މެދުއިރުމަތީގެ ބައެއް ގައުމުތަކުގައިތިބި އެެމެރިކާގެ ރައްޔިތުން އެ ގައުމުތަކުން ވަގުތުން ފުރުމަށް އެމެރިކާގެ ޑިޕާޓްމަންޓް އޮފް ސްޓޭޓް އިން އަންގައިފިއެވެ. އިއްޔެ ނެރުނު ސެކިއުރިޓީ އަޕްޑޭޓެއްގައި އެ ޑިޕާޓްމަންޓުން ވަނީ ބަހްރެއިން، މިސްރު، އީރާން، އިރާގު، އިސްރާއީލް، ހުޅަނގު އައްސޭރި، ޣައްޒާ، އުރުދުން، ކުވައިތު، ލުބުނާން، އޮމާން، ގަތަރު، ސައުދީ އަރަބިއްޔާ، ސީރިއާ، ޔޫއޭއީ އަދި ޔަމަނުގައި ތިބި އެމެރިކާ މީހުން ފުރައިގެން ދިއުމަށް ނަސޭހަތްތެރިވެފައެވެ. މި އެޑްވައިޒަރީ ނެރެފައިވަނީ އެމެރިކާއާއި އިސްރާއީލު ގުޅިގެން އީރާނަށް ދޭ ހަމަލާތަކާ ގުޅިގެން މެދިއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އީރާނުން ހަމަލާދީ ސަރަހައްދީ ނުތަނަވަސްކަން އިތުރުވުމާ ގުޅިގެންނެވެ. މުޅި މެދުއިރުމަތީގެ ސަރުކާރުތަކުން ފާއިތުވި ދުވަސްތަކުގައި އެލާޓް ލެވެލް މަތިކޮށްފައިވާއިރު، ވައިގެ ސަރަހައްދުގައި ބުރޫއެރުމާއި ސަލާމަތީ ހާދިސާތަކުގެ ސަބަބުން ކަންބޮޑުވުންތައް ވަނީ އިތުރުވެފައެވެ. ސްޓޭޓް ޑިޕާޓްމަންޓުން ބުނީ ފުރުމުގެ އިންތިޒާމް ހަމަޖެއްސުމުގައި އެހީތެރިކަން ބޭނުންވާ އެމެރިކާ މީހުންނަށް އެމެރިކާއިން ބޭރުން ނުވަތަ އެމެރިކާ އާއި ކެނެޑާއިން 24 ގަޑިއިރު އިމަޖެންސީ ލައިންތަކާ ގުޅޭނެ ކަމަށެވެ. ނަމަވެސް ހަނގުރާމައިގެ ސަބަބުން ގެއްލުން ލިބުނު ގިނަ ގައުމުތަކުން ވައިގެ ސަރަހައްދުތައް ބަންދުކޮށްފައިވާތީ ގިނަ އެމެރިކާގެ ރައްޔިތުން މެދުއިރުމަތިން ބޭރުވާނެ ގޮތާމެދު މަޝްރަހު ދިރާސާކުރާ ފަރާތްތަކުން ސުވާލު އުފައްދައެވެ. މި ފަހަރުގެ ހަނގުރާމަ ފެށުނީ އެމެރިކާ އާއި އިސްރާއީލުން އީރާނާ ދެކޮޅަށް ހޮނިހިރު ދުވަހު ދިން ހަމަލާތަކާ ގުޅިގެންނެވެ. އިސްރާއީލުގެ ހަމަލާއެއްގައި އީރާނުގެ އެންމެ މަތީ ލީޑަރު އާޔަތުﷲ އަލީ ހާމަނާއީވެސް ވަނީ އަވަހާރަކޮށްލާފައެވެ.