އެމެރިކާ އާއި އިޒްރޭލުން ދެމުންދާ ވައިގެ ހަމަލާތަކުގައި ހޮސްޕިޓަލްތަކާއި ސްކޫލްތަކާއި އަދި އިންސާނީ އެހީ ފޯރުކޮށްދޭ މަރުކަޒުތަކަށް ބޮޑެތި ގެއްލުންތަކެއް ލިބެމުންދާތީ، އެކަމާ ދެކޮޅަށް ބައިނަލްއަގުވާމީ މައިދާނުގައި ހަރުދަނާ ފިޔަވަޅުތަކެއް އެޅުމަށް އީރާނުން މިއަދު ގޮވާލައިފި އެވެ.
އީރާނުގެ ފޮރިން މިނިސްޓްރީގެ ތަރުޖަމާނު އިސްމާއިލް ބަގާއީ ވަނީ، އެމެރިކާ އާއި އިޒްރޭލުން އަމާޒު ކުރަނީ އާންމު ރައްޔިތުންނަށް ކަމަށް ވިދާޅުވެ ތުހުމަތު ކުރައްވާފަ އެވެ. އޭނާ ވިދާޅުވި ގޮތުގައި، އެއްވެސް ބެލުމެއް ނެތި މީހުން ދިރިއުޅޭ ސަރަހައްދުތަކަށާއި ހޮސްޕިޓަލްތަކަށާއި ސްކޫލްތަކުގެ އިތުރުން ރެޑް ކްރެސެންޓްގެ މަރުކަޒުތަކަށާއި ތާރީހީ ބިނާތަކަށް ހަމަލާ ދެމުންދެ އެވެ.
ބަގާއީ މި ހަމަލާތައް ސިފަކުރެއްވީ ބައިނަލްއަގުވާމީ ގޮތުން ކަންބޮޑުވާންޖެހޭ ފަދަ ނުރައްކާތެރި ޖަރީމާތަކެއްގެ ގޮތުގަ އެވެ. އަދި މިކަމާ މެދު ދުނިޔެ ހަނުހުރުމަކީ އިންސާނިއްޔަތުގެ މުސްތަގުބަލަށް އޮތް ބޮޑު ނުރައްކަލެއް ކަމަށް ވެސް އޭނާ އިންޒާރު ދެއްވި އެވެ.
އީރާނުގެ ރެޑް ކްރެސެންޓް ސޮސައިޓީގެ އިސްވެރިޔާ ޕީރު ހުސައިން ކޮލިވަންދު ވަނީ، ކުޑަކުދިންނާއި ސިއްހީ މަރުކަޒުތަކަށް އަމާޒުކޮށްދޭ ހަމަލާތައް ހަރުކަށި އިބާރާތުން ކުށްވެރިކުރުމަށާއި ޖެނީވާ ކޮންވެންޝަންގެ ދަށުން ފިޔަވަޅު އެޅުމަށް އިންޓަރނޭޝަނަލް ކޮމިޓީ އޮފް ދަ ރެޑް ކްރޮސް (އައިސީއާރުސީ)އަށް ގޮވާލައްވާފަ އެވެ. އޭނާ ފާހަގަކުރެއްވި ގޮތުގައި، ގެއްލުން ލިބުނު މަރުކަޒުތަކަކީ އަސްކަރީ އެއްވެސް ބޭނުމަކަށް ބޭނުންކުރާ ތަންތަނެއް ނޫނެވެ.
އައިސީއާރުސީގެ ރައީސާ މީރްޖަނާ ސްޕޮލްޖަރިކް ވިދާޅުވީ، ހޮސްޕިޓަލްތަކާއި ގެދޮރާއި ސްކޫލް ފަދަ އާންމު އުމްރާނީ ވަސީލަތްތަކަކީ ހަމަލާތަކުން ރައްކާތެރި ކުރެވިފައިވާ ތަންތަނަށް ވާންޖެހޭނެ ކަމަށެވެ. އަދި ސިއްހީ ހިދުމަތްތެރިންނާއި ފުރަތަމަ އެހީ ފޯރުކޮށްދޭ މީހުންނަށް ރައްކާތެރިކަމާ އެކު މަސައްކަތް ކުރުމުގެ ފުރުސަތު އޮންނަންޖެހޭނެ ކަމަށް ވެސް އޭނާ ވިދާޅުވި އެވެ.
އީރާނުގެ މެޑިކަލް ކައުންސިލުން ބުނި ގޮތުގައި، ތެހެރާންގައި ހުންނަ ގާންދީ ހޮސްޕިޓަލަށް ދިން ހަމަލާތަކުގައި އެ ތަނުގެ އައިވީއެފް ޑިޕާޓްމަންޓް ވަނީ އެއްކޮށް ސުންނާފަތިވެފަ އެވެ.
މީގެ އިތުރުން، ހާތަމް އަލްއަންބިއާ އާއި މުތަހަރީ ހޮސްޕިޓަލަށް ވެސް ގެއްލުންތަކެއް ލިބި، ބައެއް ތަންތަނުން މީހުން ހުސްކުރަން ޖެހިފައިވާ ކަމަށް ރިޕޯޓުތައް ބުނެ އެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗުއޯ) އިން ވެސް ވަނީ ހޮސްޕިޓަލްތަކަށް ލިބެމުންދާ ގެއްލުންތަކުގެ ރިޕޯޓުތަކާ މެދު ކަންބޮޑުވުން ފާޅުކޮށްފަ އެވެ.
އީރާނުގެ ކަމާބެހޭ ފަރާތްތަކުން ބުނާ ގޮތުގައި، އިއްޔެއާ ހަމައަށް އެ ގައުމުން 555 މީހުން ވަނީ މަރުވެފަ އެވެ. މީނާބު ސިޓީގެ އަންހެން ކުދިންގެ ސްކޫލަކަށް ދިން ހަމަލާއެއްގައި އެކަނި ވެސް 165 މީހުން މަރުވެފައިވާއިރު، އޭގެ ތެރޭގައި ގިނައީ ކުޑަކުދިންނެވެ.
އެމެރިކާއިން ބުނަމުންދަނީ އާންމުން މަރުވަމުންދާ ކަމުގެ ރިޕޯޓުތައް ތަހުގީގު ކުރަމުންދާ ކަމަށެވެ. ނަމަވެސް އިޒްރޭލުން ބުނެފައިވަނީ އެ ސަރަހައްދަށް ހަމަލާއެއް ދިން ކަމުގެ މައުލޫމާތު ލިބިފައިނުވާ ކަމަށެވެ.
ސަރަހައްދީ ފެންވަރުގައި މިސައިލާއި ޑްރޯންގެ ހަމަލާތައް ބަދަލުކުރުން އިތުރުވެފައިވާއިރު، މީގެ ސަބަބުން އިންސާނީ އެހީތެރިކަމަށް ބޭނުންވާ މިންވަރު އިތުރުވެ، ހާލަތު އިތުރަށް ގޯސްވަމުންދާތީ ބައިނަލްއަގުވާމީ މުޖުތަމައުން ދަނީ ކަންބޮޑުވުން ފާޅުކުރަމުންނެވެ.