިއްޔަތު ލިބިގެން ދިރިއުޅެމުން އަންނަ އެމެރިކާ މީހުންނެވެ. މިހާތަނަށް އެމެރިކާގެ މަދުވެގެން ދެ މީހަކު މަރާލައިފި އެވެ.
ބޭރުގެ ހަމަނުޖެހުންތަކުގެ ތެރެއަށް ނުވަނުން: ގައުމުތަކުގެ ވެރިކަން ބަދަލުކުރުމުގެ ސިޔާސަތާ ދުރަށް އެމެރިކާ ގެންދަވާނެ ކަމަށް ވިދާޅުވި އެވެ. ކެމްޕޭންގައި ވާހަކަ ދެއްކެވީ އެއްވެސް ޕްލޭނެއް ނެތި ގައުމުތަކުގެ ސަރުކާރުތައް ބަދަލުކުރުމުން ޓެރަރިސްޓުންގެ އަތަށް ބާރުތައް ދާ ކަމަށް ވިދާޅުވެ އެވެ. 'ދުނިޔޭގެ ފުލުސް މީހާ' އަށް އެމެރިކާ ނުހެދުމަކީ އޭނާ ރައްޔިތުންނަށް ދެއްކެވި އަޒުމެވެ. އިންތިހާބު އޮތް ދުވަހުގެ ކުރީ ރޭ ވިދާޅުވި އެވެ: "އަހަރެން އެއްވެސް ހަނގުރާމައެއް ނުފަށާނަން. އަހަރެން ވާނީ ހަނގުރާމަތައް ހުއްޓުވާ މީހަކަށް."
އެ ވައުދު މިހާރު އެ އޮތީ ބޮލާލައިޖައްސަވައިފަ އެވެ. މެދުއިރުމަތީގައި އޭނާ ހަނގުރާމައެއް އެ ފެއްޓެވީ، ޕްލޭނެއް ނެތި އެވެ. އެ ހަނގުރާމަ މިސްރާބު ޖަހާނީ ކޮން ދިމާލަކަށް ކަން ރޭކާ ވެސް ނުލަ އެވެ.
މިކަހަލަ އެތައް ސަބަބަކާ ހެދި ޓްރަމްޕް އެ ދަނީ ވެއްޓެމުންނެވެ. މިއީ އަނެއްކާ އެމެރިކާގެ ވެއްޓުމަކަށް ނުވުން އެދި އަހަރެން ދުއާކުރަމެވެ.