އިއްޔެ ބޭއްވި ބައި-އިލެކްޝަނުން ސާފުވެގެން ދިޔައީ ރައީސް ޑރ.މުހައްމަދު މުއިއްޒުއަށް ދިވެހީން އިތުބާރުކުރައްވާކަން ކަމަށާއި، ސަރުކާރާމެދު ނަފްރަތު އުފައްދާ ފަރާތްތަކާ ދެކޮޅަށް ނުކުމެ، ރައްޔިތުން އެމަނިކުފާނަށް އޭ ރިޕޯޓެއް ދީފައިވާ ކަމަށް ރީޖަނަލް އެއާޕޯޓްސް ކޮމްޕެނީގެ މެނޭޖިން ޑިރެކްޓަރު އަހުމަދު މުބީން ވިދާޅުވެއްޖެއެވެ.
ލޯކަލް ކައުންސިލްގެ 6 ބައި-އިލެކްޝަންގެ ތެރެއިން ފަސް އިންތިޚާބު ކާމިޔާބުކުރީ ޕީއެންސީންނެވެ.
މިކަމާ ގުޅިގެން، މުބީން އެކްސްގައި ކުރެއްވި ޕޯސްޓެއްގައި ވިދާޅުވީ، ފާއިތުވީ 8 މަސްދުވަހު ދިވެހި ރައްޔިތުން ބަލައިގަންނަފަދަ ޚިދުމަތްތަކެއް ރައީސް މުއިއްޒު އަށް ކުރެވިފައިވާކަން، އިއްޔެގެ ނަތީޖާއިން އިނގޭ ކަމަށެވެ.
”ސަރުކާމެދު ނަފުރަތު އުފައްދާ ފަރާތްތަކާއި ދެކޮޅަށް ނިކުމެ ރައްޔިތުން ރައީސަށް ދެއްވެވީ ”އޭ“ ރިޕޯރޓެއް. ޝުކުރިއްޔާ ދިވެހި ލޮބުވެތި ރައްޔިތުން.“ އޭނާ ވިދާޅުވިއެވެ.
އިއްޔެ ޕީއެންސީން ހޯދި ކާމިޔާބީ އަކީ، އޭޕްރީލް މަހުގައި ބޭއްވި ރައްޔިތުންގެ މަޖިލީހުގެ އިންތިޚާބަށް ފަހުގައި، އެ ޕާޓީން ހޯދި އެންމެ ބޮޑު ކާމިޔާބީއެވެ.
ބައި އިލެކްޝަން ބޭއްވީ ހެންވޭރު ހުޅަނގު ދާއިރާއާއި، މައްޗަންގޮޅި މެދު ދާއިރާއާއި، ހުޅުމާލެ ދާއިރާއަށް ކައުންސިލް މެންބަރަކު އިންތިޚާބުކުރުމާއި، ކުޅުދުއްފުށީ އުތުރު ދާއިރާއަށް ކައުންސިލް މެންބަރަކު އިންތިޚާބުކުރުމަށެވެ. އަދި ފ.ބިލެތްދޫ ކައުންސިލް ރައީސް އިންތިޚާބުކުރުމާއި ރ. ރަސްމާދޫ ކައުންސިލަށް އަންހެން މެންބަރަކު އިންތިޚާބުކުރުންވެސް ކުރިއަށްދިޔައެވެ.
މި 6 ބައި-އިލެކްޝަންގެ ތެރެއިން 5 ބައި-އިލެކްޝަން ކާމިޔާބުކުރީ ޕީއެންސީގެ ކެންޑިޑޭޓުންނެވެ.
މި 6 ދާއިރާގެ އިތުރުން އިތުރު 3 ދާއިރާއެއްގެ ބައި-އިލެކްޝަން ބޭއްވުމަށްވެސް އިލެކްޝަންސް ކޮމިޝަނުން އިޢުލާނު ކުރި ނަމަވެސް އިންތިޚާބު ކުރަންޖެހޭ ޢަދަދަށް ކުރިމަތިލެއްވުމުން އެ ތިން ދާއިރާގައި އިންތިޚާބު ނުބާއްވައެވެ.
އެ ތިން ދާއިރާވެސް ކާމިޔާބުކުރީ ޕީއެންސީންނެވެ.