އެންޓި ސްކޭމް ސެންޓަރުން ތަހުގީގު ކުރަމުންދާ މައްސަލައެއްގެ ތަހުގީގަށް ސުވާލުކުރުމަށް ޓަކައި، ތ. ހިރިލަންދޫ އަންހެނަކު ހާޒިރުވުމަށް ފުލުހުން މިއަދު އިއުލާނުކޮށްފިއެވެ. ފުލުހުން ބުނީ، މި މައްސަލައިގެ ތަހުގީގަށް ހާޒިރުކުރަން ބޭނުންވަނީ ތ. ހިރިލަންދޫ، ނާގަލި، ޢާއިޝަތު ނާޛިރާ (41އ) ކަމަށެވެ. ފުލުހުން މިގޮތަށް އިއުލާނުކުރީ، އޭނާ އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމުގެ ޗިޓު ރައްދުކުރެވިފައި ނުވާތީއެވެ. އެހެންކަމުން، ޖިނާއި މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެމަތިން އޭނާ ތަހުގީގަށް ހާޒިރުވުމަށް މިހާރު ވަނީ އާންމުކޮށް އަންގައި އިއުލާނުކޮށްފައެވެ. ފުލުހުންގެ އިދާރާއިން ހާމަކުރި ގޮތުގައި، ޢާއިޝަތު ނާޛިރާ ހާޒިރުކުރެވެނީ ސްކޭމްގެ މައްސަލައެއްގެ ތަހުގީގުގައި ތުހުމަތުކުރެވޭ ފަރާތެއްގެ ހައިސިއްޔަތުން ސުވާލުކުރުމަށެވެ. އޭނާ ހާޒިރުވާން ޖެހެނީ ސާޖަންޓް އާދަމް ޙަލީމް ކުރިމިނަލް އިންވެސްޓިގޭޝަން ބިލްޑިންއަށެވެ. ހާޒިރުވާންޖެހެނީ މި މަހުގެ 10ވަނަ ދުވަހުގެ 14:00 އަށެވެ. ސްކޭމް ކުރުމަށްފަހު ފިލައިގެން އުޅުމުގެ މައްސަލަތައް ރާއްޖޭގައި ވަރަށް އާންމެވެ. ގިނައިން މިފަދައިން ކަން ކުރަނީ އޮންލައިންކޮށް އެކި ސްކޭމްތައް ކުރުމަށްފަހުގައެވެ. ސްކޭމްތަކުގައި ގިނަ އަދަދެއްގެ ދިވެހީން ޖެހޭއިރު، މިފަދަ ކަންކަމުގައި ގެއްލޭ މުދަލާއި ފައިސާ ހޯދަން ދިގު މުއްދަތެއް ނަގާއިރު ގިނަފަހަރު ނުހޯދި ވެސް އެކީގައި ގެއްލެއެވެ.